Read new_tumbuka_bible Mika 6 Bible Online

Mika 6 - new_tumbuka_bible bible

Mika 6

¹Pulikani icho FUMU yikuyowoya. Wukani, pataurani mrandu winu panthazi pa mapiri, tumapiri tupulike mazgu ghinu.

²Pulikani, imwe mapiri, na imwe malufura ghakukhora gha charu cha pasi, makani gha mrandu kwa FUMU. Pakuti FUMU yili na mrandu na ŵanthu ŵakhe, ndipo yimikanenge na Israele.

³Imwe ŵanthu ŵane, kasi ndachitachi kwa imwe? Kasi ndamuvuskani mu vichi? Ndizgorani!

⁴Pakuti nkhamufumyani mu charu chira cha Eguputo, na kumuwombolani imwe kufuma ku nyumba ya uzga. Nkhamutumirani Mozesi kumurongozgani ndipo nkhatumaso Aroni na Miriyamu.

⁵Imwe ŵanthu ŵane, kumbukani icho Balaki karonga wa Mowabu wakapanga, na umo Balaamu mwana wa Beyoro wakamuzgolera iyo, na ivyo vikachitika kufuma ku Shitimu kuya kafika ku Giligala, mwakuti mumanye kugomezgeka kwa FUMU.

⁶“Nchichi icho ndiperekenge panthazi pa FUMU, na kwiza kajikama nacho ndekha panthazi pa Chiuta wa kuchanya? Kasi ndizenge panthazi pakhe na sembe zakocha, na ŵana ŵa ng'ombe ŵa chirimika chimoza?

⁷Kasi FUMU yikondwerenge na mberere zanarume vikwivikwi, panji na mafuta ghakuzura viŵiya vinandinandi? Kasi ndipereke mwana wane wa uŵere chifukwa cha majuvyo ghane, chipambi cha thupi lane chifukwa cha zakwananga zane?”

⁸Iwe wa munthu, FUMU yakurongora icho nchiweme. Ivyo FUMU yikukhumba ndi ivi: Kuchita icho nchakunyoroka, kutemwa kuchita lusungu, na kuŵa na umoyo wakujiyuyura, mu wenenawene na Chiuta wako.

⁹Lizgu la FUMU likuchemerezga ku msumba. Munthu wakopa FUMU ngwa vinjeru. Pulikani imwe fuko na wumba wa mu msumba!

¹⁰Kasi ndingaruwa vyuma vya uheni mu nyumba ya ŵaheni, panji miyeso yakupimira iyo njakupusika pakuguliska?

¹¹Kasi ndimupimenge wambula mrandu uyo wali na thumba la miyeso yiheni na vyakupimira vyakupusika?

¹²Ŵasambazi winu ŵazura na mbembe. Awo ŵakukhara mukati mwinu ŵakuyowoya mautesi, na lulimi lwawo ŵakuyowoya maboza pera.

¹³Pa chifukwa ichi ndambako kumutimbani kumuzgorani pharaniko chifukwa cha zakwananga zinu.

¹⁴Mwamkurya, kweni mwamkukhuta chara. Mupulikenge njara mukati mwinu. Mwamkuwunjika vinthu, kweni vyamkusungika chara. Icho mwasungilira chamkumalira ku nkhondo.

¹⁵Mwamkuseŵa, kweni kuti mwamkuvuna chara. Mwamkuponda maolive, kweni mwamkuphakara mafuta ghakhe chara. Mwamkuponda mpheska, kweni mwamkumwako vinyo lakhe chara.

¹⁶Pakuti mwarondezga vilayizgo vya Karonga Omuri, na milimo yose ya mbumba ya Ahabu mwana wa Omuri. Mwarutirizga maluso ghawo. Ntheura ndimuparanyaninge, ndipo ŵanthu ŵinu ŵahoyekenge. Mwamkuŵa chisunjizgo cha ŵamitundu.