Read new_tumbuka_bible Malaki 3 Bible Online

Malaki 3 - new_tumbuka_bible bible

Malaki 3

¹FUMU Mwenenkhongono zose yikuti, “Wonani, nditi nditume thenga lane, leneilo lamkunozga nthowa panthazi pane. Penepapo mwamabuchibuchi, FUMU yeneiyo mukuyipenja yiti yizenge mu nyumba yakhe. Thenga ilo liri na uthenga wa phangano, leneilo imwe mukukondwera nalo, likwiza.”

²Kweni kasi ndi njani uyo wangazizipizga zuŵa la kwiza kwakhe? Kasi ndinjani uyo wangiza kayima para wizamkuwoneka? Pakuti wamkwiza nga ndi moto wa mwengi ndipo nga ndi sopo ya munthu wakuchapa.

³Wamkuŵa nga ndi munthu uyo wakwenga makora siliva. Iyo wizamkutozga ŵaLevi na kuŵaphotora nga ndi golide na siliva. Ntheura ŵizamkupereka sembe zakwenerera kwa FUMU.

⁴Penepapo sembe iyo ŵamkupereka ŵaYuda na awo ŵakukhara Yerusalemu yizamkuŵa yakupokerereka kwa FUMU, nga ndi mu mazuŵa gha kale, virimika vyakudanga.

⁵“Penepapo ndamkusenderera kufupi namwe kuti ndimweruzgani. Ndizamkuŵa kaboni wa luŵiro kususka ŵawukwi na ŵaleŵe, awo ŵakurapira mu utesi, awo ŵakuzgerera awo ŵalembeka nchito, awo ŵakutindiŵizgira pasi vyokoro na ŵalanda, awo ŵakureka kupereka weruzgi wakunyoroka ku ŵalendo, ndiposo ŵakureka kupereka nchindi kwa ine.” Ntheura ndimo yikuwoyera FUMU Mwenenkhongono zose.

⁶“Ine FUMU kuti nkhusintha chara. Ndicho chifukwa imwe ŵana ŵa Yakhobe, kuti muli kumara petu chara.

⁷Kufuma mu nyengo za ŵawiskemwekuru, imwe mwapatukako ku marango ghane, kuti muli kughasunga chara. Wererani kwa ine, ndipo ine nane nditi ndiwererenge kwa imwe.” Ntheura ndimo yikuyowoyera FUMU Mwenenkhongono zose. “Kweni imwe mukufumba mukuti, ‘Kasi titi tiwerere uli?’ ”

⁸“Ine nkhumufumbani nkhuti, ‘Kasi munthu wangamanya kumwibira Chiuta? Ndipouli imwe mukundibira ine.’ ” “Kweni imwe mukufumba mukuti, ‘Kasi ise tikumwibirani uli?’ ” “Imwe mukundibira ine mu vyakupereka vyinu vya chakhumi na vyakupereka vinyakhe.

⁹Ndimwe ŵakutembeka, fuko lose la imwe, chifukwa mukundibira ine.

¹⁰Mwizenge na chakhumi chakukwanira mu nyumba yakusungiramo kufuma mu vyose, mwakuti muŵenge chakurya mu nyumba yane.” FUMU Mwenenkhongono zose yikuti, “Mundiyezge, ndipo muti muwone kuti nkhumujulirani vidangazi vya kuchanya na kumupungulirani vitumbiko vyakuzara.

¹¹Nditi ndikanizge ivyo vikurya mbuto, mwakuti vireke kunanga vyakurya vya mu minda yinu. Mpheska za mu minda yinu zitondekenge chara kupambika vipambi.” Ntheura ndimo yikuyowoyera FUMU Mwenenkhongono zose.

¹²“Penepapo mafuko ghose ghamkumuchemani kuti ndimwe ŵakutumbikika, pakuti charu chinu chamkuŵa chakukondweska.” Ntheura ndimo yikuyowoyera FUMU Mwenenkhongono zose.

¹³FUMU yikuti, “Mazgu ghinu ghaŵa ghaheni chomene pa kwimikana nane.” “Ndipouli imwe mukufumba mukuti, ‘Kasi ise tamuyowoyerani uli mazgu ghakwimikana namwe?’ ”

¹⁴“Imwe mwayowoya kuti, ‘Nchawaka kuteŵetera Chiuta. Kasi pali chandulo uli pakusunga marango ghakhe panji kwenda panthazi pa FUMU Mwenenkhongono zose uku tikulira chifukwa cha zakwananga zithu?

¹⁵Mpaka sono, tikughanaghana kuti ŵakujikuzga ndiwo ŵakutumbikika. Awo ŵakuchita uheni ŵakusanga makora ndipo nanga ŵamuyezge Chiuta vinthu vikuŵaŵira makora ndipera.’ ”

¹⁶Penepapo awo ŵakusopa FUMU ŵakayowoyeskana yumoza na munyakhe ndipo FUMU yikavimanya na kuŵapulika. Ntheura panthazi pa FUMU mazina gha awo ŵakusopa na kuchindika zina la FUMU, ghakalembeka mu buku la chikumbusko.

¹⁷FUMU Mwenenkhongono zose yikuti, “Ŵanthu aŵa ŵamkuŵa ŵane, chuma chane cha pa dera, mu zuŵa ilo ndamkuchifiskira. Ndamkuŵathaska nga ndi umo munthu wakuthaskira mwana wakhe uyo wakumupulikira.

¹⁸Penepapo mwamkuwonaso mphambano pakati pa ŵarunji na ŵaheni, pakati pa awo ŵakuteŵetera Chiuta na awo ŵakuwura kuteŵetera Chiuta.”