Read new_tumbuka_bible Kupenda 7 Bible Online

Kupenda 7 - new_tumbuka_bible bible

Kupenda 7

¹Pa zuŵa ilo, Mozesi wakamarizgira kwimika Chihema, ŵakachiphakazga mafuta na kuchipatuliska pamoza na viteŵetero vyakhe vyose. Wakaphakazgaso na kupatuliska jochero na viteŵetero vyakhe vyose.

²Penepapo ŵarongozgi ŵa ŵaIsraele, ŵakuru ŵa nyumba za ŵawiskewokuru, na ŵarara ŵa mafuko, ŵeneawo ŵakaŵa pachanya pa awo ŵakapendeka,

³ŵakatora vyakupereka vyawo, ndipo ŵakiza navyo pa maso pa FUMU. Ŵakapereka magareta ghakubenekerereka ghankhonde na limoza na nkhaŵi 12, gareta limoza lirilose likaperekeka kuŵarongozgi ŵaŵiri ndiposo na nkhaŵi yimoza kwa murongozgi waliyose. Ivi ŵakavipereka panthazi pa Chihema.

⁴FUMU yikati kwa Mozesi,

⁵“Pokerera ivi kufuma kwa iwo, kuti viŵe vyakuteŵetera mu Chihema Chakukumaniranamo, ndipo uvipereke ku ŵaLevi, munthu yose kwakuyana na mlimo wakhe.”

⁶Ntheura Mozesi wakatora magareta na nkhaŵi, na kuvipereka ku ŵaLevi.

⁷Magareta ghaŵiri na nkhaŵi zinayi wakapereka ku ŵaGerishoni kwakuyana na mlimo wawo.

⁸Magareta ghanayi na nkhaŵi zinkhonde na zitatu wakapereka ku ŵana ŵa Merari, kwakuyana na mlimo wawo weneuwo ukaŵa pasi pa urongozgi wa Itamara mwana wa musofi Aroni.

⁹Kweni wakapereka kanthu chara ku ŵaKohati, chifukwa ŵakapika mlimo wakupwererera vinthu vyakupatulika vyeneivyo vikenera kuyegheka pa viŵegha.

¹⁰Ndipo ŵarongozgi ŵakiza na vyakupereka vyakupatuliskira jochero pa zuŵa ilo likaphakazgikiranga mafuta. Ŵakiza na vyakupereka vyawo panthazi pa jochero,

¹¹ndipo FUMU yikati kwa Mozesi, “Para ŵakupereka sembe yakupatuliskira jochero, murongozgi waliyose waŵe na zuŵa lakhe na lakhe.”

¹²Uyo wakiza na vyakupereka vyakhe pa zuŵa lakudanga wakaŵa Nashoni mwana wa Aminadabu, wa fuko la Yuda.

¹³Vyakupereka vyakhe vikaŵa ivi: beseni la siliva limoza ya uzitu wa kilogiramu limoza na hafu, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

¹⁴Wakaperekaso dira wa golide yumoza wa uzitu wa magiramu 120, wakuzura na vyakununkhira.

¹⁵Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuti vyose ivi waperekere sembe yakocha.

¹⁶Wakaperekaso pepe yumoza kuŵa sembe ya zakwananga.

¹⁷Ndipo vyakuperekera sembe yakhe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde na ŵana-mberere ŵanarume ŵa chirimika chimoza ŵankhonde. Vyeneivi ndivyo vikaŵa sembe ya Nashoni mwana wa Aminadabu.

¹⁸Pa zuŵa la chiŵiri Netanele mwana wa Zuwara murongozgi wa ŵaIsakara, ndiyo wakiza na vyakupereka.

¹⁹Vyakupereka vyakhe vikaŵa ivi; beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

²⁰Wakaperekaso dira wa golide yumoza wa uzitu wa magiramu 120, wakuzura na vyakununkhira.

²¹Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

²²Wakaperekaso pepe yumoza kuŵa sembe ya zakwananga.

²³Ndipo vyakuperekera sembe yakhe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde na ŵana-mberere ŵanarume ŵa chirimika chimoza ŵankhonde. Vyeneivi ndivyo vikaŵa sembe ya Netanele mwana wa Zuwara.

²⁴Pa zuŵa la chitatu Eliyabu mwana wa Heloni, murongozgi wa ŵaZebuloni ndiyo wakiza na vyakupereka.

²⁵Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

²⁶Wakaperekaso dira wa golide yumoza wa uzitu wa magiramu 120, wakuzura na vyakununkhira.

²⁷Wakaperekaso nkhambako yanarume yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

²⁸Wakaperekaso pepe yumoza kuŵa sembe ya zakwananga.

²⁹Ndipo vyakuperekera sembe yakhe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, na ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Eliyabu mwana wa Heloni.

³⁰Pa zuŵa la chinayi Elizuru mwana wa Sheduru, murongozgi wa ŵaRubeni, ndiyo wakiza na vyakupereka.

³¹Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

³²Wakaperekaso dira wa golide yumoza wa uzitu wa magiramu 120, wakuzura na vyakununkhira.

³³Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

³⁴Wakaperekaso pepe yumoza kuŵa sembe ya zakwananga.

³⁵Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde na ŵana-mberere ŵanarume ŵa chirimika chimoza ŵankhonde. Vyeneivi ndivyo vikaŵa sembe ya Elizuru mwana wa Sheduru.

³⁶Pa zuŵa la chinkhonde Shelumiyele mwana wa Zurishadayi, murongozgi wa ŵaSimiyoni, ndiyo wakiza na vyakupereka.

³⁷Vyakupereka vyakhe vikaŵa ivi; beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

³⁸Wakaperekaso dira wa golide yumoza wa uzitu wa magiramu 120, wakuzura na vyakununkhira.

³⁹Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁴⁰Wakaperekaso pepe yumoza kuŵa sembe ya zakwananga.

⁴¹Ndipo vyakuperekera sembe yakhe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵa chirimika chimoza ŵankhonde. Vyeneivi ndivyo vikaŵa sembe ya Shelumiyele mwana wa Zurishadayi.

⁴²Pa zuŵa la chinkhonde na chimoza Eliyasafu mwana wa Duwele, murongozgi wa ŵaGadi, ndiyo wakiza na vyakupereka.

⁴³Vyakupereka vyakhe vikaŵa beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁴⁴Wakaperekaso dira wa golide yumoza wa uzitu wa magiramu 120, wakuzura na vyakununkhira.

⁴⁵Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁴⁶Wakaperekaso pepe yumoza kuŵa sembe ya zakwananga.

⁴⁷Ndipo vyakuperekera sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵa chirimika chimoza ŵankhonde. Vyeneivi ndivyo vikaŵa sembe ya Eliyasafu mwana wa Duwele.

⁴⁸Pa zuŵa la chinkhonde na chiŵiri Elishama mwana wa Amihudi, murongozgi wa ŵaEfurayimu, ndiyo wakiza na vyakupereka.

⁴⁹Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁵⁰Wakaperekaso dira wa golide yumoza wa uzitu wa magiramu 120, wakuzura na vyakununkhira.

⁵¹Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁵²Wakaperekaso pepe yumoza kuŵa sembe ya zakwananga.

⁵³Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Elishama mwana wa Amihudi.

⁵⁴Pa zuŵa la chinkhonde na chitatu Gamaliyele mwana wa Pedazuru, murongozgi wa ŵaManase, ndiyo wakiza na vyakupereka.

⁵⁵Vyakupereka vyakhe vikaŵa ivi: beseni limoza la siliva ya uzitu, wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wa kusazgako mafuta, kuŵa vyakupereka vya vyakurya.

⁵⁶Wakaperekaso dira wa golide yumoza wa uzitu wa magiramu 120, wakuzura na vyakununkhira.

⁵⁷Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁵⁸Wakaperekeso pepe yumoza kuŵa sembe ya zakwananga.

⁵⁹Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Gamaliyele mwana wa Pedazuru.

⁶⁰Pa zuŵa la chinkhonde na chinayi, Abidani mwana wa Gidiyoni, murongozgi wa ŵaBenjamini, ndiyo wakiza na vyakupereka.

⁶¹Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁶²Wakaperekaso dira wa golide yumoza wa uzitu wa magiramu 120 wakuzura na vyakununkhira.

⁶³Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁶⁴Wakaperekaso pepe yumoza kuŵa sembe ya zakwananga.

⁶⁵Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Abidani mwana wa Gidiyoni.

⁶⁶Pa zuŵa la khumi Ahiyezere mwana wa Amishadayi, murongozgi wa ŵaDani, ndiyo wakiza na vyakupereka.

⁶⁷Vyakupereka vyakhe vikaŵa ivi: beseni la siliva limoza la uzitu wa magiramu 1,560 na beseni la siliva limoza la uzitu wa magiramu 840, kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁶⁸Wakaperekaso dira wa golide yumoza wa uzitu wa magiramu 120, wakuzura na vyakununkhira.

⁶⁹Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁷⁰Wakaperekaso pepe yumoza kuŵa sembe ya zakwananga.

⁷¹Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Ahiyezere mwana wa Amishadayi.

⁷²Pa zuŵa la 11 Pagiyele mwana wa Okirani, murongozgi wa ŵaAshere, ndiyo wakiza na vyakupereka.

⁷³Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840 kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁷⁴Wakaperekaso dira wa golide yumoza wa uzitu wa magiramu 120, wakazura na vyakununkhira.

⁷⁵Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza, kuŵa sembe yakocha.

⁷⁶Wakaperekaso pepe yumoza kuŵa sembe ya zakwananga.

⁷⁷Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi vikaŵa sembe ya Pagiyele mwana wa Okirani.

⁷⁸Pa zuŵa la 12 Ahira mwana wa Enani, murongozgi wa ŵaNafutali, ndiyo wakiza na vyakupereka.

⁷⁹Vyakupereka vyakhe vikaŵa ivi: beseni la siliva limoza la uzitu wa magiramu 1,560, na beseni la siliva limoza la uzitu wa magiramu 840 kwakuyana na mweso wa pa Chihema Chakupatulika. Vyose viŵiri wuwo vikazura na ufu wakunyiririka wakusazgako mafuta, kuŵa vyakupereka vya vyakurya.

⁸⁰Wakaperekaso dira wa golide yumoza wa uzitu wa magiramu 120, wakuzura na vyakununkhira.

⁸¹Wakaperekaso nkhambako yichoko yimoza, mberere yanarume yimoza, mwana-mberere mwanarume yumoza wa chirimika chimoza kuŵa sembe yakocha.

⁸²Wakaperekaso pepe yumoza kuŵa sembe ya zakwananga.

⁸³Ndipo vyakupereka vya sembe ya wenenawene vikaŵa ivi: nkhaŵi ziŵiri, mberere zanarume zinkhonde, ŵapepe ŵankhonde, ŵana-mberere ŵanarume ŵankhonde ŵa chirimika chimoza. Vyeneivi ndivyo vikaŵa sembe ya Ahira mwana wa Enani.

⁸⁴Ivi ndivyo vikaŵa vyakupereka vyakupatuliskira jochero, pa zuŵa ilo ŵarongozgi ŵa ŵaIsraele ŵakaliphakazgiranga. Ŵakapereka mbale za siliva 12, mabeseni gha siliva 12, ŵadira ŵagolide 12.

⁸⁵Beseni la siliva lirilose likaŵa la uzitu wa kilogiramu limoza na hafu. Beseni lirilose likaŵa la uzitu wa magiramu 800 ghankhonde na ghaŵiri. Siliva yose wa viteŵetero vira yikaŵa ya uzitu wa makilogiramu 27, kwakuyana na mweso wa pa malo ghakupatulika.

⁸⁶Ŵadira ŵa golide 12, ŵakuzura na vyakununkhira, waliyose wakaŵa wa uzitu wa magiramu 110, kwakuyana na mweso wa pa malo ghakupatulika. Golide lose la ŵadira ŵara likaŵa la uzitu wa kilogiramu limoza na hafu.

⁸⁷Vyakuŵeta vyose ivyo ŵakapereka kuŵa sembe yakocha vikaŵa ntheura: nkhambako zichoko 12, mberere zanarume 12, ŵana-mberere ŵanarume 12 ŵa chirimika chimoza, pamoza na sembe ya ufu, ndiposo na ŵapepe 12 kuwa sembe ya zakwananga.

⁸⁸Vyakuŵeta vyose ivyo vyakuperekera kuŵa sembe ya wenenawene vikaŵa ntheura: nkhambako 24, mberere zanarume 60, ŵapepe 60 ndipo ŵana-mberere ŵanarume 60, ŵa chirimika chimoza. Vyeneivi ndivyo vikaŵa sembe yakupatuliskira jochero, likati laphakazgika.

⁸⁹Ndipo para Mozesi wakanjira mu Chihema Chakukumaniranamo kuya kayowoya na FUMU wakapulika lizgu likayowoyanga nayo kufumira pachanya pa chibenekerero chakuphepiskirapo icho chikaŵa pachanya pa Bokosi la Phangano, pakati pa ŵakerubi ŵaŵiri.