Read new_tumbuka_bible Zakariya 9 Bible Online

Zakariya 9 - new_tumbuka_bible bible

Zakariya 9

¹Agha ndi mazgu gha FUMU ghakuchima vya charu cha Hadiraki na msumba wa Damaseko. Kuti ndi mafuko gha Israele pera chara, kweni na msumba ukuru wa Aramu nawo ngwa FUMU.

²Ghakuchimaso vya Hamati, uyo wakupakana na Hadiraki, ndiposo na misumba ya Ture na Sidoni, nangauli nja vinjeru chomene.

³Ture wajizengera malinga, ndipo wajiwunjikira siliva nga fuvu, na golide nga ndi mathipa gha mu ŵagurwe ŵa mu msumba.

⁴Kweni wonani, FUMU yiwupoke mphango zakhe na kuponya usambazi wakhe mu nyanja, ndipo msumba umyangulikenge na moto.

⁵Ashikeloni wizamkuchiwona ichi ndipo wizamkopa. Gaza nayo wizamkunyongozeka na urwirwi; na Ekuroni wuwo chifukwa chigomezgo chakhe chamkulengeskeka. Karonga wamkufwa mu msumba wa Gaza, ndipo msumba wa Ashikeloni wamkuŵavye ŵakukharamo.

⁶Ŵamitundu yakupambanapambana ndiwo ŵamkukharamo mu Ashidodi, ndipo ndamkumara kujikuzga kwa ŵaFilisiti.

⁷Ndamkuwuskamo nyama ya ndopa mu mlomo wakhe na vyakuseruska mu mino ghakhe. Icho nacho chamkuŵa na ŵanthu ŵakukharako ŵa Chiuta withu, ŵamkuŵa ŵarongozgi nga ndi ŵaYuda, ndipo msumba wa Ekuroni nawo wamkuŵa nga ndi wa ŵaYebusi.

⁸Ndipo ndizengenge msasa na kuŵa mulinda pa nyumba yane. Kwamkuŵavye na munthu wakwenda uku na uku kuŵayuzga kuti waŵathereskeso pakuti sono nkhuŵavikirira.

⁹Kondwerani, sekererani imwe ŵanthu ŵa mu Ziyoni! Chemerezgani na chimwemwe imwe ŵanthu ŵa mu Yerusalemu! Wonani, karonga winu wakwiza kwa imwe, watonda na kuvivya, ngwa kuzika ndipo wakwera pa mbunda, inya wakwera pa kamwana ka mbunda.

¹⁰Ndiwuskeko magareta ghakufumira ku charu cha Efurayimu na mahachi gha nkhondo kufuma ku Yerusalemu. Ndiphyorenge mauta gha nkhondo, ndipo iyo wamkupharazga mutende ku mafuko ghose. Mazaza gha ufumu wakhe ghaŵenge kufuma ku nyanja kuya kafika ku nyanja yinyakhe, kufuma ku mronga wa Yufurate na kuya kafika ku mphererekezgo za charu.

¹¹FUMU yikuti, “Chifukwa cha ndopa za phangano lane na iwe, ndamkuŵafumiskamo ŵakayidi ŵako, mu chisimi chambula maji.”

¹²Wererani ku linga, imwe ŵakayidi, mwaŵeneimwe mukulindizga mu chigomezgo. Muhanya uno nkhumuphalirani nkhuti, “Ndamkumupani njombe ndipo ndamkuwezgerani kaŵiri.”

¹³Pakuti Yuda ndamukweŵa nga ndi uta wane, Efurayimu ndamuzgora kuŵa muvwi wakhe. Ŵanthu ŵa mu Ziyoni ŵaŵenge nga ndi lupanga lwa chinkhara, lwakutimbira ŵa charu cha Grisi.

¹⁴FUMU yamkuŵawonekera, ndipo muvwi wakhe wamkumwetuka nga ndi leza. FUMU Chiuta wamkulizga mbata na kwenda mu ŵakavuruvuru kufuma ku mwera.

¹⁵FUMU Mwenenkhongono zose yamkuŵavikirira ŵanthu ŵakhe, ndipo yamkuŵamara na kuŵakandira pasi awo ŵakaŵaponya na mawe. Ŵamkumwa ndopa zawo nga ndi para ŵakumwa vinyo. Ŵamkuzura na ndopa nga ndi ŵadira na kuzumbwa na ndopa nga ndi masengwe gha jochero.

¹⁶Pa zuŵa ilo FUMU, Chiuta wawo wizamkuŵathaska chifukwa ndi mskambo wa ŵanthu ŵakhe. Iwo ŵati ŵang'azimenge mu charu nga ndi vitowelo pa mphumphu.

¹⁷Charu chira chizamkuŵa chiweme ndiposo na chakutowa. Vyakurya vyamkuŵapa nkhongono ŵanyamata, vinyo liphya lamkuŵapa nkhongono ŵamwali.