Read new_tumbuka_bible Kupenda 8 Bible Online

Kupenda 8 - new_tumbuka_bible bible

Kupenda 8

¹Sono FUMU yikati kwa Mozesi,

²“Umuphalire Aroni kuti, para ukuŵika nyali, uŵike mwakuti nyali zinkhonde na ziŵiri zingweruskenge panthazi pa chakuŵikapo nyali.”

³Aroni wakachita ntheura. Wakaziŵika nyali zira kuti zingweruskenge panthazi pa chakuŵikapo nyali nga ndi umo FUMU yikamulangulira Mozesi.

⁴Chakuŵikapo nyali ŵakachipanga mwa ntheura: chikaŵa cha golide, ndipo chikaŵa chakufura na nyondo kufuma musi mwakhe mpaka ku maluŵa ghakhe. Chakuŵikapo nyali ŵakachipanga kwakuyana na chiyerezgero icho FUMU yikamurongora Mozesi.

⁵FUMU yikati kwa Mozesi,

⁶“Tora ŵaLevi mukati mu ŵaIsraele, ndipo uwatozge.

⁷Pakuŵatozga uti uchite nawo ntheura: uŵamijire maji agho ghakuwuskapo zakwananga. Ŵamete mu thupi lose na lezara, ndipo ŵasuke vyakuvwara vyawo. Ntheura ŵati ŵaŵe ŵakutozgeka.

⁸Sono ŵatore nkhambako yichoko pamoza na vyakupereka vya vyakurya vya ufu wakunyiririka wakusazgako mafuta. Ŵati ŵatoreso nkhambako yichoko yinyakhe yakuperekera sembe ya zakwananga.

⁹Wize nawo ŵaLevi panthazi pa Chihema Chakukumaniranamo, ndiposo uwunganye mpingo wose wa ŵaIsraele.

¹⁰Para ukuŵapereka ŵaLevi panthazi pa FUMU, ŵaIsraele ŵaŵikepo mawoko ghawo pa iwo.

¹¹Pamanyuma Aroni wati waŵapereke panthazi pa FUMU kuŵa sembe yakuzungunya yakufumira mu ŵaIsraele, kuti mlimo wa ŵaLevi uŵe nadi wakuteŵetera FUMU.

¹²Pamanyuma ŵaLevi ŵati ŵaŵike mawoko ghawo pa mitu ya nkhambako zira. Yimoza uti uyipereke kwa FUMU kuŵa sembe ya zakwananga, ndipo yinyakhe kuŵa sembe yakocha, pakuŵaphepiskira ŵaLevi.

¹³“Uti uŵimike ŵaLevi kuti ŵateŵeterenge Aroni na ŵana ŵakhe ŵanarume, ndipo uŵapereke kwa FUMU nga ndi sembe ya pa dera yakuzungunya.

¹⁴Ntheura ndimo uti uŵapatulire ŵaLevi mukati mu ŵaIsraele, ndipo iwo ŵati ŵaŵe ŵane.

¹⁵Pamanyuma pa ichi ŵaLevi ŵanjirenge kuti ŵateŵete mu Chihema Chakukumaniranamo, para waŵatozga na kuŵapereka kuŵa sembe ya pa dera yakuzungunya.

¹⁶Iwo mbakuperekeka nkhanira kwa ine kufuma mu ŵaIsraele. Ndaŵatora kuŵa ŵane mu malo gha ŵana wose awo ŵa uŵere, ŵana ŵa uŵere wose mu ŵaIsraele.

¹⁷Pakuti ŵana wose ŵa uŵere mu ŵaIsraele mbane, ŵana ŵa ŵanthu na ŵa vyakuŵeta wuwo. Pa zuŵa ilo nkhakomera ŵana wose ŵakudanga kubabika mu charu cha Eguputo nkhaŵapatuliskira kwa ndamwene.

¹⁸Ndatora ŵaLevi mu malo gha ŵana wose ŵa uŵere mukati mu ŵaIsraele.

¹⁹Ndaŵapereka ŵaLevi kwa Aroni na ŵana ŵakhe nga nchawanangwa chakufuma mukati mu ŵaIsraele, kuti ŵaŵateŵetere ŵaIsraele mu Chihema Chakukumaniranamo, mwakuti nthenda yakofya yireke kuŵa mu ŵaIsraele para iwo ŵasenderera kufupi na malo ghakupatulika.”

²⁰Ntheura ndimo Mozesi na Aroni pamoza na mpingo wose wa ŵaIsraele ŵakaŵachitira ŵaLevi. ŴaIsraele ŵakaŵachitira kwakuyana na vyose ivyo FUMU yikamulangulira Mozesi za ŵaLevi.

²¹ŴaLevi ŵakajitozga ku zakwananga ndipo wakasuka vyakuvwara vyawo. Aroni wakaŵapereka kuŵa sembe ya pa dera yakuzungunya panthazi pa FUMU, ndiposo wakaŵaphepiskira kuti ŵatozgeke.

²²Pamanyuma pa ichi ŵaLevi ŵakanjira kuya kachita mlimo wawo mu Chihema Chakukumaniranamo pasi pa Aroni na ŵana ŵakhe. Ntheura ŵakaŵachitira nga ndi umo FUMU yikamulangulira Mozesi za ŵaLevi.

²³FUMU yikati kwa Mozesi,

²⁴“Ichi ndicho chikukhwaska ŵaLevi. Kwamba ŵa virimika 25 na ŵakujumphirapo, ŵati ŵanjirenge na kuteŵeta mu Chihema Chakukumaniranamo.

²⁵Para ŵakwaniska virimika 50 ŵati ŵareke mlimo wa uteŵeti, ndipo ŵangateŵetangaso chara.

²⁶Kweni ŵangawovwira ŵabali ŵawo mu Chihema Chakukumaniranamo, pakuchisungilira makora, kwambula kuchita mlimo wenecho. Ichi ndicho muchitenge ku ŵaLevi pakuŵagaŵira milimo yawo.”