Read new_tumbuka_bible Mateyu 14 Bible Online

Mateyu 14 - new_tumbuka_bible bible

Mateyu 14

¹Pa nyengo yira, Herode, uyo wakawusanga mu Galileya, wakapulika na za lumbiri lwa Yesu.

²Ndipo wakati ku ŵateŵeti ŵakhe, “Uyu ndi Yohane Mubapatizi yura! Wali kuwuskika ku ŵakufwa. Ndicho chifukwa nkhongono izi zikuchita nchito mwa iyo.”

³Pakuti Herode wakalangula kale kuti Yohane wakoreke, wakakike na kuŵikika mu gadi. Wakachita ichi chifukwa cha Herodiya muwoli wa Filipu munung'una wakhe.

⁴Pakuti Yohane wakamuphalira Herode kuti, “Nchambula kulangurika kuti umutore Herodiya muwoli wa munung'una wako kuti waŵe muwoli wako.”

⁵Herode wakakhumbanga kumukoma Yohane, kweni wakopanga ŵanthu, pakuti ŵakamupima kuti ndi nchimi.

⁶Pa zuŵa lakukumbukira kubabika kwa Herode, mwana msungwana wa Herodiya wakavina panthazi pa awo ŵakachemeka ku chiphikiro ndipo wakamukondweska chomene Herode.

⁷Penepapo Herode wakapangana wakati, “Nkhurapa, nditi ndikupe chilichose icho ungaromba.”

⁸Kweni msungwana yura, pakukhuŵirizgika na ŵanyina, wakaromba wakati, “Mundipe pa ngwembe sono apa, mutu wa Yohane Mubapatizi.”

⁹Karonga wakaŵa na chitima. Kweni chifukwa cha virapo vyakhe na chifukwa cha awo ŵakachemeka pa chiphikiro, wakalangula kuti ŵamupe mutu wa Yohane.

¹⁰Wakatuma ŵanthu kuya kadumula mutu wa Yohane mu gadi.

¹¹Mutu wakhe ŵakawutorera pa ngwembe na kumupa msungwana yura, ndipo iyo wakaruta nawo ku ŵanyina.

¹²Ŵasambiri ŵa Yohane ŵakiza, ŵakatora thupi lakhe ndipo ŵakaya kasunga. Ntheura ŵakaruta kuya kamuphalira Yesu.

¹³Para Yesu wakapulika icho chikachitika, wakafumako kura, wakanjira mu ngaraŵa na kuruta ku malo ghambula ŵanthu pa yekha. Para ŵanthu ŵakapulika, ŵakenda pasi kufuma ku mizi yawo na kumurondezga.

¹⁴Yesu wakati wafuma mu ngaraŵa na kuwona mzinda ukuru wa ŵanthu, wakaŵa na chiwuravi na iwo ndipo wakachizga ŵarwari ŵawo.

¹⁵Apo kukafipanga waka, ŵasambiri ŵakhe ŵakiza kwa iyo, ŵakamuphalira ŵakati, “Kuno ndi malo ghambula ŵanthu, zuŵa nalo laruta. Muŵawezge ŵanthu mwakuti ŵarute ku vikaya kuya kajigulira vyakurya.”

¹⁶Yesu wakaŵazgora wakati, “Nchakwenerera chara kuti ŵarute, ŵapani ndimwe chakurya.”

¹⁷Ŵasambiri ŵakhe ŵakati, “Pano tili na vingwa vinkhonde na somba ziŵiri pera.”

¹⁸Yesu wakati, “Zani navyo kwa ine.”

¹⁹Ntheura wakaŵalangula ŵanthu kuti ŵakhare pasi pa utheka. Ndipo wakati watora vingwa vinkhonde vira na somba ziŵiri zira, wakalaŵiska kuchanya, wakawonga Chiuta, ndipo wakati wamenya wakapereka vingwa ku ŵasambiri awo ŵakagaŵira ŵanthu.

²⁰Ŵanthu wose ŵakarya na kukhuta. Ndipo ŵasambiri ŵakasora vimenyu ivyo vikakharapo, ndipo vikazura vidunga 12.

²¹Awo ŵakarya ŵakaŵa ŵanarume vikwi vinkhonde kwambula kusazgako ŵanakazi na ŵana.

²²Mise yeneyira Yesu wakaŵaphalira ŵasambiri ŵakhe kuti ŵanjire mu ngaraŵa na kudangirako ku sirya linyakhe la nyanja, apo iyo wakawezganga mizinda ya ŵanthu.

²³Wakati wawezga mizinda yira, wakakwerera mu phiri kuya karomba pa yekha. Kweni apo kukafipanga waka, wakakhara yekha ku phiri.

²⁴Ndipo pa nyengo iyi ngaraŵa yikaŵa pa nyanja pakati, yikalimbananga na majigha chifukwa mphepo yikaŵajandizganga.

²⁵Ndipo ku matandakucha na nyengo ya 4 koloko, Yesu wakafika pa iwo wakwenda pa nyanja.

²⁶Ŵasambiri ŵakati ŵamuwona Yesu wakwenda pa nyanja, ŵakofiwa ŵakati, “Ndi muzguka!” Ndipo ŵakachemerezga chifukwa cha wofi.

²⁷Kweni maluŵiro Yesu wakayowoya nawo wakati, “Khwimani mtima, ndine, mungopanga.”

²⁸Petrosi wakazgora wakati, “Fumu, usange ndimwe, mundilangure nane ndiyende pa maji kwiza kwa imwe.”

²⁹Yesu wakati, “Zanga!” Petrosi wakafuma mu ngaraŵa na kwenda pa maji kuya kwa Yesu.

³⁰Kweni wakati wawona mphepo wakopa, ndipo apo wakambanga waka kubira, wakachemerezga wakati, “Fumu, ndiponoskani!”

³¹Luŵiro Yesu wakanyoroska woko lakhe na kumukora, ndipo wakayowoya nayo wakati, “Okwe, wa munthu wa chipulikano chichoko! Chifukwa uli wakayikanga?”

³²Para ŵakanjira mu ngaraŵa, mphepo yikareka.

³³Awo ŵakaŵa mu ngaraŵa ŵakamulambira Yesu, ŵakati, “Nadi, ndimwe Mwana wa Chiuta!”

³⁴Ndipo para Yesu na ŵasambiri ŵakhe ŵakati ŵambuka nyanja ŵakafika ku Mutezarete.

³⁵Ŵanthu ŵa mu malo ghara ŵakati ŵamupanikizga Yesu, ŵakatuma mazgu kosekose mu charu chira ndipo ŵanthu ŵakiza kwa iyo na wose awo ŵakaŵa ŵarwari.

³⁶Ndipo ŵakamuŵeya Yesu kuti ŵarwari ŵakhwaske ku mphonje pera za laya lakhe. Ntheura wose awo ŵakakhwaska laya lakhe ŵakachira.