Read new_tumbuka_bible Mika 2 Bible Online

Mika 2 - new_tumbuka_bible bible

Mika 2

¹“Soka ku awo ŵakunozgera ubendezi, kunozgekera uheni pa vitara vyawo. Para na mulenje kukuŵara, ŵakufiska icho ŵanozgera, pakuti chili mu mazaza ghawo.

²Para ŵakudokera minda, ŵakupoka waka. Para ŵakudokera nyumba, ŵakuphanga waka. Ŵakuyuzga munthu na mbumba yakhe, muzengezgani wakhe na chiharo chakhe.”

³Pa chifukwa ichi FUMU yikuti, “Wonani nkhunozgera suzgo kulimbana na mtundu uwu, ilo mwamkutondeka kuwuskamo mu singo zinu. Mwamkwenda mwakujikuzga chara pakuti yamkuŵa nyengo yinonono.

⁴Pa nyengo iyo, ŵanthu ŵamkwimba sumu yakumutombozgani, ndipo ŵamkutengera chomene. Iwo ŵamkuti, ‘Tapankhuka nkhanira. Charu chithu chapokeka kwa ise, minda yithu yagaŵika kwa awo ŵatikora.’ ”

⁵“Ntheura para nyengo yafika, yakuwezgera charu ku ŵanthu ŵa FUMU, kwamkuŵavye na yumoza wa imwe uyo wamkupoka chiharo.

⁶Ŵanthu ŵakundiyowoyera kuti, ‘Ungapharazganga chara. Munthu wareke kupharanga vinthu ivi. Ise tikhozgekenge soni chara.’

⁷Kasi imwe ŵa mbumba ya Yakhobe cha ntheura tiyowoyenge? Kasi Mzimu wa FUMU ngwambula kujikora? Kasi machitiro agha ngakhe? Kasi mazgu ghane ngambula kuchita uweme kwa uyo wakwenda mu urunji?”

⁸FUMU yikuti, “Kweni imwe mukuŵawukira ŵanthu ŵane nga mbarwani. Mukuŵavura minjilira ŵanthu ŵa mutende, awo ŵakuwera kufuma ku nkhondo kugomezgeka kuti mbanangwa.

⁹Ukuviwuskamo ŵawoli ŵa ŵanthu ŵane mu nyumba zawo zakukondweska, ukuwuskako ku ŵana ŵawo ŵachoko vitumbiko vyane kwa muyirayira.

¹⁰Wukani ndipo rutaninge pakuti malo agha ngakupumulirapo chara, chifukwa cha ukazuzi uwo mwachita, weneuwo ukuparanya nkhanira.

¹¹“Usange munthu wendendekenge kupharazga vyawaka na utesi kuti, ‘Ndipharazgenge kwa imwe za vinyo na moŵa,’ ndiyo wakwenera kuŵa mupharazgi mwa ŵanthu aŵa!

¹²Nadi, nditi ndimuwunjikani mose, imwe ŵa Yakhobe nditi ndiŵawunganye ŵakukharako mu ŵaIsraele. Nditi ndiŵaŵike pamoza nga ndi mberere na mbuzi mu chitupa, nga ndi mskambo uwo uli mu luhari lwakhe. Malo ghizamkupoma na ŵanthu ŵanandi chomene.

¹³“Uyo wakujula muryango wamkuŵadangirira, ndipo wose ŵamkuswa chijaro cha pa chipata na kufumira penepapo. Karonga wawo wamkuŵadangirira, FUMU ndiyo yamkuŵa panthazi pawo.”