Read new_tumbuka_bible Mateyu 12 Bible Online

Mateyu 12 - new_tumbuka_bible bible

Mateyu 12

¹Pa nyengo yeneyira, Yesu wakasorotanga mu minda ya tirigu pa zuŵa la Sabata Ŵasambiri ŵakhe ŵakaŵa na njara ndipo ŵakamba kupurura mphonje za tirigu na kurya.

²Para ŵaFarisi ŵakawona ichi, ŵakati kwa Yesu, “Wona ŵasambiri ŵako ŵakuchita icho nchambula kulangurika kuchita pa zuŵa la Sabata.”

³Kweni Yesu wakati kwa iwo, “Kasi mundaŵazgepo icho wakachita Davide para wakaŵa na njara na awo ŵakaŵa nayo?

⁴Iyo wakanjira mu Nyumba ya Chiuta, ndipo ŵakarya Chingwa cha Uŵapo wa Chiuta, icho chikaŵa cha dango chara kuti iyo panji awo ŵakaŵa nayo ŵarye, kweni ŵasofi pera.

⁵Ndiposo kasi mulije kuŵazgapo mu Dango la Mozesi kuti, pa zuŵa la Sabata mu Nyumba ya Chiuta, ŵasofi ŵakunanga zuŵa la Sabata, ndipo kuti ŵakuŵa na mrandu chara?

⁶Kweni nkhumuphalirani kuti, walipo pano mukuru wakuruska Nyumba ya Chiuta.

⁷Nga mumanyenge icho ichi chikung'anamula kuti, ‘Chisungusungu ndicho nkhukhumba sembe chara.’ Mphanyi mwareka kuŵasuska awo mbambula mrandu.

⁸Pakuti Mwana wa Munthu ndi Fumu ya zuŵa la Sabata.”

⁹Yesu wakafumapo pa malo ghara, wakaya kanjira mu nyumba ya kusoperamo.

¹⁰Ndipo mwenemumo mukaŵa munthu wa woko la kuphapa. Ŵanthu ŵanji ŵakapenjanga chifukwa kuti ŵamupe mrandu Yesu, ntheura ŵakamufumba ŵakati, “Kasi kukulangurika kuchizga munthu pa zuŵa la Sabata?”

¹¹Yesu wakati kwa iwo, “Kasi ndi njani wa imwe usange wali na mberere yimoza ndipo yawa mu mbuna pa zuŵa la Sabata wati warekenge kuyifumiska?

¹²Asi munthu ngwa kuzirwa kuruska mberere? Ntheura kukulangurika kuchita uweme pa zuŵa la Sabata.”

¹³Penepapo wakamuphalira munthu yura wakati, “Nyoroska woko lako.” Ntheura wakalinyoroska, ndipo likawereramo na kuŵa makora nga ndinyakhe.

¹⁴Kweni ŵaFarisi ŵakafumira kuwaro, ndipo ŵakaya kapangana umo ŵangamukomera Yesu.

¹⁵Yesu wakati wamanya ichi, wakawukapo pa malo ghara. Mzinda wa ŵanthu ŵanandi ukamurondezga ndipo wakaŵachizga ŵarwari wose.

¹⁶Wakaŵalangula kuti ŵareke kuphalira ŵanthu ŵanji vya iyo.

¹⁷Ichi chikachitika mwakuti ghafiskike mazgu gha nchimi Yesaya agho ghakuti,

¹⁸“Wonani muteŵeti wane mweneuyo ndamusora, wakutemweka wane, uyo mtima wane ukucha nayo! Nditi ndiŵike Mzimu wane mwa iyo, ndipo wati wapharazge weruzgi, wakunyoroka ku mafuko ghose.

¹⁹Kuti wati wakwesane na munthu chara, panji kuchemerezga. Palije uyo wati wapulike mazgu ghakhe, mu misewu ya mu msumba.

²⁰Thete lakuphwanyika kuti wati waliphyore chara, nanga nkhuzimya chisunda chakugolera pachokopachoko, wasuke wachite kuti weruzgi wakunyoroka utonde.

²¹Ndipo ŵamitundu ŵati ŵaŵike chigomezgo chawo mu zina lakhe.”

²²Ntheura ŵanthu ŵanji ŵakiza kwa Yesu na munthu mweneuyo wakaŵa wachiburumutira ndiposo wa mbuwu chifukwa wakaŵa na chiŵanda. Yesu wakamuchizga, ndipo wa mbuwu yura wakamba kuyowoya na kulaŵiska.

²³Mizinda ya ŵanthu yikazukuma yikati, “Mweneuyu, kasi ndi Mwana wa Davide?”

²⁴Para ŵaFarisi ŵakapulika ŵakati, “Munthu uyu kuti wakufumiska waka viŵanda chara, kweni wakufumya mu nkhongono ya Belezebule, uyo wakuwusa viŵanda.”

²⁵Yesu wakamanya maghanoghano ghawo ndipo wakayowoya nawo wakati, Usange ŵanthu ŵa ufumu umoza ŵagaŵikana ufumu uwo ukupankhuka. Ndiposo ŵanthu ŵa msumba panji nyumba yimoza usange ŵagaŵikana, msumba uwo panji nyumba iyo yikupankhuka.

²⁶Usange Satana wakufumya Satana, ndiko kuti wagaŵikana yekha. Kasi ufumu wakhe ungakhora uli?

²⁷Usange ine nkhufumya viŵanda na nkhongono za Belezebule, kasi ŵasambiri ŵinu ŵakufumya na nkhongono za njani? Ntheura ndiwo ŵati ŵaŵenge ŵeruzgi ŵinu.

²⁸Kweni usange nkhufumya viŵanda na nkhongono ya Mzimu wa Chiuta, ipo Ufumu wa Chiuta uli kwiza pa imwe.

²⁹“Panji kasi munthu wangamanya uli kunjira mu nyumba ya chinkhara na kuphanga vyuma vyakhe, kwambula kuti wakake danga chinkhara chira? Para wachita ntheura ndipo wakumanya kuphanga vya mu nyumba yakhe.

³⁰“Uyo kuti wali pamoza na ine chara, wakususkana nane. Ndipo uyo kuti wakuwunjika pamoza na ine chara wakuparanya.

³¹Ntheura nkhumuphalirani kuti, kwananga kose nanga ndi matusi kwa Chiuta viti vigowokereke ku ŵanthu, kweni kuyowoya matusi kwa Mzimu Mutuŵa kuti kugowokerekenge chara.

³²Yose uyo wati wamuyowoyere mazgu ghaheni Mwana wa Munthu, wati wagowokerekenge, kweni yose uyo wati wayowoyere mazgu ghaheni Mzimu Mutuŵa, wati wagowokerekenge chara mu muwiro uwu, panji mu muwiro uwo ukwiza.

³³“Chitani kuti khuni liŵe liweme, ndipo vipambi vyakhe navyo viti viŵenge viweme. Chitani kuti khuni liŵe liheni, ndipo vipambi vyakhe navyo viti viŵenge viheni. Pakuti khuni lose likumanyikwa na vipambi vyakhe.

³⁴Mwa mphapu za vipiri imwe, kasi mungamanya uli kuyowoya viweme apo imwe muli ŵaheni? Pakuti mlomo ukuyowoya ivyo vyazura mu mtima.

³⁵Munthu muweme wakufumiska vinthu viweme kufuma pa viweme ivyo wali kusunga mu mtima mwakhe. Ndipo munthu muheni nayo wakufumiska vinthu viheni kufuma pa viheni ivyo wali kusunga mu mtima wakhe.

³⁶“Nkhumuphalirani kuti pa zuŵa la weruzgi, munthu yose wizamkupataura pa mazgu ghose ghawakawaka agho wakuyowoya.

³⁷Pakuti iwe wamkurunjiskika na mazgu ghako, ndiposo wamkususkikaso na mazgu ghako.”

³⁸Ntheura ŵamanyi-marango ŵanji na ŵaFarisi ŵanji ŵakati kwa Yesu, “Musambizgi, tikukhumba kuti mutirongore chimanyikwiro.”

³⁹Kweni iyo wakati, Muwiro uwu uheni na wambula kugomezgeka ukupenja chimanyikwiro! Ndipo uti uchiwonenge chara, kweni chimanyikwiro cha nchimi Yona pera ndicho.

⁴⁰Pakuti nga ndi umo Yona wakaŵira mu nthumbo ya chisomba mazuŵa ghatatu, muhanya na usiku, ntheura ndimo Mwana wa Munthu nayo wamkuŵira mu dindi mazuŵa ghatatu muhanya na usiku.

⁴¹Pa zuŵa la weruzgi ŵanthu ŵa msumba wa Nineve ŵamkuwuka na kuŵasuska ŵanthu ŵa muwiro weneuwu, pakuti iwo ŵakang'anamuka para Yona wakaŵapharazgira. Kweni mukuru wakuruska Yona wali papano.

⁴²Fumukazi ya ku mwera yamkuwuka pa zuŵa la weruzgi pamoza na muwiro uwu na kuwususka. Pakuti yikafuma ku mphererekezgo za charu, kwiza kapulika mahara gha Solomoni. Kweni mukuru wakuruska Solomoni, wali papano.

⁴³“Para mzimu uheni wafumamo mu munthu, ukwendendeka mu charu cha chinkhamwa, kupenja malo ghakupumulapo. Kweni para ukughasanga chara,

⁴⁴ukuti, ‘Nditi ndiwerere ku nyumba yane uko nkhafuma.’ Para wiza ukuyisanga mulije na kanthu ndipo njakuphyereka na kutozgeka.

⁴⁵Ntheura ukuruta kuya katora mizimu yinyakhe yinkhonde na yiŵiri, yeneiyo njiheni kuruska wenecho, ndipo pamoza na iwo wenecho yikunjira na kukhara mwenemumo. Ntheura kaŵiro ka munthu yura ka pamanyuma, kakuŵa kaheni chomene kuruska kapakudanga. Ntheura ndimo kwamkuŵira na muwiro uheni uwu.”

⁴⁶Apo Yesu wakaŵa wachali kuyowoya na mizinda ya ŵanthu, ŵanyina na ŵanung'una ŵakhe ŵakafika na kwimilira kuwaro. Ŵakakhumbanga kuyowoya nayo. [

⁴⁷Munthu yunji wakamuphalira Yesu wakati, “Ŵanyinamwe na ŵanung'una ŵinu ŵimilira kuwaro ŵakukhumba kuyowoya namwe.”]

⁴⁸Kweni Yesu wakamuzgora munthu yura wakati, “Amama mba njani, ndipo ŵanung'una ŵane mba njani?”

⁴⁹Wakanyoroskera woko lakhe ku ŵasambiri ŵakhe wakati, “Aŵa ndiwo amama na ŵanung'una ŵane!

⁵⁰Pakuti yose uyo wakuchita khumbo la Ŵadada ŵa kuchanya, ndiyo munung'una wane na mudumbu wane ndiposo ndiyo mama.”