Read new_tumbuka_bible Kupenda 5 Bible Online

Kupenda 5 - new_tumbuka_bible bible

Kupenda 5

¹FUMU yikamuphalira Mozesi kuti,

²“Uŵalangure ŵaIsraele kuti ŵamufumiskire kuwaro kwa msasa yose uyo ngwa vyoni, yose uyo wali na nthenda ya kusurura, ndiposo na yose uyo ngwambula kuphotoka chifukwa chakukhwaska chitanda.

³Muŵafumiskemo ŵanthu wose ŵa ntheura, ŵanarume na ŵanakazi. Muŵafumiskire kuwaro kwa msasa, mwakuti ŵareke kukazuzga msasa wawo mwenemumo ine nkhukhara.”

⁴ŴaIsraele ŵakachita ntheura. Ŵakaŵa fumiskira kuwaro kwa msasa nga ndi umo FUMU yikayowoyera kwa Mozesi.

⁵FUMU yikayowoya kwa Mozesi kuti,

⁶“Uŵaphalire ŵaIsraele kuti, ‘Para mwanarume panji mwanakazi wanangira munyakhe mwakuti munthu munyakhe yura wakuŵa wambula kugomezgeka kwa FUMU, wati waŵenge na mrandu,

⁷ndipo wakwenera kuzomera kwananga uko wachita. Wakwenera kuphepiska pakulipirapo kwa msuma kwananga kwakhe ndipo wasazgirepo chigaŵa chimoza mu vigaŵa vinkhonde pa icho walipa, na kumupa uyo wakamunangira.

⁸Kweni usange munthu yura wakamunangira wali kufwa ndipo walije mubali mweneuyo wangapokako malipo ghara, ipo malipo ghara ghaperekeke kwa FUMU kuti ghaŵenge gha musofi, kusazgirapo mberere yanarume yakuphepiskira, mu yeneiyo musofi wakumuphepiskira munthu wakwananga yura.

⁹Chakupereka chose, na vinthu vyose vyakupatulika vya ŵaIsraele vyeneivyo ŵakwiza navyo kwa musofi viti viŵenge vyakhe.

¹⁰Vinthu vyakupatulika vya munthu waliyose viŵenge vyakhe. Kweni chose icho munthu waliyose wakupereka kwa musofi chiŵenge cha musofi.’ ”

¹¹FUMU yikayowoya kwa Mozesi kuti,

¹²“Uŵaphalire ŵaIsraele kuti usange muwoli wa munthu waliyose wananga na kumuleŵera mufumu wakhe,

¹³usange munthu yunji wagonana nayo mwanakazi yura, kweni mwanakazi wabisa ku mufumu wakhe, ndipo walije kumanyikwa nangauli iyo wajikazuzga, ndiposo kulije kaboni wakuyowoya na za iyo chifukwa kuti wakakoreka wakuchita uleŵe chara,

¹⁴ndipo usange mtima wa sanje wawuka mu mufumu wakhe, ndipo wakuchita sanje na muwoli wakhe, mweneuyo wajikazuzga, panyakhe usange mtima wa sanje wawuka mu mufumu wakhe, ndipo wakuchita sanje na muwoli wakhe, nangauli mwanakazi walije kujikazuzga,

¹⁵penepapo mwanarume wati wize na muwoli wakhe ku musofi, ndipo wati wamuperekere sembe kwakuyana na dango, iyo ndi chigaŵa cha khumi cha debe la ufu wa nyauti. Wareke kuthirapo mafuta panji kuŵikapo vyakununkhira, pakuti ndi sembe ya ufu yakupereka chifukwa cha sanje, sembe ya chikumbusko iyo yikuperekeka kuti kwananga kumanyikwe.

¹⁶“Sono musofi wati wamutolere mwanakazi kunthazi na kumuŵika pa maso pa FUMU.

¹⁷Ndipo musofi watore maji ghakupatulika mu mbale ya dongo, ndipo watore fuvu ilo liri pasi pa Chihema na kuliŵika mu maji.

¹⁸Musofi wati wamwimike mwanakazi panthazi pa FUMU na kusutula sisi la ku mutu wakhe, ndiposo wati waŵike mu mawoko gha mwanakazi yura sembe ya ufu ya chikumbusko, yeneiyo ndi sembe pa mrandu wa sanje. Ndipo musofi wati waŵe na maji ghakuŵaŵa mu woko lakhe gheneagho ghakupereka nthembo.

¹⁹Sono musofi wamufumbe mwanakazi kuti wachite chirapo, pakuyowoya kuti, ‘Usange munthu walije kuleŵana nawe, ndiposo usange ulije kunjiramo mu ukazuzi, apo ukaŵa pasi pa mazaza gha mufumu wako, ipo maji ghakuŵaŵa agha ghareke kukupa nthembo.

²⁰Kweni usange uli kupuruka, nangauli ukaŵa pasi pa mazaza gha mufumu wako, ndipo usange uli kujikazuzga, na kuti mwanarume uyo ndi mufumu wako chara wali kuleŵana nawe,

²¹penepapo (musofi wati wamurapiske chirapo cha nthembo, na kumuphalira mwanakazi kuti), FUMU yikuzgore iwe kuŵa wakutembeka na wakurapizgika mukati mu ŵanthu ŵa kwinu pakugwedula chigha chako na kutupiska thupi lako.

²²Maji agha gheneagho ghakwiza na nthembo ghaporote mu matumbo ghako, ghatupiske thupi lako na kugwedula chigha chako.’ ” Sono mwanakazi wati wayowoye kuti “Ameni, Ameni.”

²³“Penepapo musofi wati walembe nthembo izi mu buku, na kuzisuka mu maji ghakuŵaŵa.

²⁴Iyo wati wamumweske mwanakazi maji ghakuŵaŵa agho ghakwiza na nthembo. Maji agho ghati ghanjire mwa iyo na kumupa kuŵinya kukuru.

²⁵Ndipo musofi wati watore mu woko la mwanakazi sembe ya ufu yakuperekeka chifukwa cha sanje, ndipo wati wazungunye sembe yira ya ufu panthazi pa FUMU na kwiza nayo ku jochero.

²⁶Musofi watorepo woko limoza pa chakupereka cha ufu, kuŵa phande lakhe la chikumbusko, na kocha pa jochero. Pamanyuma wamupe mwanakazi yura maji ghara kuti wamwe.

²⁷Ndipo para musofi wamumweska maji, penepapo, usange wali kujikazuzga ndipo wanguŵa wambula kugomezgeka ku mufumu wakhe, maji agho ghakwiza na nthembo ghati ghanjire mwa iyo na kumupa kuŵinya kukuru. Thupi lakhe liti litupe ndipo chigha chakhe chiti chigweduke. Mwanakazi yura wati waŵe wakutembeka mukati mu ŵanthu ŵakwakhe.

²⁸Kweni usange mwanakazi walije kujikazuzga ndipo ngwa kuphotoka, penepapo wati waŵavyenge mrandu ndipo wamanyenge kubaba ŵana.

²⁹“Ili ndi dango pa mrandu wa sanje para mwanakazi wapuruka na kujikazuzga apo wali pasi pa mazaza gha mufumu wakhe,

³⁰panji para mtima wa sanje wawuka mu mufumu wakhe ndipo wakuchita sanje na muwoli wakhe. Penepapo wati wamuŵike muwoli wakhe panthazi pa FUMU, ndipo musofi wati wamufiskire dango lose ili.

³¹Mwanarume wati waŵe wambula kwananga, kweni mwanakazi wati waŵenge na mrandu wa kwananga.”