Read new_tumbuka_bible Zakariya 8 Bible Online

Zakariya 8 - new_tumbuka_bible bible

Zakariya 8

¹Mazgu gha FUMU Mwenenkhongono zose ghakiza kwa ine ghakati,

²“FUMU Mwenenkhongono zose yikuti, ‘Ndili na sanje zikuru na msumba wa Ziyoni, ndipo ndi sanje izo zandichitiska kuti ndikwiyire ŵarwani ŵakhe.’ ”

³Ntheura FUMU yikuti, “Ndiwererenge mu Ziyoni ndipo ndikharenge mukati mwa Yerusalemu, ndipo Yerusalemu wachemekenge msumba wakugomezgeka, phiri la FUMU Mwenenkhongono zose, phiri lakupatulika.”

⁴Ntheura FUMU Mwenenkhongono zose yikuti, “Ŵanarume ŵachekuru na ŵanakazi ŵamkukharaso mu mabaraza gha Yerusalemu, yose na ndodo yakhe mu woko lakhe.

⁵Ndipo mabaraza gha mu msumba ghamkuzura na ŵanyamata na ŵasungwana awo ŵakusoŵera mwenemumo.”

⁶FUMU Mwenenkhongono zose yikuti, “Ichi chikuwoneka nga nchambula machitiko kwa ŵakukharako, kweni kwa ine nchamachitiko.”

⁷Ntheura FUMU Mwenenkhongono zose yikuti, “Wonani nditi ndiŵathaske ŵanthu ŵane kufuma ku mafumiro gha dazi na ku manjiliro gha dazi.

⁸Nditi ndiŵatorere mu Yerusalemu na kukhara mwenemumo. Iwo ŵamkuŵa ŵanthu ŵane, ndipo ine ndamkuŵa Chiuta ŵawo wakugomezgeka na murunji.”

⁹Ntheura FUMU Mwenenkhongono zose yikuti, “Muŵe ŵankhongono, mwaŵeneimwe mu mazuŵa agha mwapulikanga kuti Nyumba ya Chiuta yiti yizengekenge. Mukapulika kale kufuma ku nchimi izo zikaŵako para lufura lwa Nyumba ya Chiuta Mwenenkhongono zose lukakhazikikanga.

¹⁰Pambere nyengo izo pakaŵavye munthu wakamanya kulemba nchito munyakhe panji chakuŵeta. Kukaŵavye wakumanya kujithaska ku ŵarwani ŵakhe, pakuti nkhaŵika munthu yose kwimikana na muzengezgani wakhe.

¹¹Kweni sono kuti ndichitengepo kanthu chara na ŵanthu ŵakukharako aŵa nga ndi mazuŵa gha kale ghara. Ntheura ndimo yikuyowoyera FUMU Mwenenkhongono zose.

¹²Pakuti ŵamkupanda mbuto zawo mu mutende. Mpheska zawo zakupasa vipambi vyakhe. Charu chamkuŵa na vyakurya vinandi. Mtambo nawo wamkupereka jumi. Vyose ivi ndamkuŵapa awo ŵakharako mukati mu ŵanthu ŵakhe.

¹³Imwe mukaŵa chimuhoyere chakutembeka mukati mwa ŵamitundu, imwe ŵaYuda na ŵaIsraele. Ntheura ndimo nditi ndimuthaskirani ndipo muti muŵenge thumbiko. Mungopanga, kweni muŵe ŵakukhwima mtima.”

¹⁴Pakuti FUMU Mwenenkhongono zose yikuti, “Ine nkhapukwa kumuchitirani uheni, para ŵawiskemwekuru ŵakandavyira ku ukari, ndipo nkhagowoka chara.

¹⁵Ntheura sono ndanozgeraso kuchitira uweme ŵanthu ŵa msumba wa Yerusalemu na ŵa mu Yuda. Imwe mureke kopa.

¹⁶Vinthu ivyo mukwenera kuchita ndi ivi: Muyowoyenge unenesko ku yumoza na munyakhe ndipo mu mphara za mirandu perekani weruzgi wakunyoroka uwo ukupereka mutende.

¹⁷Rekani kughanaghanirana uheni yumoza na munyakhe, ndipo mureke kutemwa kurapira mwa utesi, pakuti vinthu ivi nkhuvitinkha. Ntheura ndimo yikuyowoyera FUMU.”

¹⁸Mazgu gha FUMU Mwenenkhongono zose ghakiza kwa ine ghakati,

¹⁹“FUMU Mwenenkhongono zose yikuti, ‘Muziŵizgenge mu mwezi wa chinayi, wa chinkhonde, wa chinkhonde na chiŵiri, na mu mwezi wa khumi. Ivi ndivyo viŵenge viphikiro vyakukondwerera na kusekerera ku ŵaYuda. Ntheura sungilirani kutemwa, unenesko na mutende.’ ”

²⁰Ntheura FUMU Mwenenkhongono zose yikuti, “Ŵanthu ŵamkwiza ku Yerusalemu kufuma ku mafuko ghanandi na ku misumba yinandi.

²¹Ŵanthu kufuma mu msumba umoza ŵamkuruta ku msumba unyakhe na kuti, ‘Tiyeni maluŵiro tikaŵeyerere uchizi wa FUMU, na kuromba FUMU Mwenenkhongono zose. Ine nane nkhuruta.’

²²Ŵamitundu ŵanandi na mafuko gha nkhongono ghamkwiza ku Yerusalemu, kuromba FUMU Mwenenkhongono zose, na kuŵeyerera uchizi wakhe.”

²³FUMU Mwenenkhongono zose yikuti, “Mu mazuŵa agho, ŵanthu khumi ŵakufuma mu mafuko gha viyowoyero vyakupambanapambana ŵamkukora munjilira ŵa mu Yuda na kuti, ‘Tiyeni tirute tose, chifukwa tapulika kuti Chiuta wali pamoza namwe.’ ”