Read new_tumbuka_bible Kupenda 35 Bible Online

Kupenda 35 - new_tumbuka_bible bible

Kupenda 35

¹FUMU yikamuphalira Mozesi mu vidika vya Mowabu pafupi na mronga wa Yorodani, kuthyana na msumba wa Yeriko kuti,

²“Uŵalangure ŵaIsraele kuti kufuma mu chiharo chawo, ŵakaperekenge ku ŵaLevi misumba yakukharamo ndiposo na maluhari kuzingirizga misumba.

³Misumba yira yamkuŵa yawo kuti ŵakharengemo, ndiposo maluhari ghawo ghamkuŵa ghakuliskiramo ng'ombe zawo, vyakuŵeta vyawo na vinyama vyawo vyose.

⁴Maluhari gha misumba yira, gheneagho mwamkughapereka ku ŵaLevi, ghamkutandazgika kuzingirizga kosekose mamita 900 kufuma ku linga na kuya kuwaro.

⁵Mukapime kuwaro kwa msumba, ku mafumiro gha dazi mamita 900, ku mwera mamita 900, ku manjiliro gha dazi mamita 900, ku mpoto mamita 900, ndipo msumba ura ukaŵenge pakati. Malo agha ndigho ghakaŵenge maluhari gha misumba yawo.

⁶ŴaLevi mwamkuŵapa misumba yakuphokweramo yinkhonde na umoza, mwenemumo mukazomerezgenge kuchimbiliramo uyo wakoma munthu mwasoka. Kusazgirapo pa misumba iyi, mwamkuŵapaso misumba yinyakhe 42.

⁷Misumba yose iyo mwamkupereka ku ŵaLevi yikaŵe 48, pamoza na maluhari ghakhe.

⁸Ndipo misumba iyo mwamkuŵapa kufuma mu chiharo cha ŵaIsraele, mukatorengeko misumba yinandi kufuma mu mafuko agho ghali na misumba yinandi, ndipo ku mafuko agho ghali na misumba yichoko mukatorengeko misumba ku ŵaLevi kwakuyana na chiharo icho ŵali nacho.”

⁹Sono FUMU yikamuphalira Mozesi kuti,

¹⁰“Uŵaphalire ŵaIsraele kuti: Para mwambuka mronga wa Yorodani na kunjira mu charu cha Kanani,

¹¹mukapatulenge misumba iyo yamkuŵa yakuphokweramo, mwakuti munthu uyo wakoma munyakhe mwasoka wachimbilirengemo.

¹²Misumba yira yamkuŵa malo ghakuphokweramo pakumuchimbira uyo wakuwezgera nduzga, mwakuti uyo wakoma munthu wareke kukomeka mpaka wimilire panthazi pa wumba na kweruzgika.

¹³Ndiposo misumba iyo muperekenge yiŵenge misumba yinkhonde na umoza yakuphokweramo imwe.

¹⁴Mukapereke misumba yitatu sirya linyakhe la mronga wa Yorodani na yinyakheso yitatu mu charu cha Kanani, kuŵa misumba yakuphokweramo.

¹⁵Misumba yinkhonde na umoza iyi yikaŵe misumba yakuphokweramo ŵaIsraele, na ŵalendo ndiposo na awo ŵakupanjwa mukati mwawo mwakuti yose uyo wakoma munthu mwasoka wachimbilirengemo.

¹⁶“Kweni usange munthu wamutimba munyakhe na chisulo ndipo wakufwa, munthu yura nchigeŵenga. Ndipo chigeŵenga chikwenera kukomeka.

¹⁷Usange munthu yura wamuswa munyakhe na libwe ilo lingakoma munthu, ndipo munthu yura wakufwa, munthu uyo nchigeŵenga. Ndipo chigeŵenga chikwenera kukomeka.

¹⁸Panji usange wamutimba munyakhe na ndodo iyo yingamanya kukoma, ndipo munthu yura wakufwa, munthu uyo nayo nchigeŵenga. Ndipo chigeŵenga chikwenera kukomeka.

¹⁹Munthu wakuwezgera nduzga mu malo gha munthu uyo wafwa ndiyo wati wachikomenge chigeŵenga chira. Para wakumana nacho, wachikomenge waka.

²⁰“Usange munthu wagwaza munyakhe chifukwa cha tinkho, panji wamuponyera kufumira uko wabisama pakumukhazga ndipo wakufwa munthu wakukhazgika,

²¹panji mu tinkho wamutimba na fayiti na kumuwiskira pasi, ndipo wakufwa, penepapo uyo wamutimba wati wakomeke. Iyo nchigeŵenga. Wakuwezgera nduzga pa munthu wakuthiska ndopa ndiyo wati wamukome, para wakukumana nayo.

²²“Kweni usange wamukanchizga munthu mwangozi kwambula kuti pali chimphindikwa panji wamuponyera chinthu kwambula kumukhazga,

²³panji languŵa libwe ilo lingamanya kukoma munthu ndipo wakamuponyera kwambula kumuwona, ndipo munthu yura wakufwa, nanga kuti wanguŵa murwani wakhe chara, ndiposo kuti wakapukwa kumupweteka chara.

²⁴Penepapo mpingo uti uyeruzge pakati pa munthu wakukoma munyakhe na uyo wakuwezgera nduzga pa munthu wakuthiska ndopa, kwakulingana na marango agha.

²⁵Uyo wakoma munyakhe mpingo ndiwo uti umuthaske kwa uyo wakuwezgera nduzga pa wakuthiska ndopa, ndipo mpingo ndiwo uti umuwezgereso ku msumba wakuphokweramo, mwenemumo wakachimbiliramo pakudanga. Wamkukhara mwenemumo mpaka pa nyengo ya kufwira musofi mukuru, mweneuyo wakaphakazgika mafuta ghakupatulika.

²⁶Kweni usange munthu yura wakoma munyakhe wakujumpha mphaka za msumba wakhe wakuphokweramo, mwenemumo wakachimbilirira,

²⁷ndipo uyo wakuwezgera nduzga pa wakuthiska ndopa, wamusanga kuwaro kwa msumba wakhe wakuphokweramo, wakuwezgera nduzga pa wakuthiska ndopa yura wamukome. Iyo wati waŵavye mrandu wakuthiska ndopa.

²⁸Chifukwa munthu yura wakwenera kukhara mwenemumo mu msumba wakuphokweramo mpaka musofi mukuru wafwe. Kweni pamanyuma pa nyifwa ya musofi mukuru, wakukoma munthu yura wangawerera ku kwakhe.

²⁹Mu miwiro yinu yose agha ndigho ghaŵenge marango mukati mwinu, mose umo mukukhara.

³⁰“Yose uyo wakukoma munyakhe, usange nchigeŵenga chikomeke para ŵanthu ŵapereka ukaboni. Kweni munthu wareke kukomeka usange munthu yumoza pera ndiyo wapereka ukaboni.

³¹Ndiposo mureke kupereka chakuwombolera pa umoyo wa chigeŵenga, cheneicho chili na mrandu wakukoma. Kweni munthu yura wakwenera kukomeka.

³²Mureke kupoka chakuwombolera kufuma kwa uyo wakuchimbilira ku msumba wakuphokweramo, kuti wawerere na kuya kakhara ku kwakhe pambere musofi mukuru wandafwe.

³³Charu icho mukukharamo mureke kuchikazuzga. Ndopa zikukazuzga charu, ndipo palije mphepiska iyo yingachitika mu charu, chifukwa cha ndopa izo zathikirapo, kweni na ndopa za mweneuyo wakathiska ndopa zira.

³⁴Charu icho mukukharamo mureke kuchikazuzga, charu cheneicho nkhukhara mukati mwakhe. Pakuti ine FUMU nkhukhara mukati mu ŵaIsraele.”