Read new_tumbuka_bible Mateyu 10 Bible Online

Mateyu 10 - new_tumbuka_bible bible

Mateyu 10

¹Yesu wakachema ŵasambiri ŵakhe 12, ndipo wakaŵapa mazaza ghakufumyira mizimu yiheni na ghakuchizgira matenda ghose na vyakuŵinya vyose.

²Mazina gha ŵakutumika ŵara 12 ndi agha: wakudanga ndi Simoni uyo wakuchemeka Petrosi na Andreya munung'una wakhe, Yakhobe mwana wa Zebediya na Yohane munung'una wakhe.

³Filipu na Baratolomeyu. Tomasi na Mateyu wakusonkheska msonkho, Yakhobe mwana wa Alifeyu, na Tadeyu.

⁴Simoni wa chipani cha Kanani,[5] na Yudasi Isikariyoti, mweneuyo wakamwendera mphiska Yesu.

⁵Ŵanthu 12 aŵa ndiwo Yesu wakaŵatuma, ndipo wakaŵachinyinthizga wakati, “Mungarutanga ku ŵamitundu, ndiposo mungakanjiranga chara mu mizi ya ŵaSamariya.

⁶Kweni chomene rutani ku mberere zakusoŵa za mbumba ya Israele.

⁷Uku mukwenda mukapharazgenge kuti, ‘Ufumu wa kuchanya waneng'enera!’

⁸Mukachizgenge ŵarwari, mukawuskenge ŵakufwa, mukatozgenge awo ŵali na vyoni, na kufumya viŵanda. Mukapokera kwa wanangwa, perekani kwa wanangwa.

⁹Mungayeghanga golide, siliva nesi makopara mu vibeta vyinu chara.

¹⁰Mungayeghanga thumba la pa ulendo panji malaya ghaŵiri, panji skapato nesi ndodo. Pakuti wanchito wakwenera kupokera vyakurya vyakhe.

¹¹“Mu msumba wose panji mu chikaya umo mwamkunjira, mukapenjenge munthu uyo wali na khumbo lakumupokererani. Munthu mweneuyo ndiyo mukakharenge nayo musuke mufumemo.

¹²Para mukunjira mu nyumba, ŵatauzgeni.

¹³Usange munthu wa mu nyumba yira wakumupokererani, rekani mutende winu ukhare mwenemumo. Usange wakumupokererani chara, rekani mutende winu uwerere kwa mwaŵene.

¹⁴Usange munthu wareka kumupokererani, nanga nkhupulika mazgu ghinu, pakufuma mu nyumba yira panji mu muzi ura, kung'unthani fuvu la ku malundi ghinu.

¹⁵Nadi nkhumuphalirani kuti, pa zuŵa la weruzgi, mrandu wa charu cha Sodomu na Gomora wamkuŵa mphanyiko kuruska mrandu wa muzi ura.”

¹⁶“Tegherezgani! Nkhumutumani nga ndi mberere mukati mu mphumphi. Ntheura muŵe ŵakuchenjera nga ndi njoka na ŵakuzika nga ndi nkhunda.

¹⁷Kweni chenjerani na ŵanthu, chifukwa ŵamkumuperekani ku zimphara, ndipo ŵamkumuthyapulani mu nyumba zawo zakusoperamo.

¹⁸Ŵamkumuperekani panthazi pa nduna na ŵakaronga chifukwa cha ine, mwakuti mukandipanikizgire ine kwa iwo na ku ŵamitundu.

¹⁹Kweni para ŵamkumuperekani ku mirandu, mungakenjerwanga umo mwamkuyowoyera, panji icho mwamkuyowoya. Chifukwa icho mwamkuyowoya chamkupika kwa imwe pa ora lenelira.

²⁰Pakuti ndimwe mwamkuyowoya chara, kweni Mzimu wa Ŵawiskemwe[6] ndiyo wamkuyowoyera mwa imwe.

²¹“Mubali wamkupereka mubali wakhe kuti wakomeke, wiske nayo wamkupereka mwana wakhe kuti wakomeke. Ŵana ŵamkuwukira ŵapapi ŵawo kuti ŵakomeke.

²²Mwamkutinkhika na ŵanthu wose chifukwa mukupulikana na ine. Kweni mweneuyo wamkuzizipizga kufika ku umaliro, ndiyo wamkuponoskeka.

²³Para ŵamkumuzikizgani mu muzi umoza, mukachimbilirenge ku msumba unyakhe. Nadi nkhumuphalirani kuti, mwayamkumara mizi yose ya Israele chara, pambere Mwana wa Munthu wandize.

²⁴“Musambiri kuti wali pachanya pa musambizgi wakhe chara, panji muteŵeti nayo kuti wali pachanya pa sekuru wakhe chara.

²⁵Nchakwenerera kuti musambiri waŵe nga ndi musambizgi wakhe, ndiposo muteŵeti nayo kuti waŵe nga ndi sekuru wakhe. Usange mwene-nyumba wakuchemeka kuti ndi Belezebule, kasi kwakuruska ŵa mu nyumba yakhe ŵachemekenge uli?

²⁶“Ntheura mureke kopa ŵanthu. Chifukwa palije kanthu kakubenekerereka ako karekenge kuvumbukwa, panji kanthu kakubisika ako kamkureka kumanyikwa.

²⁷Icho nkhumuphalirani mu chisi, mukachiyowoyenge pakweru. Ndipo icho mwapulika mu kuphwepwa, mukachipharazgenge pachanya pa nyumba.

²⁸Mungopanga awo ŵakukoma thupi, kweni ŵalije kumanya kukoma mzimu. Kweni mopenge Chiuta uyo wakumanya kukoma mzimu na thupi wuwo mu Gehena

²⁹Asi twadunduru tuŵiri tukugulika na kandarama kachoko? Ndipo kulije nanga nkhamoza ako kakuwa pasi kwambula kuti Ŵawiskemwe ŵazomerezga.

³⁰Kweni nanga ndi masisi gha ku mitu yinu ghali kupendeka ghose.

³¹Ntheura mureke kopa, imwe muli ŵakuzirwa kwakuruska twadunduru tunandi.

³²“Yose uyo wakundizomera ine panthazi pa ŵanthu, nane ndamkumuzomera panthazi pa Ŵadada awo ŵali kuchanya.

³³Kweni yose uyo wakundikana ine panthazi pa ŵanthu, nane ndamkumukana panthazi pa Ŵadada awo ŵali kuchanya.

³⁴“Mungaghanaghananga chara kuti ine ndili kwizira kupereka mutende pa charu. Kuti ndilikwizira kuŵika mutende pa charu chara, kweni nkhondo.

³⁵Chifukwa nkhiza kuti mwana mwanarume wawukire ŵawiske, mwana mwanakazi wawukire ŵanyina, mukamwana wawukire ŵanyinavyara.

³⁶Ŵarwani ŵa munthu ndi awo mba mu nyumba yakhe.

³⁷“Uyo wakutemwa wiske panji nyina kwakuruska ine, ngwambula kwenerera kuŵa musambiri wane. Ndipo uyo wakutemwa mwana wakhe msepuka panji msungwana kwakuruska ine, ngwakwenerera chara kuŵa musambiri wane.

³⁸Uyo wakureka kuyegha mphinjika yakhe na kundirondezga, ngwakwenerera kuŵa musambiri wane chara.

³⁹Uyo wakusunga umoyo wakhe, wati wawutayenge, ndipo uyo wakutaya umoyo wakhe chifukwa cha ine, wati wawusangenge.

⁴⁰“Uyo wamkumupokererani, wamkupokerera ine. Ndipo uyo wakupokerera ine wakupokerera uyo wakandituma.

⁴¹Uyo wakupokerera nchimi chifukwa ndi nchimi, wamkupokera njombe yakuyana na ya nchimi. Ndipo uyo wakupokerera munthu murunji chifukwa munthu yura ndi murunji wamkupokera njombe yakuyana na ya munthu murunji.

⁴²Nadi nkhumuphalirani kuti, yose uyo wakupereka nkhombo ya maji gha kuzizima ku yumoza wa ŵachoko aŵa chifukwa ndi musambiri, kuti wamkutaya njombe yakhe chara.”