Read new_tumbuka_bible Malaki 4 Bible Online

Malaki 4 - new_tumbuka_bible bible

Malaki 4

¹FUMU Mwenenkhongono zose yikuti, “Wonani, zuŵa likwiza, ilo lizamkuŵa lakocha nga ndi ng'anjo ya moto, ndipo ŵakujikuzga na ŵaheni wose ŵamkuphya nga ndi maphekese. Mu zuŵa leneilo, moto wamkuŵawocha kuŵazgora vyoto, ndipo palije munthavi panji musisi uwo wamkusidikako.

²Kweni imwe mukuchindika zina lane, chiponosko chamkumwizirani nga ndi umo dazi ilo likufuma kwiza kachizga na marazi ghakhe. Mwamkufuma na kudukaduka nga ndi ŵana ŵa ng'ombe awo ŵafuma mu chiŵaya.

³Penepapo mwamkukandirizgira pasi ŵaheni, ndipo ŵamkuŵa nga ndi vyoto kusi ku malundi ghinu, pa zuŵa ilo ndamkuchitira vinthu vyeneivi.” Ntheura ndimo yikuyowoyera FUMU Mwenenkhongono zose.

⁴“Kumbukani dango la muteŵeti wane Mozesi, vilayizgo na malangulo, vyeneivyo nkhamulangulira iyo pa Phiri la Sinayi kuti waŵaphalire ŵaIsraele wose.

⁵“Wonani, ndamkumutumirani nchimi Eliya pambere zuŵa likuru na lakofya la FUMU lindize.

⁶Iyo wizamkung'anamulira mitima ya ŵapapi kuya ku ŵana ŵawo ndipo mitima ya ŵana ku ŵapapi, mzire ndize na kuchitemba charu.”