Read new_tumbuka_bible Kupenda 3 Bible Online

Kupenda 3 - new_tumbuka_bible bible

Kupenda 3

¹Iyi ndi miwiro ya ŵa mphapu ya Aroni na Mozesi, pa nyengo iyo FUMU yikayowoyanga na Mozesi pa Phiri la Sinayi.

²Mazina gha ŵana ŵa Aroni ndi agha: Nadabu wa uŵere, Abihu, Eleyazara, na Itamara.

³Gheneagha ndigho mazina gha ŵana ŵa Aroni, ŵeneawo ŵakaphakazgika na kupatuliskikira ku mlimo wa usofi.

⁴Kweni Nadabu na Abihu ŵakafwira panthazi pa FUMU, apo ŵakaperekanga sembe na moto wambula kupatulika panthazi pa FUMU, mu mapopa gha Sinayi. Iwo ŵakaŵavye ŵana. Ntheura Eleyazara na Itamara ŵakateŵeta nga mbasofi apo wiskewo Aroni wakaŵa wachali wamoyo.

⁵FUMU yikati kwa Mozesi,

⁶“Zanga nawo kufupi ŵa fuko la Levi, ndipo uŵapereke kwa musofi Aroni, kuti ŵamuteŵeterenge.

⁷Iwo ŵateŵeterenge Aroni na mpingo wose panthazi pa Chihema Chakukumaniranamo, para wakuteŵeta mu Chihema Chakukumaniranamo.

⁸Iwo ŵapwerererenge viteŵetero vyose vya mu Chihema Chakukumaniranamo na kuŵachitira ŵaIsraele milimo yose ya mu Chihema.

⁹Uŵaŵike ŵaLevi mu mawoko gha Aroni na ŵana ŵakhe. Iwo mbakuperekeka kwa iyo nkhanirankhanira kufuma mukati mu ŵaIsraele.

¹⁰Wimike Aroni na ŵana ŵakhe kuti ŵateŵetenge milimo yawo ya usofi. Usange munthu munyakhe waliyose wakwiza pafupi, wati wakomeke.”

¹¹FUMU yikati kwa Mozesi,

¹²“Nkhuŵapatula ŵaLevi kufuma mukati mu ŵaIsraele mu malo gha mwana mwanarume waliyose wa uŵere, mweneuyo wadanga kubabika mu ŵaIsraele. ŴaLevi ŵati ŵaŵenge ŵane,

¹³pakuti ŵana wose ŵa uŵere mbane. Pa zuŵa leneilo nkhakoma ŵana wose ŵa uŵere mu charu cha Eguputo, nkhajipatulira vyose vyakudanga kubabika mu charu cha Israele, mu ŵanthu na mu vikoko wuwo. Vyose viŵenge vyane. Ine ndine FUMU.”

¹⁴FUMU yikati kwa Mozesi mu mapopa gha Sinayi,

¹⁵“Penda ŵana ŵa Levi mu nyumba za ŵawiskewokuru, kwakuyana na nyumba za ŵawiskewokuru mbumba zawo. Uti upendenge mwanarume waliyose wa mwezi umoza na uyo ngwa kujumphirapo.”

¹⁶Ntheura Mozesi wakapenda kwakuyana na mazgu gha FUMU nga ndi umo wakalangulikira.

¹⁷Agha ndigho ghakaŵa mazina gha ŵana ŵa Levi: Gerishoni, Kohati na Merari.

¹⁸Sono mazina gha ŵana ŵa Gerishoni kwakuyana na mbumba zawo ndi agha: Libini na Shimeyi.

¹⁹Ŵana ŵa Kohati kwakuyana na mbumba zawo ndi aŵa: Amuramu, Izihara, Heburoni na Uziyele.

²⁰Aŵa ndiwo ŵana ŵa Merari kwakuyana na mbumba zawo: Mali na Mushi. Ŵeneaŵa ndiwo mbumba za ŵaLevi, kwakuyana na nyumba za ŵawiskewokuru.

²¹Mwa Gerishoni mukafuma mbumba ya ŵaLibina na ya ŵaShimeyi. Zeneizi ndizo zikaŵa mbumba za ŵaGerishoni.

²²Unandi wawo pakuŵapenda ŵanarume wose ŵa mwezi umoza na ŵakujumphirapo, ŵakaŵa 7,500.

²³Mbumba za ŵaGerishoni zikazenganga misasa yawo kumanyuma kwa Chihema, ku manjiliro gha dazi.

²⁴Eliyasafu mwana wa Layele ndiyo wakaŵa murongozgi wa mbumba ya ŵawiskewokuru mu ŵaGerishoni.

²⁵Mlimo wa ŵaGerishoni mu Chihema Chakukumaniranamo ukaŵa wakupwererera Chihema, pamoza na salu yakuchinga yakhe, salu yakuchinga pa muryango wa Chihema Chakukumaniranamo,

²⁶salu zakupayika za pa muryango wa pa baraza izo zikazingirizga Chihema na jochero, ndiposo na vingwe vyakhe. Ŵakachitanga na milimo yose ya kukhwaskana na vyeneivi.

²⁷Mwa Kohati ndimo mukafuma mbumba ya ŵaAmuramu, mbumba ya ŵaIzihara, mbumba ya ŵaHeburoni na ya ŵaUziyele izi ndizo zikaŵa mbumba za ŵaKohati.

²⁸Kwakuyana na unandi wa ŵanarume wose kwamba ŵa mwezi umoza na ŵakujumphirapo ŵakaŵa 8,600. Ndiwo ŵakachitanga milimo ya mu Chihema Chakupatulika.

²⁹Mbumba za ŵana ŵa Kohati zikazenganga misasa yawo ku dera la ku mwera kwa Chihema Chakupatulika.

³⁰Elizafani mwana wa Uziyele wa mbumba za ŵaKohati ndiyo wakaŵa murongozgi mu mbumba ya ŵawiskewokuru.

³¹Mlimo wawo ukaŵa wakupwererera Bokosi la Phangano, thebulu, chakuŵikapo nyali, majochero, viteŵetero vya Malo Ghakupatulika vyeneivyo ŵasofi ŵakateŵeteranga na salu yakuchinga ku Malo Ghakupatulika Nkhanira. Ŵakachitanga na milimo yose yakukhwaskana na vyeneivi.

³²Sono Eleyazara mwana wa musofi Aroni ndiyo wakaŵa mukuru pachanya pa ŵarongozgi ŵa ŵaLevi, ndipo wakaŵa mulaŵiliri wa awo ŵakapwerereranga Chihema Chakupatulika.

³³Mwa Merari ndimo mukafuma mbumba ya ŵaMali na ya ŵaMushi. Izi ndizo zikaŵa mbumba za ŵaMerari.

³⁴Kwakuyana na unandi wa ŵanarume wose, kwamba ŵa mwezi umoza na ŵakujumphirapo, ŵakaŵa 6,200.

³⁵Murongozgi wa nyumba ya ŵawiskewokuru mu mbumba za ŵaMerari, wakaŵa Zuriyele mwana wa Abihayili. Aŵa ndiwo ŵakazenga mahema ghawo ku dera ku mpoto kwa Chihema Chakukumaniranamo.

³⁶Mlimo uwo ŵaMerari ŵakapika ukaŵa wakupwererera mafuremu gha Chihema ndiposo na mitambiko, mizati, na vikongera vyakhe pamoza na vyose ivyo vikukhwaskana na vyeneivi.

³⁷Ŵakapwerererangaso mizati ya chipinda cha baraza zingirizge na vikongera vyawo, vikhomo na vingwe.

³⁸Awo wakazenga misasa yawo panthazi pa Chihema cha ku mafumiro gha dazi, kunthazi kwa Chihema Chakukumaniranamo, ŵakaŵa Mozesi, Aroni na ŵana ŵakhe. Iwo ŵakaŵa na mlimo wa kuwona kendeskero ka visopo mu Chihema Chakupatulika, na chose icho ŵakeneranga kuti ŵachite mu malo mwa ŵaIsraele. Munthu munyakhe waliyose uyo wakizanga pafupi wakeneranga kukomeka.

³⁹ŴaLevi wose awo Mozesi na Aroni ŵakapenda, mbumba na mbumba, kwakuyana na dango la FUMU, ndiko kuti ŵanarume wose kwamba ŵa mwezi umoza na ŵakujumphirapo, ŵakaŵa 22,000.

⁴⁰FUMU yikati kwa Mozesi, “Penda ŵana ŵanarume wose ŵa uŵere mu ŵaIsraele kwamba ŵa mwezi umoza na ŵakujumphirapo, ndipo ulembe mazina ghawo.

⁴¹Uti undipatulire ŵaLevi mu malo gha ŵana ŵa uŵere mukati mu ŵaIsraele na ng'ombe za ŵaLevi mu malo gha ŵana wose ŵakudanga kubabika mukati mu ng'ombe za ŵaIsraele. Ine ndine FUMU.”

⁴²Ntheura Mozesi wakapenda ŵana wose ŵa uŵere mukati mu ŵaIsraele, nga ndi umo FUMU yikamulangulira.

⁴³Ndipo ŵana ŵanarume wose ŵa uŵere, kwakuyana na unandi wa mazina, kwamba ŵa mwezi umoza na kujumphirapo, nga ndi umo ŵakapendekera, ŵakaŵa 22,227.

⁴⁴FUMU yikati kwa Mozesi,

⁴⁵“Tora ŵaLevi mu malo gha ŵana wose ŵa uŵere mukati mu ŵaIsraele, na ng'ombe zawo. ŴaLevi ŵati ŵaŵenge ŵane. Ine ndine FUMU.

⁴⁶Pakukhumba kuwombola ŵana ŵa uŵere 273 mu ŵaIsraele awo mbanandi kujumpha ŵanarume mu ŵaLevi,

⁴⁷upoke ndarama za siliva zinkhonde pa munthu waliyose kwakuyana na ndarama zakupimikira ku Chihema Chakupatulika.

⁴⁸Ndarama izi uzipereke kwa Aroni na ku ŵana ŵakhe ŵanarume kuti ziŵe zakuwombolera awo ŵajumphirako unandi.”

⁴⁹Ntheura Mozesi wakatora ndarama zakuwombolera zira kufuma kwa ŵaIsraele ŵara ŵakajumphirako unandi, ŵeneawo ŵakawomboleka na ŵaLevi.

⁵⁰Ŵakatora ndarama kwa ŵana ŵa uŵere ŵa ŵaIsraele, ndarama za siliva 1,365 kwakuyana na kapimiro kandarama za siliva mu Chihema Chakupatulika.

⁵¹Mozesi wakapereka ndarama zakuwombolera zira kwa Aroni na ŵana ŵakhe, nga ndi umo FUMU yikalangulira.