Read new_tumbuka_bible Zakariya 13 Bible Online

Zakariya 13 - new_tumbuka_bible bible

Zakariya 13

¹“Pa zuŵa lenelira kwamkuŵa mbwiwi ya maji yakujurikira mbumba ya Davide na awo ŵakukhara mu Yerusalemu kuŵatozga ku zakwananga na ku kusopa vikozgo.”

²FUMU Mwenenkhongono zose yikuti, “Pa zuŵa lenelira, ndamkuwuskiramo nkhanira mazina gha ŵangoza mu charu mwakuti ŵareke na kukumbukikaso, ndiposo nchimi za utesi na mzimu ya ukazuzi ndamkuvifumyamo mu charu.

³Ndipo usange yunji warutilirenge kuchima vya utesi, ŵawiske ŵakhe na ŵakhe na ŵanyina awo ŵakamubaba ŵamuphalire kuti, ‘Uti ufwenge, chifukwa ukuyowoya vya utesi mu zina la FUMU. Ŵawiske na ŵanyina ŵakhe ŵamugwaze para ŵakuchima.’ ”

⁴“Ndipo pa zuŵa lenelira nchimi yose yitesi yamkuŵa na soni na mboniwoni yakhe para yikuchima. Iyo kuti yamkuvwara munjilira wa uchimi chara na kupusika nawo ŵanthu.

⁵Kweni yamkuyowoya kuti, ‘Ndili nchimi chara, ndili mulimi wa minda. Pakuti charu changuŵa chuma chane kufuma ku uwukirano wane.’

⁶Ndipo usange yumoza wakumufumba kuti, ‘Nga vichi mabamba agha ghali pa muwongo wako?’ Wamkuzgora kuti, ‘Mabamba agha nkhagwazika mu nyumba ya mubwezi apo tikatimbananga.’ ”

⁷“Wuka, iwe lupanga, wimikane na muliska wane, wimikane na munthu uyo wali pafupi na ine. Timba muliska mwakuti mberere zimbininike. Nditi ndiziwukire na zichoko wuwo.” Ntheura ndimo yikuyowoyera FUMU Mwenenkhongono zose.

⁸FUMU yikuti, “Mu vigaŵa vitatu vya ŵanthu mu charu chose, vigaŵa viŵiri vya ŵanthu vizamkukomeka ndipo chigaŵa chimoza chamkurekeka chamoyo.

⁹Ŵanthu ŵa mu chigaŵa cha chitatu, ndamkuŵaŵika mu moto. Ndamkuŵatozga nga ndi umo munthu wakutozgera siliva. Ndamkuŵayezga nga ndi umo munthu wakuyezgera golide. Ŵamkuchema zina lane ndipo ine ndamkuŵapulika. Ine ndamkuyowoya kuti, ‘Aŵa mbanthu ŵane.’ Iwo nawo ŵamkuyowoya kuti, ‘FUMU ndiyo Chiuta withu.’ ”