Read new_tumbuka_bible Kupenda 33 Bible Online

Kupenda 33 - new_tumbuka_bible bible

Kupenda 33

¹Ivi ndivyo viwono vya ŵaIsraele para ŵakafumanga mu charu cha Eguputo kwakuyana na mipingo yawo pasi pa urongozgi wa Mozesi na Aroni.

²Mozesi wakalemba malo umo ŵakambiranga ma ulendo wawo chiwono na chiwono, kwakuyana na umo FUMU yikaŵalangulira. Viwono vyawo kwakuyana na malo ghakwambira maulendo vikaŵa ntheura.

³Ŵakawuka ku Ramesesi pa zuŵa la 15 mu mwezi wakwamba. Na machero ghakhe pamanyuma pa zuŵa la chiphikiro cha Paska, ŵaIsraele ŵakafuma na kuvivya chomene panthazi pa ŵaEguputo wose.

⁴Pa nyengo iyi ndiko kuti ŵaEguputo ŵakasunganga vitanda vya ŵana ŵawo ŵa uŵere, ŵeneawo FUMU yikaŵakoma mukati mwawo. Pakuti FUMU yikeruzga na ŵachiuta ŵawo wuwo.

⁵Ntheura ŵaIsraele ŵakawuka ulendo wawo kufuma ku Ramesesi, ndipo ŵakazenga misasa ku Sukoti.

⁶Ŵakawukako ku Sukoti ndipo ŵakazenga misasa ku Etamu, msumba uwo uli mu mphepete mwa mapopa.

⁷Ŵakawukako ku Etamu, ndipo ŵakawereraso ku Pihahiroti, msumba uwo uli ku mafumiro gha dazi kwa Baala Zefoni. Wakazenga misasa yawo pambere ŵandafike ku Migidoli.

⁸Ŵakawukapo pafupi na Pihahiroti, ŵakambuka nyanja na kunjira mu mapopa. Ŵakenda mazuŵa ghatatu mu mapopa gha Etamu, ndipo ŵakazenga misasa yawo ku Mara.

⁹Ŵakawukako ku Mara, ndipo ŵakafika ku Elimu. Ku Elimu kura kukaŵa visimi 12 na makuni gha mikama 70, ndipo ŵakazenga misasa kwenekura.

¹⁰Ŵakawukako ku Elimu na kuzenga misasa yawo mu mphepete mwa Nyanja ya Matete.

¹¹Ŵakawukako ku Nyanja ya Matete ndipo ŵakazenga misasa mu mapopa gha Sini.

¹²Ŵakawukamo mu mapopa gha Sini, na kuzenga misasa yawo ku Dofika.

¹³Ŵakawukako ku Dofika, ndipo ŵakazenga misasa yawo ku Alushi.

¹⁴Ŵakawukako ku Alushi, na kuzenga misasa yawo ku Refidimu, kwenekuko kukaŵavye maji kuti ŵanthu ŵamwe.

¹⁵Ŵakafumako ku Refidimu, ndipo ŵakazenga misasa yawo mu mapopa gha Sinayi.

¹⁶Ŵakawukamo mu mapopa gha Sinayi, ndipo ŵakazenga misasa yawo ku Kibiroti Hataava.

¹⁷Ŵakawukako ku Kibiroti Hataava, ndipo ŵakazenga misasa yawo ku Hazeroti,

¹⁸ŵakawukako ku Hazeroti, ndipo wakazenga misasa yawo ku Ritima.

¹⁹Ŵakawukako ku Ritima, ndipo wakazenga misasa yawo ku Rimoni Perezi.

²⁰Ŵakawukako ku Rimoni Perezi, ndipo wakazenga misasa yawo ku Libina.

²¹Ŵakawukako ku Libina, ndipo ŵakazenga misasa yawo ku Risa.

²²Ŵakawukako ku Risa, ndipo ŵakazenga misasa yawo ku Kehelata.

²³Ŵakawukako ku Kehelata, ndipo wakazenga misasa yawo ku Phiri la Shefere.

²⁴Ŵakawukako ku Phiri la Shefere, ndipo ŵakazenga misasa yawo ku Harada.

²⁵Ŵakawukako ku Harada, ndipo ŵakazenga misasa yawo ku Makeloti.

²⁶Ŵakawukako ku Makeloti ndipo ŵakazenga misasa yawo ku Tahati.

²⁷Ŵakawukako ku Tahati, ndipo ŵakazenga misasa yawo ku Tera.

²⁸Ŵakawukako ku Tera, ndipo ŵakazenga misasa yawo ku Mitika.

²⁹Ŵakawukako ku Mitika, ndipo ŵakazenga misasa yawo ku Hashimona.

³⁰Ŵakawukako ku Hashimona, ndipo ŵakazenga misasa yawo ku Mosera.

³¹Ŵakawukako ku Mosera, ndipo ŵakazenga ku misasa yawo ku Bene Yaakani.

³²Ŵakawukako ku Bene Yaakani, ndipo ŵakazenga misasa yawo ku Horo Hagidigadi.

³³Ŵakawukako ku Horo Hagidigadi, ndipo ŵakazenga misasa yawo ku Yotibata.

³⁴Ŵakawukako ku Yotibata, ndipo ŵakazenga misasa yawo ku Aburona.

³⁵Ŵakawukako ku Aburona, ndipo ŵakazenga misasa yawo ku Eziyoni Gebere.

³⁶Ŵakawukako ku Eziyoni Gebere, ndipo ŵakazenga misasa yawo mu mapopa gha Zini (ndiko kuti Kadeshi).

³⁷Ŵakawukako ku Kadeshi, ndipo ŵakazenga misasa yawo ku Phiri la Horo, mu mphepete mwa charu cha Edomu.

³⁸Ndipo musofi Aroni wakakwera Phiri la Horo nga ndi umo FUMU yikamulangulira. Iyo wakafwira kwenekura mu chirimika cha 40 pa zuŵa lakudanga mu mwezi wa chinkhonde para ŵaIsraele ŵakati ŵafuma mu charu cha Eguputo.

³⁹Aroni wakaŵa wa virimika 123, apo wakafwiranga pa Phiri la Horo.

⁴⁰Apa ndipo karonga wa ku Aradi muKanani, leneilo likakharanga mu chigaŵa cha ku mwera mu charu cha Kanani, likapulika za kwiza kwa ŵaIsraele.

⁴¹Pamanyuma pakhe ŵakawukako ku Phiri la Horo ndipo ŵakazenga misasa yawo ku Zalimona.

⁴²Ŵakawukako ku Zalimona ndipo ŵakazenga misasa yawo ku Punoni.

⁴³Ŵakawukako ku Punoni, ndipo ŵakazenga misasa yawo ku Oboti.

⁴⁴Ŵakawukako ku Oboti, ndipo ŵakazenga misasa yawo ku Iye Abarimu, mu charu cha Mowabu.

⁴⁵Ŵakawukako ku Iyimu, ndipo ŵakazenga misasa yawo ku Diboni Gadi.

⁴⁶Ŵakawukako ku Diboni Gadi, ndipo ŵakazenga misasa yawo ku Alimoni Dibulatayimu.

⁴⁷Ŵakawukako ku Alimoni Dibulatayimu, ndipo ŵakazenga misasa yawo ku mapiri gha Abarimu, pambere ŵandafike ku Nebo.

⁴⁸Ŵakawukako ku mapiri gha Abarimu, ndipo ŵakazenga misasa yawo mu vidika vya Mowabu pa mronga wa Yorodani kuthyana na msumba wa Yeriko.

⁴⁹Ŵakazenga misasa yawo pafupi na Yorodani kufuma ku Beti Yeshimoti kuya kafika ku Abelu Shitimu mu vidika vya Mowabu.

⁵⁰Ndipo FUMU yikamuphalira Mozesi mu vidika vya Mowabu mu mphepete mwa mronga wa Yorodani kuthyana na msumba wa Yeriko yikati,

⁵¹“Phalira ŵaIsraele kuti, ‘Para mwamkwambuka mronga wa Yorodani na kunjira mu charu cha Kanani,

⁵²mukaŵachimbizge ŵenecharu wose awo mwamkuŵasanga. Mukaparanye vikozgo vyawo vyose vya mawe ndiposo na vikozgo vyawo vyose vyakusongonora. Mukabwangandule malo ghawo ghose gha pachanya ghakusoperako.

⁵³Mukapoke charu na kukharamo, pakuti ndamupani kuti chiŵe chinu.

⁵⁴Mwamkupoka charu kuti chiŵe chiharo chinu pakuchita mphenduzgo kwakuyana na mbumba zinu. Fuko likuru likaŵe na chigaŵa chikuru, ndipo fuko lichoko yikaŵe na chigaŵa chichoko. Para mphenduzgo yamuwira munthu charu chira chiŵenge chakhe. Mwamkupoka kwakuyana na fuko la ŵawiskemwekuru.

⁵⁵Kweni para mwareka kuŵachimbizgamo ŵenecharu, penepapo awo mwaŵazomerezga kuti ŵakhalire ŵamkuŵa nga ndi kapanthi mu maso ghinu ndiposo nga ndi minga mu mathupi ghinu. Ŵamkumusuzgani mu charu mwenemumo mukukhara.

⁵⁶Sono ndamkumuchitirani nga ndi umo nkhaghanaghanira kuŵachitira ŵanthu aŵa.’ ”