Read new_tumbuka_bible Habakuku 3 Bible Online

Habakuku 3 - new_tumbuka_bible bible

Habakuku 3

¹Kwa uyo wakwimbiska sumu. Mwimbire bango. Lurombo lwa nchimi Habakuku kwakuyana na kayimbiro ka Shigiyonoti.

²Mwe FUMU, ndapulika lumbiri lwinu, Mwe FUMU, mlimo winu ukutenthemeska. Mukati mu mazuŵa ghano, muwuskeso mlimo winu, mu nyengo zithu, umanyikwe mlimo weneuwu, mu ukari winu, mukukumbuka kuchita vya lusungu.

³Chiuta wakiza kufuma mu charu cha Edomu,[2] Mutuŵa Yura kufuma ku Phiri la Parani. Uchindami wakhe ukabenekerera mtambo, ndipo charu chikazura na marumbo ghakhe.

⁴Kung'azima kwakhe kukaŵara nga ndi leza, ungweru ukamwetuka kufuma mu woko lakhe, mwenemumo mukabisika nkhongono zakhe.

⁵Panthazi pakhe pakaŵa chilengo, ndipo pamanyuma pakhe pakaŵa nthenda yakofya.

⁶Wakimilira na kupima charu cha pasi; wakalaŵiska na kuchita kuti mafuko ghatentheme. Penepapo mapiri gha kale na kale ghakaparanyika, tumapiri twa mutatakuya tukabwanthukira pasi. Nthowa yakhe yakwendamo nja kale na kale.

⁷Nkhawona mahema gha ŵanthu ŵa ku Kushani, ghali mu suzgo; salu zakuchinga za ŵaMidiyani zikusunkhunika.

⁸Mwe FUMU, kasi mukakaripa chifukwa cha mironga? Kasi mukakwiyira madambo? Kasi mukatukutwira nyanja, pa nyengo iyo mukakwera pa ŵakavalo ŵinu, magareta ghinu ghakutonda?

⁹Mukafumya uta winu umo ukaŵa, ndipo mukakoroŵeka mivwi pa chingwe. Mukachigaŵa charu pa kwata mironga.

¹⁰Mapiri ghakamuwonani, ndipo ghakatenthema, majigha gha maji ghakupoma, ndimba yikandindima, yikawuskira mawoko ghakhe muchanya na kuthera.

¹¹Dazi na mwezi vikimilira nganganga, mu malo ghawo ghakukharamo, pakumwetuka kwa mivwi yinu yakuwuruka, pakuŵala kwa mukondo winu wakung'azima.

¹²Mu ukari mukenda uku mukudumula charu, ndipo mu kukwiya mukakandira pasi mafuko.

¹³Mukaruta kuya kaponoska ŵanthu ŵinu, kuthaska wakuphakazgika winu. Mukaphwanya mutu wa muheni yura, mukamuvura kufuma ku mutu mpaka ku malundi.[3]

¹⁴Na mivwi yinu, mukalasa murongozgi wa ŵasilikari ŵakhe, para ŵasilikari ŵakhe ŵakiza, nga ndi kavuruvuru kutiparanya ise. Ŵakasekereranga nga ndi ŵachiŵembu, awo ŵaŵawukira ŵakavu mu udesi.

¹⁵Mukakanda pa nyanja na ŵakavalo ŵinu, mu majigha gha maji ghanandi.

¹⁶Nkhapulika, ndipo ine nkhatenthema, mlomo wane ukambwambwantha pakupulika mazgu ghinu. Viwangwa vyane vikamba kuvunda, ndipo malundi ghane ghakaŵavye nkhongono. Nditi ndilindilire chisisi zuŵa la suzgo, apo soka lizamkuwira awo ŵakwimikana nase.

¹⁷Nangauli makuni gha vikuyu ghalije viphukira, nanga ndi vipasi mu makuni gha mpheska, nangauli maolive ghatondeke kupasa, ndipo minda yireke kuŵa na vyakurya, nangauli mberere zimare mu chitupa, ndipo ng'ombe muŵavye mu viŵaya,

¹⁸ndipouli ndikondwenge mwa FUMU, nditi ndiŵe na chimwemwe mwa Chiuta, Muponoski wane.

¹⁹Chiuta, uyo ndi Fumu, ndi nkhongono zane. Iyo wakuzgora malundi ghane kuŵa nga ndi malundi gha nyiska, na kundendeska pa malo ghane ghakukwera.