Read new_tumbuka_bible Zefaniya 1 Bible Online

Zefaniya 1 - new_tumbuka_bible bible

Zefaniya 1

¹Agha ndi mazgu gha FUMU agho ghakiza kwa Zefaniya mwana wa Kushi, mwana wa Gedaliya, mwana wa Amariya, mwana wa Hezekiya, mu nyengo iyo Yosiya mwana wa Amoni wakaŵa karonga wa charu cha Yuda.

²FUMU yikuti, “Nditi ndiparanye nkhanira vyose ivyo vili pa charu cha pasi.

³Nditi ndimare petu ŵanthu na vikoko. Nditi ndimare petu viyuni vya mudera na somba za mu nyanja. Nditi ndiŵapankhure ŵaheni, na kuŵamalirathu ŵanthu pa charu cha pasi.” Ntheura ndimo yikuyowoyera FUMU.

⁴“Ndinyoroskenge woko lane kuti ndilange ŵanthu ŵa mu Yuda na wose awo ŵakukhara mu Yerusalemu. Ndiwuskengemo mu malo agha chisopo cha Baala icho chakharako, na ŵasofi ŵakusopa iyo.

⁵Ndiŵamarenge wose awo ŵakusindama pa mtenje kusopa dazi, mwezi, na nyenyezi. Ndimarengeso awo ŵakusopa FUMU na kupangana kuti ŵagomezgekenge kwa iyo kweni ŵakupanganaso kwa chiuta Milikomu.

⁶Ndiŵamarenge awo ŵawerera nyuma pakureka kurondezga FUMU, awo ŵakumupenja FUMU chara nesi kufumbako kwa iyo.”

⁷Muŵe chete panthazi pa FUMU Chiuta! Zuŵa la FUMU laneng'enera. FUMU yanozgera sembe ndipo yapatuliska ŵakuchemeka ŵakhe.

⁸Ndipo pa zuŵa la sembe ya FUMU, “Ndilangenge nduna na ŵana ŵa ŵakaronga na wose awo ŵakutorera makhaliro gha chilendo. Ntheura ndimo yikuyowoyera FUMU.

⁹Pa zuŵa ilo ndilangenge yose uyo wakusopa vikozgo ndiposo na awo ŵakuzuzga nyumba ya sekuru wawo na nkhaza na upusikizgi.”

¹⁰FUMU yikuti, “Mu zuŵa ilo nchemerezgo yamupulikikwa kufuma mu Chipata cha Somba. Kwamkupulikikwa kulira kufumira ku Chigaŵa cha Chiŵiri cha msumba, chongo cha kuwa kwa vinthu kufuma pa mapiri.

¹¹Tengerani, imwe muli mu chidika cha msumba, chifukwa ŵamalonda wose ŵafwa, awo ŵakuguliska siliva ŵakomeka.

¹²Pa nyengo iyo nditi ndipenjerezgenge mu Yerusalemu na nyali. Nditi ndiŵalange ŵanthu awo ŵakujikhalira waka chete kwambula kulorako kalikose. Iwo ŵakuti mu mitima yawo, ‘FUMU yichitengepo uweme chara, nanga nkhuchitapo uheni.’

¹³Mphango zawo zamkuskogheka, ndipo nyumba zawo zamkupasuka. Nanga ŵazenge zinyumba kuti ŵamkukharamo chara. Nanga ŵapande minda ya mpheska, kuti ŵamkumwa vinyo lakhe chara.

¹⁴Zuŵa likuru la FUMU laneng'enera, liri pafupi ndipo likwiza maluŵiro. Kamphomo ka zuŵa la FUMU nkhakuŵaŵa, nanga nchinkhara chamkulira kwenekura.

¹⁵Ili ndi zuŵa la ukari wa FUMU, zuŵa la suzgo na kukweŵeka mtima, zuŵa la phasulo na pharaniko, zuŵa la chisi na mdima, zuŵa la maŵingu na chisi chikuru.

¹⁶Ili ndi zuŵa la kulira kwa mbata na kulalata kwa ŵasilikari, kulimbana na misumba ya malinga ndipo na vigongwe vitali.

¹⁷Ndizenge na suzgo pa ŵanthu, mwakuti ŵizamkwenda nga mbachiburumutira chifukwa ŵanangira FUMU. Ndopa zawo zithikenge nga ndi fuvu, mathupi ghawo ghamkuŵa ngundangunda nga mbulongwe.

¹⁸Siliva panji golide lawo kuti vyamkumanya kuŵathaska chara pa zuŵa la ukari wa FUMU. Charu chose chamkuphya mu moto wa sanje ya ukari wakhe. Nadi maluŵiro iyo yamkuŵamara petu, wose awo ŵakukhara mu charu.”