Read new_tumbuka_bible Kupenda 4 Bible Online

Kupenda 4 - new_tumbuka_bible bible

Kupenda 4

²“Mupende unandi wa ŵaKohati mukati mu ŵaLevi, kwakuyana na mbumba zawo na nyumba za ŵawiskewokuru.

³Mupende ŵanarume kwamba ŵa virimika 30 mpaka 50, wose awo ŵangamanya kuteŵeta mlimo mu Chihema Chakupatulika.”

⁴Mlimo uwo ŵaKohati ŵakwenera kuchita mu Chihema Chakukumaniranamo ngwa kuti wapwererere vinthu vyakupatulika nkhanira.

⁵Para pa ŵakusamapo msasa, Aroni na ŵana ŵakhe ndiwo ŵati ŵanjirenge kuya kakhizga chisalu chakuchinga na kubenekerera nacho Bokosi la Phangano.

⁶Pamanyuma ŵabenekererepo chikumba cha mbuzi, ndipo pachanya ŵatandike salu iyo nja bululu yose, ndipo ŵati ŵanjizgemo michiko yakhe.

⁷Sono pachanya pa thebulu la Chingwa cha Uŵapo wa Chiuta, ŵatandikepo salu ya bululu, na kuŵikapo mbale, ŵadira ŵa vyakununkhira, mabakule, na nkhondo za sembe ya vyakumwa. Vingwa vyakuperekeka zuŵa na zuŵa navyo viti viŵenge penepapo.

⁸Sono pachanya pa ivi ŵatandikengepo salu yiswesi, na kubenekererapo na chikumba cha mbuzi, ndipo ŵati wanjizgemo michiko yakhe.

⁹Ŵatorenge salu iyo nja bululu na kubenekerera chakuŵikapo nyali pamoza na nyali zakhe, mbano zakhe, mbale zisani zakuyegherapo ndiposo na viteŵetero vyose vyakusungiramo mafuta.

¹⁰Ndipo ŵachiŵike pamoza na viteŵetero vyakhe vyose mu chibenekerero, na chikumba cha mbuzi na kuchiŵika pa chakuyeghera.

¹¹Pa jochero la golide ŵatandikengepo salu ya bululu, na kubenekererapo chikumba cha mbuzi, ndipo ŵati ŵanjizgemo michiko yakhe.

¹²Ŵatorenge viteŵetero vyose vya milimo ya mu Chihema Chakupatulika, na kuvivungirizga mu salu ya bululu, ndipo ŵavibenekererenge na chikumba cha mbuzi, na kuviŵika pa chakuyeghera.

¹³Ŵawuskepo vyoto pa jochero la mkuŵa na kutandikapo salu yichesamu pachanya pakhe.

¹⁴Ŵaŵikengepo viteŵetero vyose vya pa jochero ivyo ŵakuteŵetera navyo penepapo, nga ndi majonjo, foroko zakutorera nyama, vyakuyorera, mabeseni ndiposo na viteŵetero vyose vya pa jochero la sembe. Pa vyose ivyo wabenekererepo chikumba cha mbuzi, ndipo ŵati ŵanjizgemo michiko yakhe.

¹⁵Sono para Aroni na ŵana ŵakhe ŵamara kubenekerera Chihema Chakupatulika pamoza na viteŵetero vyose ndiposo para ŵanthu ŵakusama, pamanyuma pa ichi, ŵaKohati ŵati ŵayeghe vinthu ivi. Kweni ŵareke kukhwaska vinthu vyakupatulika, mzire ŵafwe. Vyeneivi ndivyo vya mu Chihema Chakukumaniranamo ivyo ŵana ŵa Kohati ŵakwenera kuyegha.

¹⁶Eleyazara mwana wa musofi Aroni wati wapwererenge mafuta ghakukozgera nyali, vyakununkhira vya sungu liweme, vyakupereka vya vyakurya ivyo vikuperekeka zuŵa na zuŵa, na mafuta ghakuphakazgira. Ndiposo iyo wati waŵenge mulaŵiliri wa Chihema chose na ivyo vili mukati mwakhe, na vya Chihema Chakupatulika na viteŵetero vyakhe.

¹⁷FUMU yikati kwa Mozesi na Aroni,

¹⁸“Muwoneskeske kuti ŵa mbumba za Kohati ŵareke kumaramo mu fuko la Levi.

¹⁹Kweni uchite nawo ntheura kuti ŵaŵe ŵamoyo na kureka kufwa para ŵakusenderera pafupi na vinthu vyakupatulika nkhanira. Aroni na ŵana ŵakhe ndiwo ŵati ŵanjirenge na kumugaŵira uyu na uyu mlimo wakhe na mphingo izo wayeghenge.

²⁰Kweni ŵaKohati ŵareke kunjiramo na kulaŵiska pa vinthu vyakupatulika nanga nkhwa kanyengo kachoko waka, mzire ŵafwe.”

²¹FUMU yikati kwa Mozesi,

²²kuti wapende na ŵaGerishoni wuwo, kwakuyana na mbumba zawo na nyumba za ŵawiskewokuru.

²³Uŵapende kwamba ŵa virimika 30 mpaka 50, wose awo ŵangamanya kunjira mlimo wakuteŵeta mu Chihema Chakukumaniranamo.

²⁴Ivyo mbumba za ŵaGerishoni, zikwenera kuchita, ndiposo ivyo zikwenera kuyeghanga ndi ivi.

²⁵Ŵayeghenge salu zakuchinga za Chihema Chakukumaniranamo, pamoza na chibenekerero chakhe, ndiposo na chikumba cha mbuzi chakubenekerera pachanya pakhe.

²⁶Ŵayeghengeso salu yakuchinga pa muryango wa Chihema Chakupatulika, ndiposo na vyakupayika vya pa baraza, na salu zakuchinga pa unjiliro wa pa baraza leneilo likuzingirizga Chihema, na jochero la sembe, na vingwe vyakhe, ndiposo na viteŵetero vyose vya mlimo yose iyo yikukhumbikwa kuti yichitike.

²⁷Milimo yose iyo ŵaGerishoni ŵakwenera kuchita yiti yirangurikenge na Aroni na ŵana ŵakhe. Iwo ŵalangurenge vyose ivyo, ŵati wayeghenge na vyose ivyo ŵati ŵachitenge. Iwe ndiwe uti uŵarongosorerenge mlimo wawo pa vyose ivyo ŵakwenera kuyegha.

²⁸Uwu ndiwo mlimo wa ŵaGerishoni mu Chihema Chakukumaniranamo ndipo Itamara, mwana wa musofi Aroni, ndiyo wati waŵenge mulaŵiliri wa mlimo wawo weneuwu.

²⁹Uŵapende ŵaMerari, mbumba na mbumba kwakuyana na nyumba za ŵawiskewokuru.

³⁰Kwamba ŵa virimika 30 mpaka 50, wose awo ŵangamanya kunjira mlimo wa kuteŵeta mu Chihema Chakukumaniranamo.

³¹Ivyo iwo ŵapika kuti ŵayeghe pa mlimo wawo mu Chihema Chakukumaniranamo ndi ivi: mafuremu gha mu Chihema Chakukumaniranamo, na mitambiko yakhe pamoza na mizati na vikongera vyakhe.

³²Ŵayegheso mizati iyo yikuzingirizga baraza, pamoza na vikongera vyawo, vikhomo, vingwe, pamoza na viteŵetero vyawo vyose ndiposo na vyose ivyo vikukhwaskana na ivi. Uti uŵapenge vinthu ivyo ŵakwenera kuyegha pakuzunura zina la chinthu.

³³Uwu ndiwo mlimo wa ŵaMerari, mlimo wawo wose mu Chihema Chakukumaniranamo, weneuwu mulaŵiliri wakhe ndi Itamara mwana wa musofi Aroni.

³⁴Sono Mozesi na Aroni pamoza na ŵarongozgi ŵa mpingo ŵakapenda ŵaKohati, mbumba na mbumba, kwakuyana na nyumba za ŵawiskewokuru.

³⁵Ŵakapenda kwamba ŵa virimika 30 mpaka 50, wose awo ŵakamanya kunjira mlimo wa kuteŵetera mu Chihema Chakukumaniranamo.

³⁶Awo ŵakapendeka kwakuyana na mbumba zawo ŵakaŵa 2,750.

³⁷Uwu ndiwo ukaŵa unandi wa ŵaKohati, wose awo ŵakateŵetanga mu Chihema Chakukumaniranamo, ŵeneawo Mozesi na Aroni ŵakapenda kwakuyana na umo FUMU yikamulangulira Mozesi.

³⁸Ŵakapendaso unandi wa ŵaGerishoni, mbumba na mbumba kwakuyana na nyumba za ŵawiskewokuru,

³⁹kwamba ŵa virimika 30 mpaka 50, wose awo ŵakakhumba kunjira mlimo wakuteŵeta mu Chihema Chakukumaniranamo.

⁴⁰Unandi wawo kwakuyana na mbumba zawo ndiposo na nyumba za ŵawiskewokuru ukaŵa 2,630.

⁴¹Uwu ndiwo ukaŵa unandi wa ŵaGerishoni, wose awo ŵakateŵetanga mu Chihema Chakukumaniranamo, ŵeneawo Mozesi na Aroni ŵakapenda kwakuyana na umo FUMU yikamulangulira Mozesi.

⁴²Ŵakapendaso unandi wa ŵaMerari, mbumba na mbumba, kwakuyana na nyumba za ŵawiskewokuru,

⁴³kwamba ŵa virimika 30 mpaka 50, wose awo ŵakamanya kunjira mlimo wa kuteŵeta mu Chihema Chakukumaniranamo.

⁴⁴Unandi wawo, kwakuyana na mbumba zawo, ukaŵa 2,300.

⁴⁵Aŵa ndiwo Mozesi na Aroni ŵakapenda mu mbumba za ŵaMerari, kwakuyana na umo FUMU yikamulangulira Mozesi.

⁴⁶Mozesi na Aroni pamoza na ŵarongozgi wa ŵaIsraele ŵakapenda ŵaLevi wose mbumba na mbumba kwakuyana na nyumba za ŵawiskewokuru.

⁴⁷Ŵakaŵapenda kwamba ŵa virimika 30 mpaka 50, wose awo ŵakamanya kuchita mlimo na kuyegha ŵakatundu mu Chihema Chakukumaniranamo.

⁴⁸Awo ŵakapendeka mwa iwo ŵakaŵa 8,580.

⁴⁹Ŵanthu ŵara ŵakasankhika kuti ŵanyakhe ŵachitenge mlimo wa kuteŵeta ndipo ŵanyakhe ŵayeghenge ŵakatundu kwakuyana na umo FUMU yikamulangulira Mozesi. Ntheura ndimo Mozesi wakapendera ŵanthu nga ndi umo FUMU yikamulangulira.