Read new_tumbuka_bible Zakariya 10 Bible Online

Zakariya 10 - new_tumbuka_bible bible

Zakariya 10

¹Rombani vura ya nyambwani kwa FUMU, pa nyengo ya kwenerera. Rombani kwa FUMU iyo yikupanga maŵingu gha chimphupuru. Iyo yikuŵapa ŵanthu vura ya muswera ndipo yikumupaso waliyose mumera mu munda.

²Pakuti ŵangoza ŵakuyowoya vya wakawaka, ŵaroski nawo ŵakuroska vya utesi. Awo ŵakulota ŵakuphara maloto gha utesi na kupereka chisangurusko cha waka. Pa chifukwa ichi ŵanthu ŵakuyinga nga ndi mberere zakusoŵa. Iwo ŵali mu suzgo chifukwa ŵalije mliska.

³Ukari wane ukugolera kususkana na ŵaliska, ndipo nditi ndiŵalange ŵarongozgi aŵa. Pakuti FUMU Mwenenkhongono zose yikupwererera mskambo wakhe, uwo mbaYuda. Yiti yiŵazgore kuŵa mahachi agho ŵakujikuzga nagho mu nkhondo.

⁴Mwa iwo mwizamkufuma ŵanthu awo ŵali nga ndi mawe gha nkhorezgero ya chingodya, awo ŵali nga ndi chikhomo cha hema awo ŵali nga ndi uta wa nkhondo. Mwizamkufuma wose awo ŵakuwusa.

⁵Wose pamoza ŵamkuŵa nga ndi vinkhara mu nkhondo, kukandira pasi ŵarwani mu mathipa gha mu misewu. Ŵamkurwa, chifukwa FUMU yili nawo, ndipo ŵamkuŵatonda awo ŵakukwera pa mahachi.

⁶Ndamkuyikhozga mbumba ya Yuda, na kuyithaska mbumba ya Yosefe. Ndamkuŵawezga chifukwa ndili nawo na chiwuravi. Ŵamkuŵa nga ndi para nkhaŵavye na kuŵataya. Pakuti ndine FUMU, Chiuta wawo, ndamkupulika kuromba kwawo.

⁷Ntheura ŵaEfurayimu ŵamkuŵa nga ndi chinkhara cha nkhondo. Ŵamkukondwa mu mitima yawo nga mbanthu awo ŵamwa vinyo. Ŵana ŵawo ŵamkuchiwona na kusekerera, mitima yawo yamkukondwera mwa FUMU.

⁸“Ndamkuŵarizgira kaluvi kuti ŵize chifukwa ndaŵawombola ndipo ŵamkuŵa ŵanandi nga ndi umo ŵakaŵira kale.

⁹Nanga nkhaŵambininiskira mu ŵamitundu, ndipouli ŵizamkundikumbuka mu vyaru vya kutali. Iwo na ŵana ŵawo ŵizamkuŵa na umoyo, wose ŵizamkuwerako.

¹⁰Ndamkuŵatorera ku kwawo kufuma nawo ku charu cha Eguputo na kuŵawunganya kufuma mu charu cha Asiriya. Ndamkwiza nawo ku charu cha Gileyadi na cha Lebanoni ŵasuke ŵazure mu charu.

¹¹Ŵamkuporota nyanja ya visuzgo, ndipo majigha gha nyanja ghamkukanizgika, ndipo ndimba zose ya mronga wa Nayelo, zamkukamuka. Kujikuzga kwa charu cha Asiriya kwamkukhizgikira pasi, ufumu wa charu cha Eguputo wamkuwuskikako.

¹²Ndamkuŵakhozga mwa ine FUMU, ndipo ŵamkuthumbwira mwa ine.” Ntheura ndimo yikuyowoyera FUMU.