Read new_tumbuka_bible Nahumu 3 Bible Online

Nahumu 3 - new_tumbuka_bible bible

Nahumu 3

¹Soka ku msumba uwo ngwa ndopa, uwo ngwa kuzura utesi na vyakuskogha, weneuwo vyakuskogha vyakhe kuti vikumara chara!

²Pulikani mphomo ya chikoti na ya mikombero, kuchimbira kwa mahachi na kudukaduka kwa magareta!

³Ŵakukwera pa mahachi ŵakurotokera panthazi, ŵakusikiza malupanga ghakugabuka, na mikondo yakung'anima. Pali ŵanandi ŵakukomeka, viwuru vinandi vya vitanda, vitanda vyambula kupendeka. Ŵanthu ŵakukhuŵara mu vitanda para ŵakwenda.

⁴Vyose ivi vyachitika chifukwa msumba uli nga ndi fumukazi ya ŵazaghali. Yikukopa na kutowa kwakhe kwa uryarya. Yikapusikanga mafuko na uzaghali ŵakhe, yikakopanga ŵamitundu na vinthumwa vyakhe.

⁵FUMU Mwenenkhongono zose yikuti, “Wona, kwimikana nawe. Nditi ndikuvure mpaka ku maso kwako, nditi ndirongore nkhule yako ku mafuko ghose, ndipo uti ukhozgekenge soni ku maufumu.

⁶Nditi ndikuponyere vya ukazuzi, nditi ndikusunjizge, na kukuzgora kuti uŵe chimuhoyere.

⁷Wose awo ŵakukuwona iwe, ŵati ŵakuchimbire, na kuti, ‘Msumba wa Nineve wapasuka, kasi ndi njani uyo wati waulirire?’ Kasi ndamkusanga nkhu awo ŵati ŵawusanguruske?”

⁸“Kasi iwe ndiwe muweme kuruska msumba wa Tebesi,[2] uwo ukaŵa mu mphepete mwa mronga wa Nayelo, uwo ukazingirizgika na maji? Kasi nyanja ndiyo yikaŵa linga lakhe, maji ndigho chiliŵa chakhe?

⁹Charu cha Etiyopiya ndicho chikaŵa nkhongono yakhe, cha Eguputo nacho, nkhongono zakhe zambula kumara. Vyaru vya Puti na Libiya ndivyo vikawovwiranga.

¹⁰Ndipouli ŵanthu ŵakhe ŵakakoreka, na kuruta ku umikori. Twana twakhe ŵakatutekenyura tuchokotuchoko, pa vingodya vya misewu ya mu msumba. Ŵakachitirapo mphenduzgo pakugaŵana ŵanthu ŵakhe ŵakuzirwa, ndipo ŵakuruŵakuru ŵakhe ŵakaŵakaka na maunyoro.

¹¹Iwe nawe uti uroŵere na kuhangayika, ndipo wamkupenja malo kuti ubisame ku ŵarwani ŵako.”

¹²“Malinga ghako ghose ghali nga makuni gha vikuyu, agho ghali na vikuyu vyakudanga kuphya. Usange vyasunkhunyika, vikuwira mu mlomo wa uyo wakurya.

¹³Wona wumba wako wa ŵasilikari, wose mbanakazi. Vipata vya charu chako, vili mwazi ku ŵarwani ŵako, moto wamyangura mphingirizgo zakhe.”

¹⁴“Unegherethu maji agho ungizakamwa, mu nyengo ya kujarizgika kwako, ndipo ukhozge malinga ghako. Unjire mu nkhando, ukande dongo, nozgera chikombole kuti uwumbe njerwa!

¹⁵Kwenekura moto wamkukumyangura petu. Lupanga lwamkukukoma, lwamkukumara nga ndi zombe. Wandane uŵe nga ndi zombe, wandane uŵe nga ndi mphazi.

¹⁶Wandaniska ŵamalonda ŵako, kuti ŵaŵe ŵanandi kuruska nyenyezi za kuchanya. Kweni nga ndi zombe, ŵati ŵaskoghe charu, na kuwurukira kutali.

¹⁷Nduna zako zili nga ndi zombe, ŵarongozgi ŵako nga ndi mulembwera wa mphazi, izo zakhara mu viliŵa, mu nyengo ya mphepo. Kweni para dazi lafuma, zikuduka kuya kutali, kukuŵavye na yumoza wakumanya uko zili.”

¹⁸“Iwe karonga wa Asiriya, ŵarongozgi ŵako ŵakusiwa, nduna zako zikugomphora. Ŵanthu ŵako ŵambininikira mu mapiri, kulive na yumoza wakuŵasokorora.

¹⁹Kulive na chakupozga chilonda chako, ncha zoza, chikukomenge. Wose ŵakupulika vya iwe, ŵakukuŵa mapi chifukwa cha kuwa kwako. Pakuti, kasi nkhwa njani uko kulije kuyako uheni wako wambula kureka?”