Read new_tumbuka_bible Kupenda 9 Bible Online

Kupenda 9 - new_tumbuka_bible bible

Kupenda 9

¹Mu mwezi wakudanga wa chirimika cha chiŵiri, para ŵaIsraele ŵakati ŵafuma mu charu cha Eguputo, FUMU yikayowoya na Mozesi mu mapopa gha Sinayi kuti,

²“ŴaIsraele ŵachitenge chiphikiro cha Paska pa nyengo yakhe yakwimikika.

³Pa zuŵa la 14 la mwezi uwu wa, nyengo ya mise, muti muchitenge pa nyengo yakhe yakwimikika. Muchitenge kwakuyana na marango ghakhe ghose.”

⁴Ntheura Mozesi wakaŵaphalira ŵaIsraele kuti ŵakwenera kuchita chiphikiro cha Paska.

⁵Ndipo ŵaIsraele ŵakachita chiphikiro cha Paska mu mapopa gha Sinayi mu mwezi wakudanga pa zuŵa la 14 la mwezi, nyengo ya mise. Ntheura ŵaIsraele ŵakachita kwakuyana na vyose ivyo FUMU yikamulangulira Mozesi.

⁶Ŵakaŵapo ŵanthu ŵanji awo ŵakaŵa ŵakukazuzgika chifukwa ŵakakhwaska chitanda cha munthu, mwakuti ŵakatondeka kuchita chiphikiro cha Paska zuŵa lira. Iwo ŵakiza panthazi pa Mozesi na Aroni pa zuŵa lira.

⁷Ŵanthu ŵara ŵakaŵaphalira ŵakati, “Tili ŵakukazuzgika chifukwa tangukhwaska chitanda cha munthu. Kasi nchifukwa uli tikukanizgika kupereka sembe ya FUMU nyengo yakhe yakwimikika mukati mu ŵaIsraele?”

⁸Mozesi wakati kwa iwo, “Lindani danga kuti ndipulike icho FUMU yiti yilangule na vya imwe.”

⁹FUMU yikati kwa Mozesi,

¹⁰“Uŵaphalire ŵaIsraele kuti usange munthu waliyose wa mwa imwe panji ŵa mphapu yinu ngwa kukazuzgika chifukwa wangukhwaska chitanda cha munthu, panji chifukwa wali pa ulendo wa kutali, iyo wakwenera kuyichitira FUMU chiphikiro cha Paska.

¹¹Mu Levi wachitenge ichi mu mwezi wa chiŵiri zuŵa la 14, nyengo ya mise. Ŵaryenge nyama ya Paska pamoza na chingwa chambula chirungo na mphangwe yakuŵaŵa.

¹²Ŵangarekangapo kanthu chara mpaka na mulenje, nesi kuphyorapo nanga nchiwangwa chakhe chimoza. Ŵachitenge chiphikiro cha Paska kwakuyana na marango ghose.

¹³Kweni munthu uyo ngwa kuphotoka ndipo wali pa ulendo chara, usange wareka kuchita chiphikiro ichi, munthu uyo wafumiskikemo mukati mu ŵanthu ŵanyakhe, chifukwa wareka kupereka sembe ya FUMU pa nyengo yakhe yakwimikika. Munthu uyo walangikenge chifukwa cha kwananga kwakhe.

¹⁴“Usange mulendo wakupanjwamo mukati mwinu, ndipo wakukhumba kuchita chiphikiro cha Paska la FUMU, nayo wachite chiphikiro cha Paska pakurondezga marango agho imwe mukurondezga. Muŵenge na dango limoza pera, mwaŵenecharu ndiposo na uyo wakupanjwa mukati mwinu.”

¹⁵Pa zuŵa ilo Chihema cha Ukaboni, chikimikikiranga, chibingu chikabenekerera Chihema Chakukumaniranamo. Pa nyengo ya mise chikaŵanga pachanya pa Chihema, Chakukumaniranamo mu kawonekero ka moto pachanya pa Chihema chira mpaka na mulenje.

¹⁶Ntheura ndimo chikachitikiranga nyengo zose. Chibingu chikabenekerera Chihema na muhanya, ndipo na usiku chikawoneka nga ndi moto.

¹⁷Nyengo yose para chibingu chawuskikapo kufuma pa Chihema, ndipo ŵaIsraele ŵakawukanga ulendo wawo. Ndipo pa malo apo chibingu chikimiliranga, penepapo ndipo ŵaIsraele ŵakazenganga misasa yawo.

¹⁸Pa languro la FUMU ŵaIsraele ŵakawukanga ulendo wawo, ndiposo pa languro lakhe ŵakazenganga misasa. Nyengo yose iyo chibingu chikakhaliranga pa Chihema, nawoso ŵakakharanga mu msasa.

¹⁹Nanga ndi para chibingu chikakhalirira pa Chihema mazuŵa ghanandi, ŵaIsraele ŵakasunga languro la FUMU, ndipo kuti ŵakawukanga ulendo wawo chara.

²⁰Nyengo zinyakhe chibingu chira chikakharangapo mazuŵa ghachoko waka pachanya pa Chihema. Iwo ŵakakharanga mu msasa kwakuyana na languro la FUMU, ndipo ŵakawukanga ulendo wawo kwakuyana na languro lakhe.

²¹Ndipo nyengo zinyakhe chibingu chikakhaliranga kufuma na mise mpaka na mulenje. Para chikawuskikangapo na mulenje nawo ŵakawukangapo. Usange chibingu chira chawuskikapo na muhanya panji na usiku nawo ŵakawukanga.

²²Manyi ghakaŵa mazuŵa ghaŵiri panji mwezi, nanga ndi nyengo yitaliko iyo chibingu chikarutilira kukhara pa Chihema, nawo ŵaIsraele ŵakakharanga mu msasa, ndipo kuti ŵakawukangamo chara. Kweni para chibingu chawuskikapo nawo ŵakawukangapo.

²³Pa languro la FUMU ŵakazenganga misasa, ndipo na languro lakhe ŵakawukangamo. Nyengo yose ŵakasunganga languro la FUMU ilo yikapereka kwa Mozesi.