Read new_tumbuka_bible Kupenda 6 Bible Online

Kupenda 6 - new_tumbuka_bible bible

Kupenda 6

¹FUMU yikatiso kwa Mozesi,

²“Yowoya ku ŵaIsraele kuti para mwanarume panji mwanakazi wakuchita chirapo cha pa dera, icho ndi chirapo cha muNaziri, mwakuti wajipatulire kwa FUMU,

³wajikanizge kumwa vinyo na moŵa. Ŵareke kumwa vinyo lakusasa ilo lanozgeka kufuma ku mpheska, panji moŵa. Wareke kumwa maji gha mpheska ziŵisi panji zakomira.

⁴Mazuŵa ghose ghakujipatula kwakhe wareke kurya kalikose ako kafuma ku mpheska panji njere nanga ndi makantha ghakhe.

⁵“Mazuŵa ghose gha chirapo cha kujipatula kwakhe wareke kumeta sisi lakhe. Wati waŵe wakupatulika, mpaka nyengo yimare yeneiyo wakujipatulira kwa FUMU. Wati walimbe sisi la ku mutu wakhe kuti likule.

⁶Mazuŵa ghose agho wajipatulira kwa FUMU wati wareke kusenderera kufupi na chitanda.

⁷Usange ŵawiske ŵafwa, panji ŵanyina, panji mwana munyakhe, panji mudumbu wakhe, wareke kujikazuzga na vitanda vyawo, chifukwa chirapo cha kujipereka kwakhe kwa Chiuta chili pa mutu wakhe.

⁸Mazuŵa ghose ghakujipatula kwakhe, iyo ngwa kupatulika kwa FUMU.

⁹“Usange munthu munyakhe wafwa kankhumu apo pali iyo, ndipo ntheura wakukazuzga sisi lakhe lakupatulika, wati wamete sisi ku mutu wakhe pa zuŵa lakujitozga kwakhe, leneilo ndi zuŵa la chinkhonde na chiŵiri.

¹⁰Pa zuŵa la chinkhonde na chitatu wize na nkhunda ziŵiri kwa musofi pa muryango wa Chihema Chakukumaniranamo.

¹¹Musofi wati wapereke yimoza kuŵa sembe ya zakwananga, yinyakhe yiti yiŵenge sembe yakocha. Wati wamuphepiskire pakuti wakananga pakuŵa pafupi na chitanda. Pa zuŵa leneili wapatuliskeso mutu wakhe kwa FUMU.

¹²Iyo wajipereke kwa FUMU mazuŵa ghose ghakujipatula kwakhe, ndipo wize na mwana-mberere mwanarume wa chirimika chimoza kuŵa sembe yakuphepiskira majuvyo. Kweni nyengo yakudanga yira yireke kupendekerako chifukwa kujipatula kwakhe kukakazuzgika.

¹³“Ili ndilo dango la muNaziri, para nyengo ya kujipatula kwakhe yamara. Ŵanthu ŵati ŵamutorere ku muryango wa Chihema Chakukumaniranamo.

¹⁴Iyo wati wapereke chawanangwa chakhe kwa FUMU. Wapereke mwana-mberere mwanarume wambula kalema wa chirimika chimoza kuŵa sembe yakocha, mberere yanakazi ya chirimika chimoza yambula kalema kuŵa sembe ya zakwananga, ndiposo na mberere yanarume yimoza yambula kalema kuŵa sembe ya wenenawene.

¹⁵Waperekeso chidunga cha vingwa vyambula chirungo, vingwa vipapati vya ufu wakunyiririka wakusazgako mafuta, ndiposo na tuvingwa tupepefu twambula chirungo twakuphakako mafuta, na sembe yawo ya ufu, ndiposo na sembe yawo ya vyakumwa.

¹⁶“Musofi wati waviŵike panthazi pa FUMU na kupereka sembe yakhe yakuphepiskira zakwananga, na sembe yakhe yakocha.

¹⁷Iyo wati wapereke kwa FUMU mberere yanarume kuŵa sembe ya wenenawene, pamoza na chidunga cha vingwa vyambula chirungo. Musofi wati waperekengeso sembe yakhe ya ufu na ya vyakumwa.

¹⁸MuNaziri yura wati wametere sisi la ku mutu wakhe wakupatulika pa muryango wa Chihema Chakukumaniranamo. Iyo wati watore sisi la ku mutu wakhe wakupatulika na kuliŵika pa moto uwo uli kusi ku sembe ya wenenawene.

¹⁹“Ntheura musofi watore mukhono wakuphika wa mberere yanarume, na chingwa chipapati chimoza chambula chirungo kufuma mu chidunga, ndiposo na kachingwa kapepefu kamoza kambula chirungo na kuviŵika pa mawoko gha muNaziri pamanyuma pakumeta sisi lakujipatula kwakhe.

²⁰Musofi wavizungunye kuti viŵe sembe yakuzungunya panthazi pa FUMU. Vyeneivi ndi phande lakupatulika la musofi pamoza na nganga iyo yazungunyika, na chigha icho chaperekeka. Pamanyuma pa ichi muNaziri yura wangamanya kumwa vinyo.

²¹“Ili ndi dango la muNaziri uyo wakuchita chirapo. Sembe yakhe kwa FUMU yiti yiŵenge kwakuyana na chirapo chakhe nga muNaziri, pa dera pa ivyo wangamanya kupereka. Kwakuyana na phangano ilo wachita, ntheuraso iyo wati wachite kwakulingana na dango la kujipatula kwakhe kuŵa muNaziri.”

²²FUMU yikati kwa Mozesi,

²³“Umuphalire Aroni na ŵana ŵakhe kuti ŵatumbikenge ŵaIsraele pakuŵayowoyera kuti:

²⁴FUMU yimutumbikani na kumusungilirani.

²⁵FUMU yiŵaliske chisko chakhe pa imwe, ndipo yiŵe ya uchizi pa imwe,

²⁶FUMU yinuskire maso ghakhe pa imwe ndipo yimupani mutende.”

²⁷Ndipo FUMU yikati, “Para ŵazunurenge ntheura zina lane pakutumbika ŵaIsraele, ine nditi ndiŵatumbikenge.”