Read new_tumbuka_bible Habakuku 1 Bible Online

Habakuku 1 - new_tumbuka_bible bible

Habakuku 1

¹Agha ndi mazgu agho nchimi Habakuku wakapokera kufuma kwa Chiuta mu mboniwoni.

²Mwe FUMU, kasi ndirombenge wovwiri mpaka pa uli, ndipo imwe mureke kundipulika? Panji ndichemerezge kwa imwe kuti, “Nkhaza!”, ndipo imwe mureke kundithaska?

³Kasi nchifukwa uli mukukhumba kuti ndiwone, maubendezi agho ŵanthu ŵakuchitirana? Kasi nchifukwa uli mukukhumba kuti ndiwone suzgo ya ntheura? Phasulo na nkhaza vili panthazi pane, mphindano na kulimbana vyazara uku na uku.

⁴Ntheura dango lagowozgeka, ndipo weruzgi wakunyoroka kuti ukuwoneka chara. Pakuti ŵaheni ŵakuŵaruska ŵarunji, mwakuti weruzgi wakunyoroka ukutindiŵizgikira pasi.

⁵Laŵiskani mukati mu mafuko ndipo muwone, muti muzizwe chomene. Pakuti mu mazuŵa ghinu ndizamkuchita mlimo, uwo mwizamkuwugomezga chara, nanga munthu yunji wangiza kamwandulirani.

⁶Pakuti Wonani, nditi ndiwuske ŵaBabuloni, ŵanthu awo mbakari na lupusu. Ŵeneaŵa ŵakwenda uku na uku mu charu, kuya kapoka malo agho kuti ngawo chara.

⁷Mbakofya na ŵakutenthemeska, iwo ŵekha ndiwo weruzgi wakunyoroka, ndipo ŵakujiwunjikira nchindi pa iwo ŵekha.

⁸Ŵakavalo ŵawo ŵakuchimbira kuruska ŵanyalubwe, mbakofya kuruska mphumphi zakutandara na njara, awo ŵakuzigara ŵakwenda mwakujikuzga. Nadi, awo ŵakuzigara ŵafumira kutali, ŵakuwuruka nga ndi nombo, kuya kakora nyama.

⁹Wose ŵakwiza kuti ŵachite nkhaza. Para ŵakwiza wose ŵakopa. Iwo ŵakuyora waka ŵazga nga ndi muchenga.

¹⁰Ŵakuŵayuyura ŵakaronga, ŵakuŵaseŵereska awo ŵakuwusa. Ŵakuseka para ŵakuwona malinga, pakuti iwo ŵakuzenga waka vibumira vya dongo na kupoka linga.

¹¹Penepapo ŵakujumpha nga ndi mphepo na kurutilira, ŵaheni aŵa, ŵeneawo nkhongono zawo ndizo chiuta wawo.

¹²Mwe FUMU, asi ndimwe kufuma ku mutendeko, mwaŵeneimwe ndimwe Chiuta wane, Mutuŵa wane Yura? Ise kuti tifwenge chara. Mwe FUMU, mwimika ŵa charu cha Babuloni, kuŵa ŵeruzgi. Imwe, ndimwe Jarawe lithu, ndipo ndimwe mwaŵimika kupereka chilango ichi.

¹³Maso ghinu ngatuŵa chomene, kuti ghangalaŵiska pa uheni chara, imwe kuti mukurekerera ubendezi chara. “Kasi nchifuwa uli mwakhara waka chete, apo iwo ŵakukoma waka ŵanthu, awo mbarunji kuruska iwo?”

¹⁴Imwe mukuŵazgora ŵanthu, kuŵa nga ndi somba za mu nyanja, nga ndi vyakukhwaŵa ivyo vilije wakuviwusa.

¹⁵Muheni wakuziŵeja zose na mbeja, wakuzitegha na chirepa chakhe, wakuziwunjika mu mukwawu wakhe, ntheura wakusekerera na kukondwera.

¹⁶Pa chifukwa ichi wakupereka sembe ku mukwawu wakhe, ndipo wakocha vyakununkhira ku chirepa chakhe, pakuti na ivi wakukhara makora, ndipo vyakurya vikumuŵira vinandi.

¹⁷Kasi sono warutilirenge kukhutura mukwawu wakhe, na kukoma mafuko kwambula lusungu?