Read new_tumbuka_bible Mika 1 Bible Online

Mika 1 - new_tumbuka_bible bible

Mika 1

¹Agha ndi mazgu gha FUMU agho ghakiza kwa Mika wa ku Moresheti mu nyengo iyo ŵakaronga aŵa, Yotamu, Ahazi na Hezekiya, ŵakawusiranga charu cha Yuda. Iyo wakapokera kwizira mu mboniwoni kuphara na vya Samariya na Yerusalemu.

²Pulikani, imwe mwa ŵanthu mose. Tegherezga, iwe charu, na vyose ivyo vili mwenemumo! FUMU Chiuta waŵe kaboni kususka imwe, inya FUMU, kufuma mu Nyumba yakhe yakupatulika.

³Wonani, FUMU yikwiza kufuma ku malo ghakhe uko yikukhara. Yizamkwikha, kwiza pasi, ndipo yizamkwenda pa mapiri gha charu.

⁴Mapiri ghizamkusongonoka pasi pakhe, nga phula ilo lakhwaska moto. Ghizamkwenda mu madambo, nga ndi maji pa chipopoma.

⁵Vyose ivi ndi chifukwa cha uheni wa Israele, na zakwananga za ŵanthu ŵa charu cha Yuda. Kasi uheni wa Israele ndi ngu? Asi ndi Samariya? Kasi malo gha pachanya ghakusoperako vikozgo mu ŵaYuda ndi nga? Asi ndi Yerusalemu wuwo?

⁶Ntheura FUMU yikuti, “Pa ichi ndizamkuchita kuti Samariya ŵaŵe mulu wa mahami pa munda, malo ghakupandapo waka mpheska. Ndizamkunkhuzgira mawe ghakhe mu dambo, na kubenura lufura lwakhe pakweru.

⁷Vikozgo vyakhe vyose vyakuŵaja vyamkuteketeka, vyawanangwa vyakhe vyose vyamkocheka na moto, ndipo ŵangoza ŵakhe wose ndiŵaparanyenge. Pakuti wakavisangira vyawanangwa vyakhe, kufuma mu njombe ya uzaghali, ndipo viti viwerere kuŵa njombe ya muzaghali.”

⁸Ntheura Mika wakati, “Pa chifukwa ichi nditi ndilire na kutengera, nditi ndende wakuvurika na wa nkhule. Nditi ndibwethe nga ndi ŵakambwe, na kulira nga ndi phururu.

⁹Pakuti chilonda cha Samariya nchambula kupozgeka, ndipo chaya kafika ku charu cha Yuda. Chiza mpaka ku chipata cha ŵanthu ŵane, inya, mpaka mu Yerusalemu.”

¹⁰Rekani kupharazga ichi ku ŵarwani ŵithu mu msumba wa Gati. Rekani na kulira wuwo. Imwe mukukhara ku Beti Leyafira, kunkhurani mu fuvu.

¹¹Imwe mukukhara mu Safiri, rutaninge ku umikori, uku muli nkhule na ŵasoni. Imwe mukukhara mu Zaanani, mungafumangamo chara. Para ŵanthu ŵa ku Beti Ezele ŵakutengera, mumanye kuti iwo ŵangamovwirani chara.

¹²Ŵanthu awo ŵakukhara mu Maroti ŵakulindirira uweme. Kweni FUMU yafika na uheni, ku chipata cha Yerusalemu.

¹³Imwe mukukhara mu Lakishi, kakilirani magareta ku mahachi, muchimbire. Ndimwe mukaŵa ŵakudanga kuŵarongozgera ku kwananga, ŵanthu ŵa mu Ziyoni. Pakuti mwa imwe mukusangika zakwananga za ŵaIsraele.

¹⁴Ntheura mupereke vyawanangwa vyakulayirana, ku ŵanthu ŵa msumba wa Moresheti Gati. Msumba wa Akizibu wamkuŵa wa upusikizgi, ku ŵakaronga ŵa charu cha Yuda.

¹⁵Nditi ndizeso na wakutonda kwa imwe, mwe imwe mukakhara mu msumba wa Maresha. Ŵarongozgi ŵa charu cha Yuda, ŵamkubisama ku Adulamu.

¹⁶Mwa ŵaYuda, jimetani sisi, muŵe na vipara, pakuŵalirira ŵana ŵinu ŵakutemweka. Mujizgore ŵa vipara nga khuŵi, pakuti ŵatorekerenge ku umikori.