Read new_tumbuka_bible Kupenda 36 Bible Online

Kupenda 36 - new_tumbuka_bible bible

Kupenda 36

¹Ŵarara ŵa nyumba za ŵawiskewokuru za mbumba za ŵana ŵa Gileyadi mwana wa Makiri, mwana wa Manase wa mu nyumba ya Yosefe, ŵakiza kwa Mozesi apo ŵarara na ŵarongozgi ŵa nyumba za ŵaIsraele ŵakaŵa papo.

²Iwo ŵakati, “FUMU yikamulangulani imwe sekuru wane, kupereka charu kuŵa chiharo cha ŵaIsraele pakuchita mphenduzgo. Ndiposo imwe sekuru withu mukalangurika na FUMU kupereka ku ŵana wakhe ŵanakazi chiharo cha Zelofehadi mubali withu.

³Kweni usange ŵakutengwa ku yumoza uyo ngwa fuko la Israele, penepapo chiharo chawo chiti chiwuskengeko ku chiharo cha ŵasekuru, na kusazgikirako ku chiharo cha fuko ilo ndawo. Ntheura chiti chiwuskikeko ku mphenduzgo ya chiharo chithu.

⁴Ndipo usange nyengo ya chikondwerero cha ŵaIsraele yafika, penepapo chiharo chawo chiti chisazgikireko ku fuko ilo ndawo. Chiharo chira chiti chiwuskikeko ku chiharo cha fuko la ŵasekuru.”

⁵Penepapo Mozesi wakalangula ŵaIsraele kwakuyana na mazgu gha FUMU, wakati, “Fuko la Yosefe likuneneska.

⁶Ivyo FUMU yikulangula ŵana ŵanakazi ŵa Zelofehadi ndi ivi: Rekani ŵatengwe kwa uyo ŵamutemwa. Kweni kwa awo mba mu mbumba ya fuko la ŵawiskewokuru.

⁷Chiharo cha ŵaIsraele kuti chiti chifumiskikengeko chara ku fuko limoza na kuya ku linyakhe. Munthu yose wa ŵaIsraele wati wademerere ku chiharo cha fuko la ŵasekuru ŵakhe.

⁸Mwanakazi waliyose mweneuyo wali na chiharo cha fuko la Israele, wati waŵenge muwoli wa ŵaIsraele, wati waŵenge muwoli wa yumoza wa mu mbumba za fuko la ŵawiskewokuru, mwakuti munthu yose mu ŵaIsraele waŵe nacho chiharo cha ŵawiske.

⁹Ntheura paŵavye chiharo icho chiti chiwuskikeko ku fuko limoza na kuya ku linyakhe. Pakuti fuko lirilose wa ŵaIsraele uti udemerere ku chiharo chakhe na chakhe.”

¹⁰Ŵana ŵanakazi ŵa Zelofehadi ŵakachita kwakulingana na umo FUMU yikamulangulira Mozesi.

¹¹Pakuti Mala, Tiriza, Hogila, Milika, na Nowa ŵana ŵanakazi ŵa Zelofehadi ŵakatengwa ku ŵanarume awo ŵakaŵa ŵabali ŵa wiskewo.

¹²Iwo ŵakatengwa mu mbumba za ŵana ŵa Manase mwana wa Yosefe, ndipo chiharo chawo chikakhalirira mu fuko la ŵawiskewokuru.

¹³Agha ndigho marango na malangulo gheneagho FUMU yikamulangula Mozesi kuŵaphalira ŵaIsraele mu vidika vya Mowabu, pafupi na mronga wa Yorodani kuthyana na msumba wa Yeriko.