Read new_tumbuka_bible Zakariya 11 Bible Online

Zakariya 11 - new_tumbuka_bible bible

Zakariya 11

¹Jura miryango yako iwe Lebanoni, mwakuti moto umyangure makuni ghako gha milanje!

²Tegherezga iwe khuni la mulombwa, chifukwa khuni la milanje lawa, pakuti makuni ghakuchindikika ghanangika! Tengerani imwe misoro mu charu cha Bashani pakuti nkhorongo ya kukhora yawiskikira pasi!

³Pulikani, kutengera kwa ŵaliska pakuti uchindami wawo wapankhuka. Pulikani kubangura kwa nkharamu, pakuti matundu gha Yorodani ghazgoka chiparamba.

⁴Ntheura FUMU, Chiuta wane wakuti, “Uliskenge mskambo wa mberere na mbuzi uwo wapimikira ku kukomeka.

⁵Awo ŵakuwugula ŵakujikomera umo ŵakhumbira kwambula kulangika. Ndipo awo ŵakuwuguliska ŵakuti, ‘Yitumbikike FUMU, sono ndine musambazi.’ Kweni iwoŵene ŵaliska ŵakuŵa nawo na chiwuravi chara.”

⁶Ndipo FUMU yikuti, “Nane kuti ndiŵe na chiwuravi chara nanga nkhu yumoza awo ŵakukhara mu charu cha pasi. Kweni munthu yose waŵenge pasi pa mazaza gha mliska wakhe. Ndipo waliyose waŵenge pasi pa mazaza gha karonga wakhe. Iwo ŵamkuchibwangandula charu, ndipo ndamkumuthaska chara nanga ndi munthu yumoza kufuma mu mazaza ghawo.”

⁷Ntheura nkhaŵa mliska wa mskambo wa mberere na mbuzi izo zikenera kukomekera awo ŵakaguliskanga. Ndipo nkhatora ndodo ziŵiri. Yakudanga yikachemeka, “Uchizi,” yinyakhe yikachemeka, “Umoza.” Ndipo nkhawuska mberere na mbuzi zira.

⁸Mu mwezi umoza nkhaŵakanizga ŵaliska ŵatatu. Kweniso nkhatondeka kuŵazizipizgira. Iwo nawo ŵakanditinkha.

⁹Ntheura nkhati, “Ndiŵenge muliska winu chara. Rekani chifwe icho chikwenera kufwa, rekani chiparanyike, icho chikwenera kuparanyika, ndipo rekani awo ŵakharako ŵarye nyama ya yumoza na munyakhe.”

¹⁰Ndipo nkhatora ndodo yane yakuchemeka “Uchizi,” ndipo nkhayiphyora, kurongora kuswa phangano leneilo nkhapangana na mafuko ghose.

¹¹Ntheura phangano likasweka nadi pa zuŵa lenelira, ndipo ŵakaguliskananga mberere. Awo ŵakandiraŵiriranga, ŵakamanya kuti ghakaŵa mazgu gha FUMU.

¹²Ntheura nkhati kwa iwo, “Usange chikuwoneka chiweme kwa imwe, mundipe njombe yane, kweni usange chara, sungani.” Ndipo ŵakapima ndarama za siliva 30 kuŵa njombe yane.

¹³Ndipo FUMU yikati kwa ine, “Ukaghaponye mu chakusungiramo ndarama, njombe iyo ŵakandigula. Ntheura nkhatora ndarama za siliva 30 na kughaponya mu chakusungiramo ndarama mu Nyumba ya Chiuta.”

¹⁴Ndipo nkhaphyora ndodo yane ya chiŵiri yakuchemeka Umoza, kurongora kumazga wenenawene pakati pa Yuda na Israele.

¹⁵Penepapo FUMU yikati kwa ine, “Toraso viteŵetero vya mliska wakupusa.

¹⁶Wona nkhukhazikiska mliska mu charu mweneuyo wati wapwererere mberere zakufwa chara nanga nkhupenja izo zikuyingayinga, panji kuchizga za kugontha, nanga nkhuziryeska zamoyo, kweni wakurya nyama ya izo nzakututuŵa chomene, wakurya na vikandiro vyawo uwo.”

¹⁷“Soka kwa mliska wawakawaka, uyo wakusida mskambo wakhe! Rekani lupanga ludumure woko lakhe, na ku dorora jiso lakhe.” Ntheura woko lakhe liphapenge ndipo jiso lakhe la maryero lidorokenge.