Read new_tumbuka_bible Mateyu 13 Bible Online

Mateyu 13 - new_tumbuka_bible bible

Mateyu 13

¹Pa zuŵa lenelira Yesu wakafuma mu nyumba, ndipo wakaya kakhara mu mphepete mwa nyanja.

²Mizinda yikuru ya ŵanthu yikawungana na kumuzingirizga. Ntheura wakanjira mu ngaraŵa na kukhara pasi, ndipo ŵanthu wose ŵakimilira pa mtunda.

³Yesu wakaŵayowoyera ŵanthu vinthu vinandi mu ntharika. Wakati, “Mumiji wakaruta kuya kaseŵa mbuto.

⁴Ndipo apo wakaseŵanga, mbuto yinyakhe yikawa mu mphepete mwa nthowa, ndipo tuyuni tukiza tukayisora.

⁵Mbuto yinyakhe yikawa pa lusokorowe, penepapo pakaŵavye dongo linandi. Ndipo yikamera luŵiro chifukwa pakaŵavye dongo linandi.

⁶Kweni dazi likati lakwera, yikaŵawuka na komira pakuti yikaŵavye nkhorozi.

⁷Mbuto yinyakhe yikawa mukati mu minga, ndipo minga yikakura na kuyifyoronganiska.

⁸Mbuto yinyakhe yikawa mu dongo liweme, yikapambika vipambi, yinyakhe 100 yinyakhe 60, yinyakhe 30.

⁹Uyo wali na makutu ghakupulikira, wapulike.”

¹⁰Ŵasambiri ŵakiza kwa Yesu, ŵakamufumba ŵakati, “Chifukwa uli mukuŵayowoyera ŵanthu mu zintharika?”

¹¹Iyo wakaŵazgora wakati, “Imwe muli kupika mwaŵi wakumanyira vya muchindindi vya Ufumu wa kuchanya, kweni ŵanji ŵalije kupika mwaŵi wa kamanyiro ka ntheura.

¹²Pakuti yose uyo wali na kanthu ŵati ŵamupenge vinandi, ndipo wati waŵenge na vyakuzara. Kweni yose uyo walije kanthu, nanga ndi ako wali nako ŵamupokenge.

¹³Ndicho chifukwa nkhuŵayowoyera mu zintharika. Pakuti nanga ŵakuwona, kuti ŵakuwoneska chara, nanga ŵakupulika kuti ŵakupulikiska chara nesi kumanyiska.

¹⁴Na iwo uchimi wa Yesaya ukufiskika uwo ukuti, ‘Kupulika muti mupulikenge nadi, kweni kuti mupulikiskenge chara. Kulaŵiska muti mulaŵiskenge nadi, kweni kuti muwonenge kanthu chara.

¹⁵Pakuti mtima wa ŵanthu aŵa uli kukurungara, ndipo makutu ghawo ngazitu kupulika, ndiposo ŵali kujara maso ghawo, mzire ŵawone na maso ghawo, na kupulika na makutu ghawo, ndipo ŵamanyiske na mahara ghawo, ndipo ŵawerere kwa ine kuti ine ndiŵachizge.’

¹⁶“Kweni imwe ndimwe ŵakutumbikika chifukwa maso ghinu ghakuwona, ndipo makutu ghinu nagho ghakupulika.

¹⁷Nadi nkhumuphalirani kuti, nchimi zinandi na ŵanthu ŵarunji ŵakadokanga kuwona ivyo imwe mukuviwona, ndipo kuti ŵakaviwona chara. Ŵakadokanga kupulika vyeneivyo imwe mukupulika, kweni kuti ŵakavipulika chara.”

¹⁸“Tegherezgani sono ku ntharika ya mumiji.

¹⁹Para munthu waliyose wakupulika mazgu gha Ufumu wa kuchanya, ndipo wakureka kughapulikiska, Muheni Yura wakwiza na kukwapura icho chaseŵeka mu mtima wakhe. Iyi ndi mbuto iyo yikaseŵeka mu mphepete mwa nthowa.

²⁰Mbuto iyo yikaseŵeka pa lusokorowe, yikulingana na munthu uyo wakupulika mazgu gha Chiuta, maluŵiro wakughapokera na chimwemwe.

²¹Kweni mazgu kuti ghakujintha nkhorozi chara. Nga kanyengo kachoko waka, ndipo para visuzgo vikwiza panji kuzikizgika chifukwa cha mazgu, wakuwa luŵiro.

²²Mbuto iyo yikaseŵeka mu minga, yikulingana na munthu mweneuyo wakupulika mazgu gha Chiuta. Kweni vyakwenjezga vya umoyo na upusikizgi wa usambazi wa mu charu, vikughafyoronganiska mazgu ndipo munthu yura wakuŵa wambula vipambi.

²³Ndipo iyo yikaseŵeka pa dongo liweme yikulingana na munthu uyo wakupulika mazgu gha Chiuta na kughapulikiska ndipo nadi wakupambika vipambi, munyakhe 100 na munyakhe 60, ndiposo munyakhe 30.”

²⁴Yesu wakaŵatayira ntharika yinyakhe wakati, “Ufumu wa kuchanya uli nga ndi munthu uyo wakaseŵa mbuto yiweme mu munda wakhe.

²⁵Kweni apo ŵanthu ŵakaŵa mu tulo, murwani wakhe wakiza na kuseŵamo duru mukati mu tirigu, ndipo wakaruta.

²⁶Para mbuto yikamera na kupambika vipambi, ndipera duru nayo wakawoneka.

²⁷Ŵateŵeti ŵa mwene-munda yura ŵakiza kwa iyo na kumufumba kuti, ‘Sekuru, asi mukaseŵa mbuto yiweme pera mu munda winu? Kasi duru wafumankhu?’

²⁸Iyo wakati kwa iwo, ‘Ndi murwani uyo wachita ichi.’ Ndipo ŵateŵeti ŵakhe ŵakamufumba ŵakati, ‘Kasi mukukhumba kuti timuchese duru?’

²⁹Iyo wakazgora wakati, ‘Chara, mzire pakuchesa muzgulire kumoza na tirigu.

³⁰Rekani vikulenge pamoza kufikira pa nyengo ya vuna. Pa nyengo ya vuna ndamkuŵaphalira ŵakuvuna kuti ŵachese danga duru na kumukaka mu zimphundwe ndipo ŵamoche, kweni tirigu ndiyo ŵamuronge mu nthamba yane.’ ”

³¹Yesu wakaŵatayira ntharika yinyakhe wakati, “Ufumu wa kuchanya uli nga ndi njere la matubeni ulo munthu wakatora na kupanda mu munda wakhe.

³²Mbuto iyi njichoko chomene kuruska zose. Kweni para yamera yikukura na kuŵa yikuru kuruska vivwati vyose, ndipo yikuzgoka kuŵa khuni. Ntheura viyuni vya mudera vikwiza na kuzenga vivimbo mu minthavi yakhe.”

³³Yesu wakaŵatayira ntharika yinyakhe wakati, “Ufumu wa kuchanya ukulingana na chirungo icho mwanakazi wakatora na kusazga na ufu wa vidunga vitatu mpaka ufu wose ukarungika.”

³⁴Yesu wakayowoya vyose ivi ku mzinda wa ŵanthu mu zintharika. Kuti wakayowoyapo kanthu chara kwambula kuti wayowoyere mu zintharika.

³⁵Wakachita ntheura mwakuti ghafiskike mazgu gha nchimi agho ghakuti, “Nditi ndiyowoye nawo mu zintharika. Nditi ndiyowoye ivyo vili kubisika kufuma ku mutendeko wa charu.”

³⁶Yesu wakati wawezga mizinda ya ŵanthu wakanjira mu nyumba. Ndipo ŵasambiri ŵakhe ŵakiza kwa iyo ŵakati, “Mutirongosorere ntharika ya duru wa mu munda.”

³⁷Wakazgora wakati, “Uyo wakuseŵa mbuto yiweme ndi Mwana wa Munthu.

³⁸Munda ndi charu, ndipo mbuto yiweme ndi ŵana ŵa Ufumu. Duru ndi ŵana ŵa Muheni Yura.

³⁹Murwani uyo wakuseŵa duru ndi Satana. Vuna ndi umaliro wa charu.[7] Ndipo ŵakuvuna ndi ŵangelo.

⁴⁰Nga ndi umo ŵakuchesera duru na kocha mu moto, ntheura ndimo kwamkuŵira pa umaliro wa charu ichi.

⁴¹Mwana wa Munthu wamkutuma ŵangelo ŵakhe ndipo ŵamkufumyamo mu Ufumu wakhe wose awo ŵakukhuŵazga ŵanyawo na awo ŵakuchita uheni.

⁴²Ŵamkuŵaponya ŵanthu aŵa mu ng'anjo ya moto, mwenemumo ŵamkulira na kuska mino.

⁴³Penepapo ŵarunji ŵamkuŵala nga ndi dazi mu Ufumu wa Ŵawiskewo. Uyo wali na makutu ghakupulikira, wapulike.”

⁴⁴“Ufumu wa kuchanya uli nga ndi chuma chakubisika mu munda. Para munthu wachisanga, wakuchibisaso. Ndipo na chimwemwe wakuruta na kuguliska vinthu vyose ivyo wali navyo na kuya kagula munda wenewura.”

⁴⁵“Ndiposo Ufumu wa kuchanya uli nga ndi munthu wa malonda, uyo wakapenjanga ngale zakuzirwa.

⁴⁶Para wakati wasanga yimoza ya mtengo wa patali, wakaruta kuya kaguliska vinthu vyose ivyo wakaŵa navyo, ndipo wakayigula ngale yira.”

⁴⁷“Ndiposo Ufumu wa kuchanya ukulingana na mukwawu, uwo ukuponyeka mu nyanja na kukora somba za mitundu yose.

⁴⁸Para wazura, ŵanthu ŵakuwuguzira pa mlima. Ndipo ŵakukhara pasi ndipo ŵakusolera somba ziweme mu vidunga, kweni ziheni ŵakutaya.

⁴⁹Ndimo kwamkuŵira pa umaliro wa charu. Ŵangelo ŵamkwiza na kupatula ŵaheni ku ŵarunji,

⁵⁰na kuŵaponya mu ng'anjo ya moto, mwenemumo ŵamkulira na kuska mino.”

⁵¹Yesu wakaŵafumba wakati, “Kasi mwapulikiska vyose vyeneivi?” Iwo ŵakazgora ŵakati, “Inya.”

⁵²Ndipo wakati kwa iwo, “Mumanyi-marango yose uyo wali kusambizgika vya Ufumu wa kuchanya, wali nga ndi mwene-nyumba uyo wakufumiskamo vinthu ivyo nviphya na vinthu ivyo nvidala mu usambazi wakhe.”

⁵³Yesu wakati wamara ntharika izi, wakawukako kura.

⁵⁴Ndipo wakati wafika mu msumba wa kwawo, wakamba kuŵasambizga ŵanthu mu nyumba ya kusoperamo. Ndipo ŵanthu ŵakazizwa, ŵakafumba ŵakati, “Kasi munthu uyu wali kusanga nkhu mahara agha na milimo iyi ya nkhongono?

⁵⁵Asi uyu ndiyo mwana wa muŵaji wa mathabwa? Asi nyina ndi Mariya? Ndipo asi ŵanung'una ŵakhe ndi Yakhobe, Yosefe, Simoni, na Yudasi?

⁵⁶Ndipo asi ŵadumbu ŵakhe wose ŵali na ise? Kasi sono munthu uyu wali kuvitora nkhu vyose ivi?”

⁵⁷Ntheura ŵakakhuŵazgika mwa iyo. Kweni Yesu wakati kwa iwo, “Nchimi njakuchindikika kosekose, kweni mu charu cha ku kwakhe na mu nyumba yakhe ndimo yikuchindikika chara.”

⁵⁸Ntheura Yesu kuti wakachitako milimo ya nkhongono chara, chifukwa chakuwura kupulikana kwawo.