Read new_tumbuka_bible Kupenda 34 Bible Online

Kupenda 34 - new_tumbuka_bible bible

Kupenda 34

¹FUMU yikati kwa Mozesi,

²“Uŵalangure ŵaIsraele kuti, para mwayakanjira mu charu cha Kanani (ichi ndicho charu cheneicho chamkupika kwa imwe nga nchiharo, charu chose cha ŵaKanani).

³Dera la ku mwera likwambira ku mapopa gha ku Zini mu mphepete mwa charu cha Edomu, kufuma ku nyanja ya muchere na kufika ku mafumiro gha dazi.

⁴Mphaka yinu yamkuzgomba ku mwera kwa chikwera cha Akirabimu na kwambukira ku mapopa gha Zini, ndipo umaliro wakhe wamkufika na ku Kadeshi Baraneya. Ndiposo yamkufika ku Hazara Adara, kufuma apo yamkufika ku Azimoni.

⁵Mphaka yamkuzgomba pa Azimoni kukafika ku mronga wa ku Eguputo, na kuya kagota ku nyanja.

⁶“Nyanja Yikuru ndiyo yamkuŵa mphaka yinu ku manjiliro gha dazi.

⁷“Ku mpoto mphaka yinu yamkuŵa ntheura: kufuma ku Nyanja Yikuru mphaka yinu yamkufika ku Phiri la Horo.

⁸Kufuma ku Phiri la Horo, mphaka yinu yamkufika pa manjiliro gha mronga wa Hamati, ndipo yamkugota ku Zedadi.

⁹Sono mphaka yamkulitilira na kuya ku Zifuroni, ndipo yamkugota ku Hazara Enani. Iyi ndiyo yamkuŵa mphaka yinu ya ku mpoto.

¹⁰“Imwe mwamkunwekera mphaka kufuma ku Hazara Enani ku mafumiro gha dazi kuya kafika ku Shefamu.

¹¹Mphaka yamkukhira kufuma ku Shefamu na kuya kafika ku Ribula, ku mafumiro gha dazi gha Ayini. Mphaka yira yamkukhira na kufika ku Nyanja ya Kinereti iyo yili ku mafumiro gha dazi.

¹²Kufuma apo yamkurutilira mpaka ku mronga wa Yorodani, ndipo yamkugota mu Nyanja ya Muchere. “Ichi ndicho chamkuŵa charu chinu na zimphaka zakhe zose zingirizge.”

¹³Mozesi wakaŵalangula ŵaIsraele wakati, “Ichi ndicho charu cheneicho mwamkuchihara pakuchita mphenduzgo, cheneicho FUMU yalangula kupereka ku mafuko ghankhonde na ghanayi ndiposo na ku fuko lakugaŵikana pakati.

¹⁴Fuko la ŵana ŵa Rubeni kwakuyana na nyumba za ŵawiskewokuru na fuko la ŵana ŵa Gadi kwakuyana na nyumba za ŵawiskewokuru liri kupoka chiharo chawo, ndiposo na hafu wa fuko la Manase.

¹⁵Mafuko ghaŵiri agha ndiposo na fuko lakugaŵikana paŵiri ghali kupoka chiharo chawo sirya linyakhe la mronga wa Yorodani, kuthyana na msumba wa Yeriko ku dera la ku mafumiro gha dazi.”

¹⁶FUMU yikati kwa Mozesi,

¹⁷“Mazina gha ŵanthu awo ŵamkumugaŵirani charu icho mwamkuhara ndi musofi Eleyazara na Yoshuwa mwana wa Nuni.

¹⁸Mukatorenge murongozgi yumoza pa fuko lirilose pakugaŵa charu kuŵa chiharo.”

¹⁹Mazina gha ŵanthu ndi agha: fuko la Yuda, mukatore Kalebu mwana wa Yefune.

²⁰Mu fuko la Simiyoni, mukatitore Shemuyele mwana wa Amihudi.

²¹Mu fuko la Benjamini, mukatore Elidadi mwana wa Kisiloni.

²²Mu fuko la Dani mukatore Buki mwana wa Yogili.

²³Mu fuko la Yosefe, mu mbumba ya Manase mukatore Haniyele mwana wa efodi.

²⁴Mu fuko la ŵana ŵa Efurayimu, mukatoremo Kemuwele mwana wa Shifutani.

²⁵Mu fuko la ŵana ŵa Zebuloni mukatoremo Elizafani mwana wa Parinaki.

²⁶Mu fuko la ŵana ŵa Isakara, mukatoremo Palitiyele mwana wa Azani.

²⁷Mu fuko la ŵana ŵa Ashere, mukatoremo Ahihudi mwana wa Shelonami.

²⁸Mu fuko la ŵana ŵa Nafutali mukatoremo Pedahele mwana wa Amihudi.

²⁹Aŵa ndiwo ŵanthu ŵeneawo FUMU yikaŵalangula kuti ŵaŵagaŵire ŵaIsraele charu cha Kanani.