Read new_tumbuka_bible Mika 7 Bible Online

Mika 7 - new_tumbuka_bible bible

Mika 7

¹Soka kwa ine! Pakuti ndaŵa nga ndi munthu uyo wakuwunganya vipambi vya pa chihanya, uyo wakuvulura mu munda wa mpheska. Mulije nanga ndi khunje la mpheska kuti ndirye. Mulije nanga ndi chipambi cha chikuyu chakudanga kuphya, cheneicho mtima wane ukudokera.

²Ŵanthu ŵakusopa Chiuta ŵamara mu charu cha pasi, ndipo palije murunji mukati mwawo. Wose ŵakukhazga kuti ŵathiske ndopa, ndipo waliyose wakusaka munyakhe na ukonde.

³Mawoko ghawo ghakukora icho nchiheni, na kuchichita na phamphu lose. Karonga na mweruzgi ŵakufumba chibundi, ndipo munthu wakuzirwa wakuyowoya icho mtima wakhe ukukhumba. Ntheura ŵakubendezga mrandu.

⁴Munthu muweme kwakuruska mukati mwawo wali nga ndi nthura. Wakunyoroka chomene mukati wawo wali nga ndi luŵigho lwa minga. Zuŵa la chilango lafika, leneilo ŵalinda ŵawo, zinchimi, ŵakayowoya. Sono kutimbanizgika kwawo kwaneng'enera.

⁵Ureke kugomezga muzengezgani wako, nanga nkhuŵika chigomezgo mu mubwezi wako. Ujikore mu mayowoyero ghako nanga nkhwa muwoli wako wa pa mtima.

⁶Pakuti mwana mwanarume wakuwukira ŵawiske, mwana mwanakazi nayo wakuwukira ŵanyina, ndipo mukamwana nayo wakuwukira ŵanyinavyara. Ŵarwani ŵa munthu ndi awo mba mu nyumba yakhe.

⁷Kweni ine, nditi ndilaŵiske kwa FUMU, nditi ndimulindilire Chiuta kuti wandiponoske, Chiuta wane wati wandipulike.

⁸Iwe wa murwani wane, ungakondweranga pa ine chara. Para ndawa, nditi ndiwuke, para nkhukhara mu chisi, FUMU yiti yiŵenge ungweru wane.

⁹Nditi ndipokerere ukari wa FUMU chifukwa ndayinangira. Yiti yindiyowoyere mrandu wane, na kunderuzga. Yiti yinditorere ku ungweru, ndipo ndizamkuwona urunji wakhe.

¹⁰Ntheura murwani wane wizamkuwona, ndipo soni zizamkumukora mweneuyo wakatenge kwa ine, “Kasi FUMU, Chiuta wako wali nkhu?” Ndamkuwona umo wamkukandirizgikira pasi, nga ndi mathipa mu ŵagurwe ŵa mu msumba.

¹¹Ndilo lamkuŵa zuŵa lakuzengeraso viliŵa vyako! Mu zuŵa ilo mphaka yamkutandaukirako chomene.

¹²Mu zuŵa ilo ŵanthu ŵamkwiza kwa iwe kufuma ku charu cha Asiriya kuya kafika ku charu cha Eguputo, ndiposo kufuma ku charu cha Eguputo kuya kafika ku mronga wa Yufurate, kufuma ku nyanja kuya kafika na ku nyanja yinyakhe, ndiposo kufuma ku phiri kuya kafika ku phiri linyakhe.

¹³Kweni charu chamkukhara mapopa chifukwa cha ŵanthu awo ŵakukharamo, chifukwa cha vipambi vya milimo yawo.

¹⁴Na ndodo yinu liskani ŵanthu ŵinu ŵeneawo ndi mskambo wa chiharo chinu. Iwo ŵakukhara pa ŵekha mu thengere, mukatikati mu charu icho ncha utheka. Ŵarekani ŵaryenge mu chigaŵa cha Bashani na cha Gileyadi nga ndi umo ŵakachitiranga kale.

¹⁵FUMU yikuti, “Ndamkuŵarongora vinthu vya kuzizwiska nga ndi mu mazuŵa agho mukafumiranga mu charu cha Eguputo.”

¹⁶Ŵamitundu ŵamkuwona na kukhozgeka soni pakuŵavye nkhongono zose. Ŵamkuŵika mawoko pa milomo yawo, ndipo makutu ghawo ghamkuŵa ghakumangwa.

¹⁷Ŵamkumyanga fuvu nga ndi njoka, nga ndi vinyama vyakukhwaŵa pasi. Ŵamkufuma mu malinga ghawo uku ŵakutenthema. Mu chitenthe chikuru ŵamkuzgokera kwa Fumu Chiuta withu, ŵamkuŵa na wofi chifukwa cha iwe.

¹⁸Ndi Chiuta nju uyo wakuyana namwe, uyo wakugowokera zakwananga? Iyo wakujumphapo waka pa majuvyo gha ŵanthu ŵakhe. Kuti wakusungilira ukari wakhe kwa muyirayira chara, chifukwa wakukondwera kurongora chisungusungu chakhe.

¹⁹Wamkuŵa na chiwuravi pa ise, ndiposo wamkughakandirizgira pasi maubendezi ghithu. Wamkutaya mauheni ghithu ghose mu ndimba ya nyanja.

²⁰Imwe mwamkujirongora kuŵa wakugomezgeka kwa Yakhobe wa chisungusungu kwa Abrahamu, nga ndi umo mukarapira ku ŵasekuru ŵithu mu mazuŵa gha kale.