Read new_tumbuka_bible Kupenda 31 Bible Online

Kupenda 31 - new_tumbuka_bible bible

Kupenda 31

²“Uwezgere nduzga pa ŵaMidiyani chifukwa cha uheni uwo waŵachitira ŵaIsraele. Pamanyuma pa ichi ndipo iwe uti ufwenge na kusungika pamoza na ŵabali ŵako.”

³Ntheura Mozesi wakaŵaphalira ŵaIsraele kuti, “Ŵanarume ŵanji mukati mwinu muŵape mahomwa, kuti ŵakarwe na ŵaMidiyani kufiska nduzga za FUMU.

⁴Ku mu fuko lirilose la ŵaIsraele, mutoreko ŵanthu 1,000 kuti ŵakarwe nkhondo.”

⁵Ntheura kufuma mu vikwi na vikwi vya ŵaIsraele wakatoramo ŵanthu 1,000 kufuma mu fuko lirilose, ndipo wose pamoza ŵakaŵa 12,000 ŵakunozgekera nkhondo.

⁶Mozesi wakatuma ku nkhondo ŵanthu 1,000 kufuma mu fuko lirilose, pamoza na Finehasi mwana wa Eleyazara musofi, uku wayegha viteŵetero vya pa Chihema Chakupatulika, ndiposo na zimbata zakuchenjezgera ŵanthu mu mawoko ghakhe.

⁷ŴaIsraele ŵakarwa nkhondo na ŵaMidiyani, nga ndi umo FUMU yikamuphalira Mozesi ndipo ŵakakoma ŵanarume wose.

⁸Ŵakakoma ŵakaronga ŵankhonde ŵa ku Midiya pamoza na ŵanthu ŵawo. Mazina ghawo ndi agha: Evi, Rekemu, Zuru, Huru, na Reba. Ŵakakomaso na lupanga Balaamu mwana wa Beyoro.

⁹ŴaIsraele ŵakaŵatorera ku uzga ŵanakazi na ŵana ŵa ku Midiya. Ŵakaphanga ng'ombe zawo, mberere zawo na ŵakatundu ŵawo wose.

¹⁰Ŵakawocha na moto misumba yawo yose mwenemumo iwo ŵakakharanga, ndipo na misasa yawo yose,

¹¹ndipo ŵakayegha vyose ivyo ŵakaphanga ku nkhondo, ŵanthu pamoza na vyakuŵeta.

¹²Sono ŵakiza na ŵamikori na vyose ivyo wakaskogha kwa Mozesi na kwa Eleyazara Musofi na ku mpingo wose wa Israele. Ichi chikachitika pa misasa ya ku vidika vya ku Mowabu, pafupi na mronga wa Yorodani kuthyana na msumba wa Yeriko.

¹³Mozesi na Eleyazara musofi pamoza na ŵarongozgi wose ŵa mpingo, ŵakaruta kuya kakumana nawo kuwaro kwa misasa.

¹⁴Mozesi wakaŵakaripira ŵarara ŵa ŵankhondo na ŵarongozgi ŵa ŵankhondo chikwi chimoza na ŵa ŵankhondo 100 ŵeneawo ŵakawerako ku nkhondo.

¹⁵Mozesi wakaŵafumba wakati, “Kasi nchifukwa uli ŵanakazi wose mwaŵareka ŵamoyo?

¹⁶Wonani, ŵanakazi aŵa ndiwo ŵakanangiska ŵaIsraele na urongozgi wa Balaamu, na kuyuyura FUMU ku Peyoro kura. Ntheura nthenda yakofya yikanjira mu mpingo wa FUMU.

¹⁷Sono komani mwana mwanarume waliyose, na mwanakazi waliyose uyo wali kugonanapo na mwanarume.

¹⁸Kweni ŵasungwana wose awo ŵandamumanye mwanarume mureke kukoma kuti ŵaŵe ŵinu.

¹⁹Waliyose wa imwe mweneuyo wakoma munthu, na mweneuyo wakhwaska chitanda wakhare kuwaro kwa msasa mazuŵa ghankhonde na ghaŵiri. Pa zuŵa la chitatu na la chinkhonde na chiŵiri mujitozge imwe pamoza na awo mwaŵakora umikori.

²⁰Muti mutozge chakuvwara chilichose, chose icho nchakunozgeka na chikumba chose icho nchakunozgeka na weya wa mbuzi, ndiposo na chiteŵetero chilichose chakupangika na khuni.”

²¹Sono Eleyazara musofi wakaŵaphalira ŵasilikari ŵeneawo ŵakaruta ku nkhondo wakati, “Dango leneilo FUMU yalangulira Mozesi ndakuti,

²²vinthu ivi pera, golide, siliva, mkuŵa, chisulo, ndolo, na muthovu,

²³ndiposo chilichose icho chikureka kusongonoka na moto, muchendeske mu moto ndipo chiti chiŵenge chakutozgeka. Kweni chilichose icho chikusongonoka mu moto, muti muchisukenge mu maji.

²⁴Mukwenera kuchapa vyakuvwara vyinu pa zuŵa la chinkhonde na chiŵiri, ndipo muti muŵenge ŵakutozgeka. Pamanyuma pakhe ndipo mwizenge mu msasa.”

²⁵FUMU yikamuphalira Mozesi kuti,

²⁶“Iwe na pamoza na Musofi Eleyazara na ŵarara ŵa mpingo mu nyumba za ŵawiskewokuru mupende chilichose icho chikaŵa ku umikori, ŵanthu na vinyama wuwo.

²⁷Ndipo vyakuskogha vira uvigaŵe paŵiri. Chigaŵa chimoza chiŵe cha ŵasilikari awo ŵakaruta kuya karwa nkhondo, chinyakhe chiŵe cha mpingo wose.

²⁸Mupereke muthulo kwa FUMU, wakufumira ku ŵasilikari awo ŵakaruta ku nkhondo. Pa vyakuskogha 500 mutorepo chimoza pa ŵazga, pa ng'ombe, pa mbunda na mberere na mbuzi.

²⁹Ivi mutorepo pa chigaŵa cha ŵankhondo ndipo mupereke kwa Eleyazara musofi kuŵa sembe kwa FUMU.

³⁰Ndipo pa phande la ŵaIsraele, mutorepo chakuskogha chimozachimoza mu vyakuskogha 50 pa ŵanthu, pa ng'ombe, pa mbunda, pa mberere na mbuzi, ndiposo na pa vyakuŵeta vyose vinyakhe, ndipo muvipereke ku ŵaLevi ŵeneawo ŵakuteŵeta mu Chihema Chakupatulika cha FUMU.”

³¹Mozesi na Eleyazara musofi ŵakachita nga ndi umo FUMU yikamulangulira Mozesi.

³²Sono vyakuskogha ivyo vikakharapo vyeneivyo ŵankhondo ŵakaskogha vikaŵa ivi: mberere na mbuzi 675,000,

³³ng'ombe 72,000,

³⁴mbunda 61,000 ndipo na ŵanthu wose pamoza 32,000 awo ndi

³⁵ŵanakazi wambula kumumanya mwanarume 32,000.

³⁶Phande la awo ŵakaruta ku nkhondo likaŵa mberere 337,000,

³⁷ndipo mberere na mbuzi izo zikaperekeka kwa FUMU, vikaŵa 675.

³⁸Ng'ombe zikaŵapo 36,000, ndipo mwa izi 72 ndizo zikaperekeka kwa FUMU.

³⁹Mbunda zikaŵapo 30,500 ndipo mwa izi 70 ndizo zikaperekeka kwa FUMU.

⁴⁰Ŵanthu ŵakaŵapo 16,000 ndipo mwa iwo ŵanthu 32 ndiwo ŵakaperekeka kwa FUMU.

⁴¹Mozesi wakapereka kwa Eleyazara musofi muthulo uwo ukaperekeka kwa FUMU kuŵa sembe, kwakuyana na umo FUMU yikalangulira Mozesi.

⁴²Mozesi wakagaŵa vyakuskogha na kuŵapa ŵaIsraele hafu, kufuma pa vyakuskogha ivyo vikiza na ŵanthu awo ŵakaruta ku nkhondo.

⁴³Sono phande la mpingo wa ŵaIsraele likaŵa na vyakuskogha ivi: mberere na mbuzi 337,500,

⁴⁴ng'ombe 36,000,

⁴⁵mbunda 30,500,

⁴⁶ndiposo ŵanthu 16,000.

⁴⁷Pa phande la ŵaIsraele, Mozesi wakatorapo chakuskogha chimozachimoza mu vyakuskogha 50, pa ŵanthu na pa vinyama, ndipo wakavipereka ku ŵaLevi ŵeneawo ŵakasungiliranga Chihema Chakupatulika cha FUMU nga ndi umo FUMU yikamulangulira Mozesi.

⁴⁸Penepapo ŵararaŵarara ŵa ŵasilikari awo ŵaŵarongozganga ŵasilikari wose, ŵarongozgi ŵa ŵasilikari vikwivikwi, na ŵarongozgi ŵa ŵasilikari 100 ŵakiza kwa Mozesi.

⁴⁹Iwo ŵakati kwa Mozesi, “Taŵateŵeti ŵinu taŵapenda ŵasilikari awo ŵali pasi pithu. Palije na yumoza uyo wakusoŵa.

⁵⁰Ndipo tiza na vyakupereka kwa FUMU vyeneivyo munthu waliyose wakasanga nga ndi vitoweskero vya golide, vibangili, malusakara, mphete, ndewerewe na mikanda kuti ŵachitire maluso ghakuphepiskira zakwananga.”

⁵¹Ntheura Mozesi na musofi Eleyazara musofi wakapokerera kufuma kwa iwo, golide pamoza na vyose ivyo ŵakachita kufura.

⁵²Golide yose uyo ŵakapereka kwa FUMU, kufumira ku ŵarongozgi ŵa ŵankhondo vikwivikwi na ŵankhondo 100, likaŵa la uzitu wa makilogiramu 200.

⁵³Ŵankhondo ŵara ŵakatorapo waliyose vyakuskogha vyakhe na vyakhe.

⁵⁴Sono Mozesi na Eleyazara musofi ŵakapokerera golide ku ŵarongozgi ŵa vikwi na vikwi na ŵa ma 100, ndipo ŵakiza navyo mu Chihema Chakukumaniranamo, kuŵa chikumbusko cha ŵaIsraele panthazi pa FUMU.