Read new_tumbuka_bible Zakariya 2 Bible Online

Zakariya 2 - new_tumbuka_bible bible

Zakariya 2

¹Nkhinuska maso ghane, ndipo wonani, nkhawona munthu wali na chingwe chakupimira mu woko lakhe!

²Penepapo nkhati, “Kasi ukuyankhu?” Wakandizgora wakati, “Ndamkupima Yerusalemu, kuti ndimanye utali wakhe na usani wakhe.”

³Ndipo wonani, mungelo uyo wakayowoyanga nane wakasenderera kwa ine, ndipo mungelo munyakhe wakiza na kukumana nayo.

⁴Iyo wakamuphalira wakati, “Chimbira, uyowoye na munyamata yura uti, ‘Yerusalemu wamkuŵavye mphaka mwakuti ŵanthu ŵanandi na ng'ombe zinandi zamkuŵa mwenemumo.’

⁵Pakuti ine ndiŵenge linga la moto kuwuzingirizga, ndipo ndiŵenge uchindami mukati mwakhe.” Ntheura ndimo yikuyowoyera FUMU.

⁶FUMU yikuti, “Imwe! Imwe! Chimbiraniko ku charu cha ku mpoto, pakuti ndamumbininiskirani ku madera ghose ghanayi gha mphepo za kuchanya.” Ntheura ndimo yikuyowoyera FUMU.

⁷“Chimbilirani ku Ziyoni, imwe mukukhara mu charu cha Babuloni.”

⁸Pakuti FUMU Mwenenkhongono zose iyo yikandirongora uchindami wakhe na kundituma ine, pa vya ŵamitundu awo ŵakamuskoghani imwe, yikuti, “Yose uyo wakukhwaska ŵanthu ŵane, wakundijoka mu jiso.

⁹Wonani nditi ndendeske woko lane la weruzgi pachanya pawo, ndipo ŵazga awo ŵakaŵateŵeteranga, ŵati ŵazgoke ŵaskoghi kwa iwo.” Penepapo mwamkumanya kuti FUMU Mwenenkhongono zose ndiyo yandituma.

¹⁰FUMU yikuti, “Yimbani, sekererani, imwe ŵa mu Ziyoni. Pakuti, wonani, nkhwiza, ndipo ndizamkukhara mukati mwinu.

¹¹Mu zuŵa leneilo, mafuko ghanandi ghamkujibatika kwa FUMU, ndipo ŵamkuŵa ŵanthu ŵane. Ndamkukhara mukati mwinu, ndipo mwamkumanya kuti FUMU Mwenenkhongono zose ndiyo yandituma kwa imwe.

¹²FUMU yamkuhara charu cha Yuda nga ndi phande lakhe mu charu chakupatulika, ndipo yamkusankhaso msumba wa Yerusalemu.

¹³Kharani chete panthazi pa FUMU, imwe mwa ŵanthu mose, pakuti yajiwuska yekha kufuma mu chikhazi chakhe chakupatulika.”