Read new_tumbuka_bible Zefaniya 3 Bible Online

Zefaniya 3 - new_tumbuka_bible bible

Zefaniya 3

¹Soka kwa msumba wa chigaruka na wakukazuzgika, msumba uwo ukunyekezga ŵanthu.

²Msumba uwu ukupulikira mazgu gha nchenjezgo chara, nesi kulorako kuchenyeka. Ukugomezga mwa FUMU chara, nesi kufumba wovwiri kwa Chiuta wakhe.

³Ŵarongozgi ŵakhe mukati mwakhe ŵali nga ndi nkharamu zakuwuruma. Ŵeruzgi ŵakhe ŵali nga mphumphi ku na mise, izo zikusidako kalikose chara kakurya na mulenje.

⁴Nchimi zakhe mbanthu ŵakupuruska, ŵambula kupwererako. Ŵasofi ŵakhe ŵakukazuzga icho nchakupatulika, ŵakuswa dango kwambula soni.

⁵FUMU yikuchita urunji mu msumba ura, kuti yikuchita uheni chara. Zuŵa lirilose yikurongora weruzgi wakunyoroka, kuŵala kwa dazi kulikose kuti yikutondekapo chara. Kweni ŵakubendera ŵakuchita soni chara.

⁶FUMU yikuti, “Ndamara petu mafuko gha ŵanthu, ndawiskira pasi malinga ghawo. Ŵagurwe ŵa misumba ghazgoka mapopa, ntheura palije na yumoza wakwendamo. Misumba yawo yazgoka kuŵa mayiyi, yilije munthu na yumoza wakukharamo.

⁷Nkhati, ‘Nadi ŵati ŵandichindike, ŵati ŵapokerere mazgu gha kuchenya kwane.’ Kuŵenge ntheura, mphanyi msumba wawo ndawulanga chara nesi kuwuparanya. Kweni ŵanthu ŵanweka nga mpha kudanga kuchita mauheni ghakupambanapambana”.

⁸FUMU yikuti, “Ndilindizgani, lindizgani zuŵa ilo ndamkuwuka kuŵa kaboni. Pakuti ndadumula kuwunjika mafuko gha ŵanthu, kweniso kuwunganya pamoza maufumu, kuti ndipungulire ukari wane pa iwo, kutukutwa kwa ukari wose. Mu moto wa ukari wa sanje yane, charu chose cha pasi chamkuphya.”

⁹Inya, pa nyengo iyo ndamkuphotora kayowoyero ka ŵanthu kuti kaŵe kaweme, mwakuti wose ŵasopenge mu zina la FUMU, na kuyiteŵetera na mtima umoza.

¹⁰Kufuma ku sirya kwa mironga ya charu cha Etiyopiya awo ŵakundisopa ine, mukati mwa awo ŵali kumbininikira kosekose ŵizenge na vyakupereka kwa ine.

¹¹Pa nyengo yira mwamkukhozgeka soni chara, chifukwa cha milimo ya uchigaruka uwo mukandichitira ine. Pakuti ndamkuwuskamo mukati mwinu ŵakujikuzga, ndipo mwamkuŵaso ŵakujitukumura chara mu phiri lane lakupatulika.

¹²Kweni ndamkuŵasida mukati mwinu ŵanthu awo mbakuzika na ŵakujiyuyura. Iwo ŵamkupenja chakuphokweramo mwa FUMU.

¹³ŴaIsraele awo ŵamkukharako ŵachitengeso uheni chara, panji nesi kuyowoya utesi, nesi milomo yawo kuyowoya yiryarya. Pakuti ŵaryenge na kugona pasi, kulije na yumoza uyo wizamkuŵawofya.

¹⁴Yimbani mwakukwezga mwa ŵanthu ŵa ku Ziyoni, chemerezgani, imwe mwa ŵaIsraele! Kondwani na kusekerera na mtima winu wose, imwe mwa ŵanthu ŵa mu Yerusalemu!

¹⁵FUMU yareka kumulangani, ŵarwani ŵinu ya ŵaponya kuwaro. Karonga wa Israele, uyo ndi FUMU wali mukati mwinu. Ntheura mopengeso kaheni chara.

¹⁶Pa nyengo yira kwamkuyowoyeka kwa Yerusalemu kuti, “Ungopanga iwe Ziyoni, ungathikanga lusoko chara.

¹⁷FUMU, Chiuta wako wamkuŵa mukati mwako, nga nchinkhara chakukutondera. Yamkusekerera chifukwa cha iwe na kukondwa, yamkukhara chete chifukwa cha kutemwa kwakhe. Yamkumwemweterera na nchemo ya chimwemwe chifukwa cha iwe”.

¹⁸“Nga ndi pa zuŵa la chiphikiro, Ndamkuwuskapo soka pa iwe, mwakuti ureke kulengeskeka nalo.

¹⁹Wonani, pa nyengo iyo ndamkuchita nawo kanthu wose awo ŵakamunyekezganinge. Ndipo ndamkuŵathaska ŵakupendera, na kuwunganya ŵakuparanyika, ndipo ndizgorenge soni zawo kuŵa marumbo na lumbiri lwa kutandazgika pa charu chose cha pasi.

²⁰Pa nyengo yira ndamkumuwezgerani ku kwinu, penepapo ndamkumuwunganyani pamoza. Nadi, ndamkumuzgorani ŵakumanyikwa na ŵakurumbika mukati mu ŵanthu wose ŵa pa charu cha pasi, Para ndamkumuwezgerani usambazi winu pakufuma ku umikori mwamkuwuwona.” Ntheura ndimo yikuyowoyera FUMU.