Read new_tumbuka_bible Zakariya 12 Bible Online

Zakariya 12 - new_tumbuka_bible bible

Zakariya 12

¹Agha ndi mazgu gha FUMU ghakuchima vya charu cha Israele. Ntheura FUMU iyo yikatandazga mtambo na kukhazika lufura lwa charu cha pasi, na kulenga mzimu wa munthu mukati mwakhe yikuti,

²Wona, ndili pafupi kuwuzgora msumba wa Yerusalemu kuŵa nkhombo yakuloŵezga mafuko ghose agho ghakuwuzingirizga, ndipo charu cha Yuda nacho chamkukhwaskika para ŵawujarizga msumba wa Yerusalemu.

³Pa zuŵa lenelira ndamkuzgora Yerusalemu kuŵa libwe lizitu ku mafuko ghose. Libwe ili limupwetekenge muheni waliyose uyo walinyamulenge. Ndipo mafuko ghose gha charu cha pasi ghamkuwungana pamoza kurwa nawo.

⁴FUMU yikuti, “Pa zuŵa lenelira nditimbenge hachi lirilose na chitenthe na kumuzerezeska uyo wakwerapo. Kweni ndamkuŵalaŵiriranga ŵaYuda apo nkhutimba hachi lirilose la ŵarwani kuŵa la chiburumutira.

⁵Penepapo ŵarongozgi ŵa mbumba za Yuda zimanyenge mu mitima yawo kuti awo ŵakukhara mu Yerusalemu, ŵali na nkhongono za FUMU Mwenenkhongono zose, Chiuta wawo.”

⁶Pa zuŵa lenelira ndizgorenge ŵarongozgi ŵa ŵaYuda kuŵa nga ndi mbawura yakugolera pakati pa nkhuni, nga ndi nchisinga cha moto mu mphundwe za tirigu. Wamkumyangura mafuko ghose gha ŵanthu gha kuŵazingirizga, ku maryero na ku mazere. Kweni ŵanthu ŵa mu Yerusalemu ŵamkurutilira kukhara mu mutende mu msumba wawo.

⁷“FUMU yamkudanga kupereka kuvivya ku ŵasilikari ŵa mu misasa ya mu charu cha Yuda, mwakuti uchindami wa mbumba ya Davide na uchindami wa awo ŵakukhara mu Yerusalemu ureke kuruska uwo ngwa Yuda.

⁸Pa zuŵa lenelira FUMU yamkuŵa nguru ya awo ŵakukhara mu Yerusalemu Ntheura awo mba kutomboroka chomene mukati mwawo pa zuŵa ilo, ŵamkuŵa nga ndi Davide. Ndipo mbumba ya Davide yamkuŵa nga ndi Chiuta, nga ndi mungelo wa FUMU panthazi pawo.

⁹Ndipo pa zuŵa lenelira ndamkutangwanika kumarizga mafuko ghose agho ghakwimikana na Yerusalemu.”

¹⁰“Ndipungulirenge mzimu wa chiwuravi na wa malurombo pa mbumba ya Davide na pa awo ŵakukhara mu Yerusalemu. Ntheura, para iwo ŵakuwona uyo ŵakamuvotora, ŵamkumulirira chomene, nga ndi umo munthu wakulirira kananda wakhe, panji ŵamkumulirira nga ndi umo munthu wakulirira mwana wakhe wa uŵere.

¹¹Pa zuŵa lenelira chitengero chamkuŵa chikuru mu Yerusalemu nga ndi chira ŵakamutengerera Hadadi Rimoni mu dambo la Megido.

¹²Charu chamkutengera, mbumba yiliyose pa yekha: Mbumba ya Davide na ŵawoli ŵawo, mbumba ya Natani na ŵawoli ŵawo,

¹³mbumba ya Levi na ŵawoli ŵawo, mbumba ya Shimeyi na ŵawoli ŵawo,

¹⁴ndiposo na mbumba zose izo zakharako na ŵawoli ŵawo.