Read new_tumbuka_bible Mika 4 Bible Online

Mika 4 - new_tumbuka_bible bible

Mika 4

¹Mu mazuŵa ghakumalira phiri la Nyumba ya FUMU yizamkukhazikika, kuŵa phiri litali chomene ku mapiri ghose, ndipo lizamkukwezgeka pachanya pa mapiri ghose. Mafuko ghanandi ghamkundonda kuruta kwa ilo.

²Ndipo mafuko ghanandi ghamkwiza, na kuti: “Zaninge, tiyeni tirute ku phiri la FUMU, ku Nyumba ya Chiuta wa Yakhobe. Iyo watisambizgenge nthowa zakhe mwakuti tendenge mwenemumo.” Pakuti dango lifumirenge ku Ziyoni, ndipo mazgu gha FUMU ghafumirenge ku Yerusalemu.

³Iyo wizamkweruzga pakati pa ŵanthu ŵanandi, na kudumula mphindano pakati pa mafuko gha pafupi na gha kutali. Iwo ŵizamkufura malupanga ghawo kuŵa mayembe, ndiposo mikondo yawo kuŵa zimphopo. Mitundu yizamkuwukirana chara kuti yirwe nkhondo nanga nkhusambiraso vya nkhondo.

⁴Munthu yose wizamkukhara musi mu mpheska yakhe ndiposo na musi mwa khuni lakhe la chikuyu. Pamkuŵavye munthu wakuŵawofya, chifukwa FUMU Mwenenkhongono zose ndiyo yayowoya.

⁵Pakuti ŵanthu wose ŵakwenda wose kwakuyana na ŵachiuta wawo. Kweni ise tendenge mu zina la FUMU, Chiuta withu kwa muyirayira.

⁶FUMU yikuti, “Mu zuŵa ilo ndamkuŵika pamoza ŵakupendera. Ndamkuŵawunganya ŵakuchimbizgika, ndiposo na awo ndili kuŵaŵika mu visuzgo.

⁷Ine FUMU ndamkuŵazgora ŵakupendera kuŵa ŵanthu ŵane. Ŵakuchimbizgika ndamkuŵazgora kuŵa mtundu wa nkhongono. Ine FUMU ndamkuŵawusa iwo mu Phiri la Ziyoni, kufuma nyengo iyi mpaka muyirayira.

⁸Ndipo iwe, We chigongwe cha mskambo wa mberere, linga la ŵanthu ŵa mu Ziyoni, ivyo nkhapangana nawe vizamkuchitika. Ufumu wako wakale wizamkukuwereraso ufumu wa ŵanthu ŵa mu Yerusalemu wizamkwizaso.

⁹Kasi ukulirirachi mwakuchemerezga ntheura? Kasi ulije karonga mwa iwe? Kasi movwiri wako wali kufwa, mwakuti urwirwi wakusanga nga ndi mwanakazi para wali pafupi kubaba?

¹⁰Imwe ŵanthu ŵa mu Ziyoni, vivirani pasi na kutampha, nga ndi mwanakazi para wali pafupi kubaba. Pakuti sono mufumengemo mu msumba na kukhara mu thengere, ndipo mwizamkuruta ku Babuloni. Kwenekura mwamkuthaskika, kwenekura FUMU yamkumuwombolani kufuma mu mawoko gha ŵarwani ŵinu.

¹¹Sono mafuko ghanandi ghawungana kuti ghimikane namwe.” Iyo yikuti, “Yerusalemu wakazuzgike, ndipo tiwone kumara kwa msumba wa Ziyoni.”

¹²Kweni ŵakumanya chara maghanoghano gha FUMU. Ŵakumanyiska chara unozgero wakhe, kuti waŵawunganya kuŵalanga nga ndi mikukwe pa luwugha iyo yabulika.

¹³Wukani na kubula, imwe ŵa mu Ziyoni. Ndimuzgoraninge ŵankhongono nga nkhambako ya lusengwe lwa chisulo na vikandiro vya mkuŵa. Ŵanthu ŵanandi muti muŵaphwanye tuchokotuchoko, na kupereka ivyo ŵakaviskogha kwa FUMU ndiposo chuma chawo kwa Fumu ya charu chose cha pasi.