Read new_tumbuka_bible Zakariya 5 Bible Online

Zakariya 5 - new_tumbuka_bible bible

Zakariya 5

¹Nkhinuskaso maso ghane, ndipo wonani, nkhawona chikarata chakuzinga chikuwuruka mudera!

²Ndipo mungelo yura wakati kwa ine, “Kasi ukuwonachi?” Nkhazgora nkhati, “Nkhuwona chikarata chakuzinga chikuwuruka mudera. Mu utali wakhe chili mamita ghankhonde na ghanayi, ndipo mu usani wakhe chili mamita ghankhonde pachanya masentimita 50.”

³Penepapo wakandiphalira wakati, “Iyi ndiyo nthembo yeneiyo yaparanyikira mu charu chose cha pasi. Kwakuyana na chikarata ichi, yose uyo wakwiba wati wawuskikemo. Ndipo yose uyo wakurapa mu utesi, nayoso wati wawuskikemo ntheura pera.

⁴FUMU Mwenenkhongono zose yikuti, ‘Nditumenge nthembo na kunjira mu nyumba ya munkhungu, na mu nyumba ya uyo wakurapira mu utesi mu zina lane, ndipo nthembo yikharenge mu nyumba yakhe na kumyangura mathabwa na mawe wuwo.’ ”

⁵Ndipo mungelo uyo wakayowoyanga nane wakasenderera, wakati kwa ine, “Inuska maso, uwone chinthu icho chikwiza.”

⁶Ndipo nkhati, “Kasi nchinthu uli?” Iyo wakati, “Ichi ndi chidunga icho chikwiza.” Ndipo wakati, “Uko ndiko kwananga uku kuli mu charu chose.”

⁷Ndipo chibenekerero chakhe chikawuskikapo. Wonani, mukati mu chidunga mukaŵa mwanakazi uyo wakakhara pasi.

⁸Mungelo yura wakatiso, “Mwanakazi uyu wakwimilira uheni.” Wakamukanchizgira mwenemumo mwanakazi mu chidunga, ndipo wakawezgerapo chibenekerero pa mlomo wakhe.

⁹Penepapo nkhinuska maso ghane, ndipo nkhawona, ŵanakazi ŵaŵiri ŵakwiza. Mphepo yikaŵa mu mapapindo ghawo, ndipo ŵakaŵa na mapapindo ghakukozgana na gha khonongo. Ndipo ŵakayeghera chidunga chira muchanya pakati pa charu na mtambo.

¹⁰Ntheura nkhati kwa mungelo uyo wakayowoyanga nane, “Kasi ŵakuchiyegherankhu chidunga?”

¹¹Mungelo wakati kwa ine, “Ŵakuchiyeghera ku charu cha Babuloni, kuya kachizengera nyumba. Para nyumba yanozgeka, ŵamkuchikhazika chidunga chira mwenemumo mu malo ghakhe.”