Read new_tumbuka_bible Mika 5 Bible Online

Mika 5 - new_tumbuka_bible bible

Mika 5

¹Sono mwa ŵanthu ŵa mu Yerusalemu nozgekerani nkhondo, pakuti ŵarwani ŵazingirizga msumba ndipo iwo ŵamutimbenge murongozgi wa Israele pa thama na ndodo.

²FUMU yikuti, “Kweni iwe, Betelehemu Efurata, wa mweneiwe ndiwe muchoko chomene mu mbumba za Yuda, mwa iwe ndamkufumiska yumoza uyo wamkuŵa murongozgi mu Israele, mweneuyo jando lakhe nda mwaka kufuma mazuŵa gha kale chomene.”

³Ntheura FUMU yamkuŵajowola ŵanthu ŵakhe mpaka nyengo yikwane yakuti uyo wali mu vyakuŵinya vya kubaba waphokwe. Penepapo ŵanthu ŵakhe ŵa ku umikori awo ŵakharako ŵati wawerere ku ŵaIsraele ŵanyawo.

⁴Ndipo wizamkuwusa ŵanthu ŵakhe nga ndi muliska mu nkhongono za FUMU, na mu uchindami wa zina la FUMU, Chiuta wakhe. Ndipo ŵamkukhara mu kufwasa, pakuti sono iyo wamkuŵa mukuru mpaka ku mphererekezgo za charu.

⁵Ndipo wamkwiza na mutende. Para ŵaAsiriya ŵiza na nkhondo mu charu chithu, na kukanda mu zimphara zithu, tamkuŵatumira ŵarongozgi ŵa ŵasilikari ŵankhonde na ŵaŵiri ndiposo na nduna zinkhonde na zitatu.

⁶Ŵamkuwusa charu cha Asiriya na lupanga, na kunjira mu vipata vya charu cha Nimurodi. Ŵamkutithaska ku ŵaAsiriya para ŵakwiza mu charu chithu na kukakanda mphaka za charu chithu.

⁷Penepapo ŵakukharako ŵa Yakhobe ŵamkuŵa mukati mwa ŵanthu ŵanandi nga ndi jumi la kufuma kwa FUMU, nga ndi vura pa utheka. Iwo ŵamkugomezga mwa FUMU, munthu chara, nesi ŵana ŵakhe.

⁸Ndipo ŵakukharako ŵa Yakhobe ŵamkuŵa mukati mu ŵamitundu, nga ndi nkharamu mukati mu vikoko vya mu thengere, nga nkhamwana ka nkharamu pakati miskambo ya mberere na mbuzi. Para kakwenda mukati kakutwazura tuchokotuchoko, kulije na yumoza wakuthaska.

⁹Woko lako lithereskenge ŵarwani ŵako wose, ndipo ŵavimphindikwa ŵako wose ŵamkukomeka.

¹⁰FUMU yikuti: Ndipo mu zuŵa ilo, ndamkumaramo mahachi ghinu na kughapasura magareta ghinu.

¹¹Ndipo ndamkumaramo misumba ya mu charu chinu na kuwiskira pasi malinga ghinu ghose.

¹²Ndamkumaramo ŵamaula mukati mwinu, ndipo pamkuŵavye ŵawukwi pakati pinu.

¹³Ndipo ndimarenge vikozgo na mizati yawo, kufuma mukati mwinu. Ndipo mungasopangaso chara milimo ya mawoko ghinu.

¹⁴Ndipo ndizgurenge vikozgo vyinu vya Ashera mukati mwinu, na kupankhura misumba yinu.

¹⁵Ndipo mu ukari ukuru ndiwezgerenge nduzga ku mafuko ghambula kupulikira ine.