Read new_tumbuka_bible Habakuku 2 Bible Online

Habakuku 2 - new_tumbuka_bible bible

Habakuku 2

¹Nditi ndimilire pa malo ghane ghakulindirirapo, nditi ndikwere pachanya pa chigongwe. Nditi ndilaŵiske kuti ndiwone icho FUMU yindiphalirenge, na umo yindizgorerenge na kusinginika kwane.

²Penepapo FUMU yikandizgora yikati: “Lemba mboniwoni iyi, uyilembe pa mawe ghapapati kuti yiwoneke makora, mwakuti uyo wakusambirapo wendepo luŵiro.

³Pakuti mboniwoni yikulindirira nyengo yakhe, mboniwoni iyi yikwiza luŵiro, kuti yiti yitondekenge chara. Para vikuwoneka kuti vikuchedwa, uyilindilire, yiti yizenge nadi, kuti yichedwenge chara.

⁴Wona, uyo ngwambula kunyoroka, wati watondekenge. Kweni awo mbarunji ŵati ŵaŵenge wamoyo, kwizira mu chipulikano.

⁵Nadi, vyakuloŵezga[1] vikupuruska, munthu uyo wakujikuzga kuti wakhalirirenge chara. Iyo ngwa chigoro nga ndi malo gha ŵakufwa, kuti wakukhuta chara nga ndi nyifwa. Iyo wakujiwunjikira mafuko ghose, ndipo wakuwunjika ŵanthu wose kuŵa ŵakhe.”

⁶Asi wose aŵa, ŵamkumutombozga, kumuyuyura na kumuseka kuti, “Soka kwa uyo wakuwunjika ivyo kuti nvyakhe chara! Kasi wati wachite ichi mpaka pauli? Asi wakujinyekezga na katundu uyo watewura!”

⁷Asi ŵa matewu ŵako, ŵamkukuwukira mwa mabuchibuchi? Asi ŵamkuwuka mu tulo na kukutenthemiska? Penepapo iwe ŵamkuŵa chakuskogha kwa iwo.

⁸Chifukwa iwe waskogha mafuko ghanandi, ŵanthu awo ŵakharako ŵakukuskogha iwe. Pakuti iwe wathiska ndopa za ŵanthu, wachita nkhaza mu charu cha pasi, ku misumba na ku awo ŵakukhara mwenemumo.

⁹Soka kwa uyo wakupenjera nyumba yakhe, chandulo chambula urunji, uyo wakuzenga nyumba ziweme na kuzikhozga, kuyezga kuthaska mbumba yakhe ku urwani.

¹⁰Iwe wanozgera kumara ŵanthu ŵanandi, kukhozga soni nyumba yako na kutaya umoyo wako.

¹¹Pakuti libwe la chiliŵa lamkuchemerezga, ndipo muchiko kufuma mu thabwa wamkuzomerezga.

¹²Soka kwa uyo wakuzenga msumba pakuthiska ndopa, uyo wakwamba muzi kwizira mu ubendezi!

¹³Wonani, asi chikufuma kwa FUMU Mwenenkhongono zose, kuti ivyo ŵanthu ŵakuteŵetera vimarirenge ku moto, kuti mafuko ghajivuske na vyawakawaka?

¹⁴Pakuti charu cha pasi chizurenge na umanyi, wa uchindami wa FUMU, nga ndi umo maji ghakuzulira mu nyanja.

¹⁵Soka kwa uyo wakumweska ŵazengezgani ŵakhe, vya mu nkhombo ya ukari wakhe, ndipo wakuŵaloŵezga kuti waŵakhozge soni.

¹⁶Wamkuzura na muyuyuro mu malo mwa nchindi. Imwa, wamwene, na kupenthyapenthya. Nkhombo iyo yili mu woko la maryero la FUMU, yamkwiza kwa iwe, ndipo soni zizamkubenekerera uchindami wako.

¹⁷Kusakazika kwa makuni gha ku Lebanoni, kwizamkukuzinga iwe. Kukomeka kwa vikoko kwamkukofya iwe. Iwe wathiska ndopa za ŵanthu. Iwe wasakaza charu na misumba ndiposo na wose awo ŵali mwenemumo.

¹⁸Kasi chikozgo chili na chandulo uli? Pakuti uyo wakachipanga ndi munthu, ndipo ndi chisulo chakusambizga utesi pera. Munthu uyo wapanga chikozgo, wakugomezga mu cheneichi, kweni ndi vikozgo vyambula kuyowoya!

¹⁹Soka kwa uyo wakuyowoya ku chikozgo chakuŵaja, kuti, “Wuka!” Panji ku libwe lambula kuyowoya, kuti, “Imilira!” Kasi cheneichi chingapereka uvumbuzi? Wonani, chabenekerereka waka na golide na siliva, ndipo mulije muvuchi na pachoko pose mwa icho.

²⁰Kweni FUMU yili mu Nyumba yakhe yakupatulika. Ŵanthu wose ŵa charu cha pasi, ŵakhare chete panthazi pakhe.