Read new_tumbuka_bible Mika 3 Bible Online

Mika 3 - new_tumbuka_bible bible

Mika 3

¹Ndipo ine nkhati, “Pulikani, imwe mukurongozga ŵaYakhobe, imwe mukuwusa ŵaIsraele! Asi imwe ndimwe mukwenera kumanya weruzgi wakunyoroka?

²Ndipouli imwe mukutinkha uweme na kutemwa uheni, mukuyuwura chikumba cha ŵanthu ŵane, ndipo mukucheka munofu ku viwangwa vyawo.

³Mukurya nyama ya ŵanthu ŵane, na kufuŵa chikumba chawo. Mukumemena viwangwa vyawo, na kuŵachekacheka nga ndi para mukazingenge, nga ndi nyama ya mu mphika.”

⁴Pamanyuma mwizamkulirira kwa FUMU, kweni kuti yizamkumuzgorani chara. FUMU yizamkubisa chisko chakhe kwa imwe, chifukwa ŵachita uheni.

⁵Ntheura FUMU yikuti, “Kwakuyana na imwe nchimi mwaŵeneimwe mukupuruska ŵanthu ŵane, imwe mukuchemerezga kuti, ‘Mutende’ apo ŵamupani chakurya, kweni mukuwuska nkhondo kwa uyo wakureka kumupani chakurya.

⁶Kwa chifukwa ichi kwizamkuŵa usiku kwa imwe kwambula kuŵa na mboniwoni. Kwizamkuŵa chisi kwa imwe kwambula uroski. Dazi lizamkunjira waka pa nchimi, ndipo zuŵa lizamkuŵa la mdima pa iwo.

⁷Ŵawoni ŵakhozgekenge soni, ndipo ŵaroski nawo ŵalengeskekenge. Wose ŵamkuŵavye chakuyowoya, pakuti Chiuta wakuŵazgora chara.

⁸Kweni ine, ndazuzgika na nkhongono, na Mzimu wa FUMU, ndiposo na weruzgi, na mazaza, kuti ndimuphalire Yakhobe majuvyo ghakhe, na Israele kwananga kwakhe.

⁹Pulikani ichi, imwe mukurongozga ŵaYakhobe imwe mukuwusa ŵaIsraele, mwaŵeneimwe mukukana unenesko na kubendezga urunji wose,

¹⁰imwe mukuzenga Ziyoni na ndopa ndipo Yerusalemu na ubendezi.

¹¹Ŵarongozgi ŵakhe ŵakweruzga para ŵapoka chimbundi. Ŵasofi ŵakhe ŵakulipirika pambere ŵandasambizge. Nchimi zakhe zikulipirika ndarama pambere zindaroske. Ndipouli ŵakweghamira kwa FUMU na kuti, ‘Asi FUMU yili pakati pithu? Palije kaheni ako kangatisanga ise.’

¹²Ntheura chifukwa cha imwe, Msumba wa Ziyoni uti ulimike nga ndi munda, Yerusalemu wati wazgoke kuŵa mulu wa mahami, ndipo phiri la Nyumba ya Chiuta, liti lizgoke kuŵa phiri la thengere.”