Read new_tumbuka_bible Kupenda 32 Bible Online

Kupenda 32 - new_tumbuka_bible bible

Kupenda 32

¹Ŵana ŵa Rubeni na ŵana ŵa Gadi ŵakaŵa na ng'ombe zinandi chomene. Para ŵakati ŵawona charu cha Yazere na cha Gileyadi, ŵakasanga kuti chikaŵa charu chakwenerera kuŵeteramo ng'ombe.

²Ntheura ŵana ŵa Gadi na ŵana ŵa Rubeni ŵakiza kwa Mozesi na Eleyazara musofi na ku ŵarongozgi ŵa mpingo na kuŵaphalira kuti,

³“FUMU yatovwira kutora charu chakuzingirizga Ataroti, Diboni, Yazere, Nimura, Heshiboni, Eleyale, Sebamu, Nebo na Beyoni.

⁴Ndipo ndi charu icho FUMU yathereska pambere pa mpingo wa ŵaIsraele, cheneicho nchakwenerera kuŵeteramo ng'ombe, ndipo ta ŵateŵeti ŵinu tili ŵakuŵeta ng'ombe.”

⁵Ndiposo ŵakati, “Usange tasanga uchizi panthazi pinu, mutipe charu ichi ta ŵateŵeti ŵinu kuti chiŵe chithu. Mureke kutitorera ku sirya lira la Yorodani.”

⁶Kweni Mozesi wakafumba ŵana ŵa Gadi na ŵana ŵa Rubeni kuti, “Kasi imwe muti mukhare pano apo ŵabali ŵinu ŵakuruta ku nkhondo?

⁷Nchifukwa uli mukukhumba kugongoweska mitima ya ŵaIsraele kuti ŵareke kwambukira ku charu icho FUMU yili kuŵapa.

⁸Ŵawiskemwekuru nawo ŵakachita ntheura para nkhatuma ŵanthu kufuma ku Kadeshi Baraneya kuya kaskora charu.

⁹Chifukwa para ŵakati ŵaruta ku Dambo la Eshikolo, na kuwona charu, wakagongoweska mitima ya ŵaIsraele kuti ŵareke kwambukira ku charu icho FUMU yikaŵapa.

¹⁰Sono pa zuŵa lira FUMU yikakwiya chomene ndipo yikarapa, yikati,

¹¹‘Nadi kulije na yumoza wa ŵanthu awo ŵakafuma mu Eguputo, ŵa virimika 20 na ŵakujumphirapo, ŵeneawo ŵamkuwona charu icho nkhupangana kupereka kwa Abrahamu, Yisake na Yakhobe pakuti ŵalije kundirondezga na mtima wose.

¹²Palije na yumoza uyo wamkuchiwona charu chira, kupatulako Kalebu mwana wa Yefune, muKenizi na Yoshuwa, mwana wa Nuni, chifukwa ndiwo ŵakarondezga FUMU na mtima wose.’

¹³FUMU yikaŵakwiyira chomene ŵaIsraele ndipo yikaŵayingiska mu mapopa, virimika 40, mpaka muwiro wose ura ukachita uheni panthazi pa FUMU ukamara petu.

¹⁴Sono imwe mwatora malo gha ŵawiskemwekuru, mphapu ya ŵanthu ŵakwananga, kuti murutilire kukuzgirako ukari wa FUMU pa ŵaIsraele.

¹⁵Pakuti para mwareka kuyirondezga, nayo yizamkuŵarekaso ŵanthu mu mapopa, ndipo imwe kuti mukomeske ŵanthu wose aŵa.”

¹⁶Penepapo iwo ŵakiza kwa Mozesi ŵakati, “Ise tikukhumba kuti tizenge vitupa vya mberere na mbuzi zithu, ndiposo na misumba ya ŵana ŵithu.

¹⁷Kweni ise titi titore vyakurwera nkhondo na kuŵadangirira ŵaIsraele mpaka tikaŵafiske ku malo ghawo. Ŵana ŵithu ŵati ŵakharenge mu misumba yakukhozgeka, chifukwa chakopa ŵenecharu.

¹⁸Tizamkuwerera ku kwithu chara mpaka muIsraele waliyose waŵe na chiharo chakhe.

¹⁹Ise kuti tamkukhara pamoza nawo mu charu cha sirya lira la Yorodani panyakhe kunthazi kwakhe chara, pakuti ise tapika chiharo sirya lino la Yorodani, uko nkhu mafumiro gha dazi.”

²⁰Ntheura Mozesi wakati kwa iwo, “Muchite nga ndi umo mwayowoyera. Mutore vyakurwera nkhondo vyinu na kuruta ku nkhondo panthazi pa FUMU.

²¹Waliyose wa imwe watore vyakurwera nkhondo na kwambuka Yorodani panthazi pa FUMU, mpaka FUMU yiŵachimbizge ŵarwani panthazi pakhe,

²²mpaka charu chithereskeke panthazi pa FUMU. Penepapo pamanyuma pakhe ndipo mwamkuwerako na kuŵaso ŵanangwa na ŵambula mrandu kwa FUMU na ku ŵaIsraele. Ndipo charu ichi chamkuŵa chinu panthazi pa FUMU.

²³Kweni usange mwareka kuchita ntheura, mwanangira FUMU. Manyani kuti kwananga kwinu kwamkumurondezgani.

²⁴Zengani misumba ya ŵana ŵinu, na vitupa vya mberere zinu, kweni muchite nadi icho mukapangana.”

²⁵Ŵana ŵa Gadi na ŵana ŵa Rubeni ŵakati kwa Mozesi, “Taŵateŵeti ŵinu titi tichite nga ndi umo sekuru ŵithu ŵalangulira.

²⁶Ŵana ŵithu na ŵawoli ŵithu, wati ŵakharenge mu misumba ya Gileyadi pamoza na mberere zithu na ng'ombe zithu wuwo.

²⁷Kweni ta ŵateŵeti ŵinu titi tambukenge, waliyose wayeghenge vyakurwera nkhondo panthazi pa FUMU, nga ndi umo imwe sekuru withu mwalangulira.”

²⁸Ntheura makani gha ŵanthu aŵa Mozesi wakaphalira Eleyazara musofi na Yoshuwa mwana wa Nuni, ndiposo na ŵararaŵarara ŵa mafuko gha ŵaIsraele.

²⁹Mozesi wakati kwa iwo, “Mukati mu ŵana ŵa Gadi na ŵana ŵa Rubeni munthu waliyose uyo wayegha vyakurwera nkhondo kuya karwa nkhondo panthazi pa FUMU, usange wambukenge namwe ku sirya la Yorodani, ndiposo usange ŵathereska charu icho chili panthazi pinu, mukaperekenge charu cha Gileyadi kuŵa chiharo chawo.

³⁰Kweni usange ŵalije kuyegha vyakurwera nkhondo na kwambuka pamoza namwe, wamkuŵa na chiharo mukati mwinu mu charu cha Kanani.”

³¹Ndipo ŵana ŵa Gadi na ŵana ŵa Rubeni ŵakazgora kuti, “Ise ta ŵateŵeti ŵakhe tamkuchita nga ndi umo FUMU yatiphalirira.

³²Titi tambukenge uku tayegha vyakurwera nkhondo panthazi pa FUMU na kunjira mu charu cha Kanani, mwakuti vyuma vya chiharo chithu sirya linyakhe la mronga wa Yorodani vyamkuŵa vyithu.”

³³Ntheura Mozesi wakapereka ku ŵana ŵa Gadi na ku ŵana ŵa Rubeni ndiposo na ku fuko la kusazgikana wa Manase mwana wa Yosefe, charu cha Sihoni, karonga wa ŵaAmori na charu cha Ogi, karonga wa ku Bashani, charu chose pamoza na misumba na vigaŵa vyakhe ndiko kuti misumba yose ya mu charu chose chira.

³⁴Ŵana ŵa Gadi ŵakazenga misumba ya Diboni, Ataroti, Aroyere,

³⁵Ataroti Shofani na Yazere, Yogibeha,

³⁶Beti Nimura na Beti Harani. Misumba yikaŵa na malinga. Ŵakazengaso vitupa vya mberere na mbuzi.

³⁷Ŵana ŵa Rubeni ŵakazenga misumba ya Heshiboni, Eleyale, Kiriyatayimu,

³⁸Nebo na Baala Meyoni (zina ili liri kusinthika) na Sibima. Misumba yeneiyo ŵakazenga ŵakathya mazina ghanyakhe.

³⁹Ŵana ŵa mtundu wa Makiri, mwana wa Manase, ŵakaruta ku chigaŵa cha Gileyadi na kuchipoka ndipo ŵakaŵafumyamo ŵaAmori awo ŵakharanga mwenemumo.

⁴⁰Mozesi wakapereka chigaŵa cha Gileyadi kwa Makiri mwana wa Manase, ndipo Makiri wakakhara mwenemumo.

⁴¹Yayiri mwana wa Manase wakaruta na kupoka vikaya vyawo na kuvithya Havoti Yayiri.

⁴²Noba wakaruta kuya kapereka msumba wa Kenati na vikaya vyakhe, ndipo wakawuthya Noba, kufuma ku zina lakhe.