Read new_tumbuka_bible Kupenda 30 Bible Online

Kupenda 30 - new_tumbuka_bible bible

Kupenda 30

¹Mozesi wakaŵaphalira ŵarara ŵa mafuko gha ŵaIsraele wakati, “Ivi ndivyo FUMU yalangula:

²Para mwanarume wakuchita phangano, panji wakuchita chirapo, kukhozga icho wapangana, wareke kuswa phangano lakhe. Kweni FUMU yafiska vyose ivyo yikayowoya.

³“Panji usange mwanakazi uyo ndi msungwana wakurapa chirapo kwa FUMU na kukhozgera pakuchita phangano apo wali mu nyumba ya wiske,

⁴ndipo wiske wapulika chirapo chakhe na icho wapangana, mwa vyeneivyo msungwana yura wakhozgera navyo, ndipo wiske kuti wakuyowoyapo kanthu chara, penepapo virapo vyakhe na ivyo wakhozgera viti vikhalirirenge.

⁵Kweni usange wiske wamukanira pa zuŵa leneilo wapulikira ichi, chirapo cha msungwana yura na icho wakhozgera viti viŵe vyambula kukhalirira. FUMU yiti yimugowokere pakuti wiske wamukanira.

⁶“Usange wakutengwa uku wali na phangano kale, ndipo panji wakachita kwambula kughanaghana makora pa leneilo wakajikaka nalo,

⁷ndipo mufumu wakhe wapulika ichi, kweni kuti wakuyowoyapo kanthu chara pa zuŵa ilo wapulikira, penepapo mapangano ghakhe na icho wakhozgera, mwa vyeneivyo wajikaka navyo, viti vikhalirirenge.

⁸Kweni usange mufumu wakhe wakumukanira pa zuŵa ilo wapulikira, penepapo wamusutula mwanakazi yura ku chirapo chakhe na ku ivyo wakayowoya kwambula kughanaghana makora, mwa vyeneivyo wakajikaka navyo. FUMU yiti yimugowokere.

⁹“Kweni usange chokoro panji mwanakazi uyo wasuzulika wakuchita chirapo icho wajikaka nacho, chirapo ichi chiti chikhalirirenge.

¹⁰“Usange mwanakazi wakuchita chirapo uku wali mu nyumba ya mufumu wakhe, panji wakukhozga phangano na chirapo,

¹¹ndipo mufumu wakhe wapulika ichi kweni kuti wakuyowoya kanthu chara, nesi kumukanira, penepapo mapangano ghakhe ghose na icho wakhozgera viti vikhalirirenge.

¹²Kweni usange pa zuŵa ilo mufumu wakhe wapulikira ichi ndipo wakuchizgora kuŵa chawaka, penepapo chose icho wakuyowoya pa vya mapangano ghakhe, panji mazgu agho wajirapizga nagho, kuti ghati ghaŵenge ghakukhozgeka chara. Mufumu wakhe wamukanizga ndipo FUMU yiti yimugowokere mwanakazi yura.

¹³Mufumu wakhe wali na nkhongono za kukhozgera panji kureka kukhozgera phangano lirilose panji chirapo chilichose icho mwanakazi wakurapa.

¹⁴Kweni usange mufumu wakhe wakureka kuyowoyapo kanthu apo pose wakughapulikira makani, ipo wakukhozgera mapangano gha muwoli wakhe panji virapo vyakhe vyose, vyeneivyo wachita. Mufumu wakhe wakukhozgera chifukwa walije kuyowoyapo kanthu para wakati waghapulika.

¹⁵Kweni usange mufumu wakhe wakughazgora mapangano ghara kuŵa gha waka para pajumpha nyengo pamanyuma pakughapulika, penepapo mufumu wakhe wati waŵenge na mrandu mu malo mwa mwanakazi wakhe.”

¹⁶Agha ndigho marango gheneagho FUMU yikapereka kwa Mozesi kuŵa pakati pa mufumu na muwoli wakhe, na pakati pa wiske na mwana wakhe mwanakazi apo wachali mwali mu nyumba wa ŵawiske.