Read new_tumbuka_bible Mateyu 11 Bible Online

Mateyu 11 - new_tumbuka_bible bible

Mateyu 11

¹Yesu wakati wamara kulangula ŵasambiri ŵakhe 12, wakawukapo na kuya kasambizga na kupharazga mu misumba yawo.

²Para Yohane Mubapatizi wakaŵa mu gadi, wakapulika milimo iyo Khristu wakachitanga. Ntheura wakatuma ŵasambiri ŵakhe kuya kamufumba kuti,

³“Kasi ndimwe uyo ŵakatenge wakwiza, panji tilindilirenge munyakhe?”

⁴Yesu wakazgora wakati, “Wererani kunyuma, mukamuphalire Yohane ivyo mwapulika na kuwona.

⁵Ŵachiburumutira ŵakuwona, viti vikwenda, ŵavyoni ŵakutozgeka, ŵakumangwa makutu ŵakupulika, ŵakufwa ŵakuwuka, ndipo Uthenga Uweme ukupharazgika ku ŵakavu.

⁶Ngwakutumbikika munthu uyo wakuwura kusangamo kanthu kakumukhuŵazga mwa ine.”

⁷Apo ŵasambiri ŵa Yohane ŵakarutanga, Yesu wakamba kuyowoyera mizinda ya ŵanthu vya Yohane, wakati, “Kasi mukaruta kuya kawona vichi ku mapopa? Kasi mukaya kawona thete lakusunkhunyika na mphepo?

⁸Kasi nchichi icho mukaruta kuya kawona? Munthu wakuvwara malaya gha kulipwitika? Chara, awo ŵakuvwara malaya gha kulipwitika ŵakukhara mu nyumba za ufumu.

⁹Kweni nchichi icho mukarutira kuya kawona? Kasi mukaya kawona nchimi? Nadi, nkhumuphalirani kuti, mukaya kawona uyo wakuruska na nchimi wuwo.

¹⁰Iyo ndi mweneuyo mu malembe ghatuŵa Chiuta wakuyowoya na za iyo kuti, ‘Wonani, nditi nditumenge thenga lane panthazi pako, leneilo lamkunozgera iwe nthowa yako.’

¹¹Nadi, nkhumuphalirani kuti, mu ŵanthu wose awo ŵali kubabika mu ŵanakazi, mulije kuwonekapo mukuru kuruska Yohane Mubapatizi. Kweni uyo ndi muchoko ku wose mu Ufumu wa kuchanya ndiyo mukuru kuruska iyo.

¹²Kufuma mu mazuŵa gha Yohane Mubapatizi kufika mpaka sono, ŵanthu ŵakulimbana chomene na Ufumu wa kuchanya, ndipo ŵanthu ŵachikanga ndiwo ŵamkuwupoka.

¹³Pakuti nchimi zose na Dango la Mozesi ghakayowoyanga na za Ufumu uwu mpaka Yohane wakafika.

¹⁴Ndipo usange mukukhumba kupokerera uthenga uwu, Yohane ndiyo Eliya uyo ŵakatenge wakwiza.

¹⁵Uyo wali na makutu, wati wapulike.

¹⁶“Kasi ndiwulinganizge na vichi muwiro uwu? Ukulingana na ŵana awo ŵakhara pa msika, ŵakuchema ŵanyawo ŵakuti,

¹⁷‘Tikamulizgirani fyoliro, kweni kuti mukavina chara. Tikatengera, kweni kuti mukalira chara.’

¹⁸Yohane wakiza ndipo wakaryanga chara nesi kumwa, ŵanthu ŵakati, ‘Wali na chiŵanda.’

¹⁹Mwana wa Munthu wakati wiza, wakarya na kumwa, iwo ŵakuti, ‘Wonani muryezi uyu, mloŵevu ndiposo mubwezi wa ŵakusonkheska msonkho na ŵakwananga!’ Ndipouli, mahara ghakukhozgeka na milimo yakhe kuti nga urunji.”

²⁰Ntheura Yesu wakamba kuchenya misumba umo iyo wakachita milimo yakhe yinandi ya nkhongono, chifukwa ŵanthu ŵa mwenemura kuti ŵakang'anamuka chara.

²¹Wakati, “Soka kwa iwe Korazini! Soka kwa iwe Betesaida! Pakuti milimo ya nkhongono iyo yikachitika mwa imwe, nga yichitikenge mu Ture na Sidoni, mphanyi ŵanthu ŵa mu misumba yira ŵakang'anamuka kale na kuvwara vigudulu na kujithilira vyoto kurongora kung'anamuka ku zakwananga zawo.

²²Kweni nkhumuphalirani kuti, pa zuŵa la weruzgi, Chiuta wizamkuzizipizgira ŵanthu ŵa ku Ture na Sidoni kuruska imwe.

²³Na iwe Kaperenaumu, kasi ukukhumba kujikwezga kuya kafika kuchanya? Uti ukhizgikire pasi kuya kafika ku Gehena Pakuti milimo ya nkhongono iyo yikuchitika mwa iwe nga yichitikenge mu Sodomu, mphanyi yili kukhalirira kufika mpaka sono.

²⁴Kweni nkhumuphalirani kuti, pa zuŵa la weruzgi, Chiuta wizamkuŵazizipizgira ŵanthu ŵa mu Sodomu kuruska iwe.”

²⁵Pa nyengo yeneyira Yesu wakati, Nkhumuwongani imwe, Ŵadada, Fumu ya kuchanya na pasi, chifukwa mukabisa vinthu ivi ku ŵamahara na ŵakusambira, ndipo mukaŵavumbulira ŵabonda.

²⁶Inya Ŵadada, pakuti ntheura ndimo likaŵira khumbo linu.

²⁷“Ŵadada ŵali kupereka vinthu vyose kwa ine, ndipo palije munthu uyo wakumanya Mwana, kweni Ŵawiske ndiwo. Ndipo palije munthu uyo wakumanya Ŵawiske, kweni Mwana ndiyo, na waliyose uyo Mwana wakusankha kumuvumbulira Ŵawiske.

²⁸“Zaninge kwa ine, mose imwe vyalema na kuzotofyeka, ndipo ine nditi ndimupumuzganinge.

²⁹Torani goliwoli lane, mujikake nalo, ndipo musambire kwa ine. Pakuti ndine wakuzika na wakujipepura mu mtima, ndipo muti musangenge kupumula kwa mizimu yinu.

³⁰Pakuti goliwoli lane ndipusu pakujikaka nalo, ndipo katundu wane nayo ndi muyuyu.”