Read new_tumbuka_bible Zefaniya 2 Bible Online

Zefaniya 2 - new_tumbuka_bible bible

Zefaniya 2

¹Imwe mwa ŵanthu ŵambula soni wunganani pamoza,

²pambere mundachimbizgike nga ndi mwerero wakawuruka, pambere ukari wakofya wa FUMU undize pa imwe pambere zuŵa la ukari wa FUMU lindize pa imwe.

³Penjani FUMU, mose imwe mukujiyuyura mu charu, imwe mukusunga marango ghakhe. Penjani urunji, penjani kujiyuyura, panji muti mubisikenge pa zuŵa la ukari wa FUMU.

⁴Pakuti Gaza wazgokenge mapopa, ndipo Ashikeloni wapasukenge. Ŵanthu ŵa ku Ashidodi, wachimbizgikenge muhanya pakati, ndipo Ekuroni wamkuzgoka mahami.

⁵Soka kwa imwe mukukhara mu mphepete mwa nyanja, imwe fuko la ŵaKereti! Mazgu gha FUMU ghakumususkani, imwe mwa ŵanthu ŵa Kanani, charu cha ŵaFilisiti. Nditi ndimumarani petu, mpaka kuŵavye na yumoza wakukharako.

⁶Ndipo iwe charu cha mu mphepete mwa nyanja wamkuzgoka waka maluhari, madambo gha ŵaliska na vitupa vya miskambo mberere na mbuzi.

⁷Charu cha mu mphepete mwa nyanja chamkuŵa cha ŵakukharako ŵaYuda, kwenekura ŵaliskenge miskambo yawo. Mu zinyumba za msumba wa Ashikeloni ŵamkugona. Chifukwa FUMU, Chiuta wawo wizamkuŵakumbuka, na kuŵawezgera mauweme ghawo.

⁸Ndapulika ŵaMowabu ŵakusunjizgika umo ŵaAmoni ŵakutuka, na umo ŵasunjizgira ŵanthu ŵane na umo ŵajikuzgira mu charu chawo.

⁹FUMU Mwenenkhongono zose, Chiuta wa Israele, wakuti, kwa chifukwa ichi, nkhurapa nadi nkhuti, “ŵaMowabu waŵenge nga Sodomu, ndipo ŵaAmoni nga Gomora, charu cha nkhunga na cha muchere, na malo agho nga chiparamba muyirayira. Ŵakukharako ŵa ŵanthu ŵane ŵamkuŵapasura. Ŵakukhara ŵamoyo ŵa mtundu wane ŵamkuŵaskogha.”

¹⁰Ichi ndicho chiŵenge chilango pakujikuzga kwawo, chifukwa cha nthombozgo na kujikuzga pa ŵanthu ŵa FUMU Mwenenkhongono zose.

¹¹FUMU yisungunurenge mitima yawo, nadi, FUMU yiŵazgorenge wose ŵachiuta ŵa mu charu nga nkhanthu chara. Ndipo kwa iyo ndiko ŵajikamirenge, wose mu malo ghakhe, mu vyaru vyose vya mafuko.

¹²Imwe namwe, ŵaEtiyopiya, muti mukomekenge na lupanga lwane.

¹³FUMU yiti yiŵalange ŵa ku mpoto, na kubwangandula Asiriya. Yamkuzgora Nineve kuŵa mapopa, mapopa gha chiparamba.

¹⁴Miskambo yamkugona pasi mukati mwakhe, na vinyama vyose vya mu thengere. Makuŵi na ŵakhwitha vikharenge pachanya pa nchindamira zakhe. Phururu wamkulira pa chidangazi, chihoŵe nayo wamkulira pa miryango, pakuti mizati ya milanje yamkuŵa pakweru.

¹⁵Uwu ndi msumba wakujikuzga uwo ukakhara mu kufwasa. Msumba uwu ukati kwa iwo wekha, “Ine ndine, ndipo kulijeso munyakhe.” Nkhupasuka uli uku, kuti ghazgoke malo ghakupumulirapo vinyama vya mu thengere! Waliyose uyo wakujumphapo wakusunjizga na kupukunya mutu.