Read new_tumbuka_bible Mateyu 15 Bible Online

Mateyu 15 - new_tumbuka_bible bible

Mateyu 15

¹Ntheura ŵaFarisi na ŵamanyi-marango ŵakiza kwa Yesu kufuma ku Yerusalemu ndipo ŵakati,

²“Chifukwa uli ŵasambiri ŵako ŵakureka kupulikira maluso gha ŵasekuru ŵithu? Pakuti ŵakureka kugeza mawoko para ŵakurya.”

³Yesu wakaŵazgora wakati, “Imwe namwe, kasi mukwanangirachi dango la Chiuta chifukwa cha maluso ghinu?

⁴Pakuti Chiuta wakalangula kuti, ‘Chindika ŵawuso na ŵanyoko,’ ndipo ‘Yose uyo wakutuka ŵawiske panji ŵanyina wakwenera kukomeka.’

⁵Kweni imwe mukuti, ‘Usange munthu yunji wakuphalira ŵawiske panji ŵanyina kuti, Chawanangwa icho ine ndatenge ndimupani, sono chaperekeka kwa Chiuta.’

⁶Ntheura imwe mukuti wakuchindikaso ŵawiske panji ŵanyina chara. Chifukwa cha maluso ghinu, mazgu gha Chiuta muli kughazgora gha waka.

⁷Mwa ŵapusikizgi imwe! Yesaya wakaneneska pakuchima na vya imwe para wakati,

⁸‘Ŵanthu aŵa ŵakundichindika na mlomo wawo pera, kweni mtima wawo uli kutali na ine.

⁹Ŵakundisopa nadi, kweni kusopa kwawo nkhwa waka. Visambizgo ivyo ŵakusambizga nga ndi vyenecho, kweni ndi maluso waka gha ŵanthu!’ ”

¹⁰Yesu wakachema mzinda wa ŵanthu ndipo wakaŵaphalira wakati, “Tegherezgani, ndipo mupulikiske makora.

¹¹Icho chikunjira mu mlomo kuti ndicho chikukazuzga munthu chara, kweni icho chikufuma mu mlomo, ndicho chikukazuzga munthu.”

¹²Ŵasambiri ŵakhe ŵakiza ndipo ŵakafumba ŵakati, “Kasi mukumanya kuti ŵaFarisi ŵangukhuŵala mu mtima para ŵanguti ŵapulika mazgu ghinu?”

¹³Yesu wakazgora wakati, “Chakumera chose icho Ŵadada ŵa kuchanya ŵalije kupanda, chiti chizgulikenge.

¹⁴Ŵarekani waka. Iwo mbarongozgi ŵa chiburumutira. Ndipo usange wachiburumutira wakurongozga wachiburumutira munyakhe, wose ŵaŵiri wuwo ŵati ŵawenge mu mbuna.”

¹⁵Petrosi wakati, “Mutirongosorere ntharika iyi.”

¹⁶Yesu wakati, “Kasi namweso muli ŵambula kumanyiska?

¹⁷Kasi mulije kumanya kuti icho chikunjira mu mlomo chikuya mu nthumbo, ndipo pamanyuma chikuya kafumira ku thondo?

¹⁸Kweni ivyo vikufumira pa mlomo, vikufuma ku mtima vyeneivi ndivyo vikukazuzga munthu.

¹⁹Pakuti mu mtima wa munthu ndimo mukufuma maghanoghano ghaheni: uchikozi, uleŵe, uzaghali unkhungu, ukaboni wa utesi, na matusi.

²⁰Ivi ndivyo vikukazuzga munthu. Kweni kurya na mawoko ghambula kugeza kuti kukukazuzga munthu chara.”

²¹Yesu wakafumako ku malo ghara na kuruta ku vigaŵa vya Ture na Sidoni.

²²Mwanakazi wa ku Kanani mweneuyo wakafuma mu chigaŵa chenechira wakiza kwa Yesu na kuchemerezga wakati, “Mwe Fumu, Mwana wa Davide mundilengere lusungu! Mwana wane msungwana wakusuzgika chomene na chiŵanda.”

²³Kweni Yesu kuti wakamuzgora chara. Ndipo ŵasambiri ŵakhe ŵakiza, ŵakamuŵeya ŵakati, “Muphalirani uyu kuti warutenge chifukwa wakutirondezga na kutichitira chiwawa.”

²⁴Yesu wakaŵazgora wakati, “Kuti nkhatumika ku ŵanji chara, kweni ku mberere za mbumba ya Israele.”

²⁵Kweni mwanakazi yura wakiza wakajikama wakati, “Fumu ndovwirani!”

²⁶Yesu wakazgora wakati, “Kuti nchakwenerera chara kutora chakurya cha ŵana na kuponyera ncheŵe.”

²⁷Kweni mwanakazi yura wakati, “Inya, Fumu, kweni nanga ndi ncheŵe nazo zikurya maruvuvu agho ghakurakata kufuma pa thebulu la ŵasekuru ŵawo!”

²⁸Penepapo Yesu wakamuzgora wakati, “Wa mwanakazi iwe, chipulikano chako nchikuru! Vikuchitikire kwakuyana na umo ukukhumbira.” Mwana msungwana wa mwanakazi yura wakachira pa nyengo yeneyira.

²⁹Yesu wakawukapo pa malo ghara, wakenda mu mphepete mwa Nyanja ya Galileya. Ndipo wakakwera pa phiri na kukhara pasi.

³⁰Ndipo mizinda yikuru ya ŵanthu yikiza kwa iyo na viti, ŵachiburumutira, ŵakupendera, ŵambuwu ndiposo na ŵanyakhe ŵanandi. Aŵa wose ŵakaŵaŵika panthazi pa malundi ghakhe. Ndipo Yesu wakaŵachizga.

³¹Ntheura ŵanthu wose ŵakazizwa para ŵakawona kuti ŵambuwu ŵakuyowoya, ŵakupendera ŵakuchira, viti vikwenda, ndiposo ŵachiburumutira ŵakuwonaso. Ntheura ŵakamuchindika Chiuta wa Israele.

³²Ntheura Yesu wakaŵachemera ŵasambiri ŵakhe kwa iyo ndipo wakati, “Ndili nawo na chiwuravi ŵanthu wose aŵa, chifukwa ŵakhara nane mazuŵa ghatatu ndipo sono ŵalije chakurya. Nkhukhumba chara kuŵawezga na njara, mzire ŵafwe lunkhuŵa mu nthowa.”

³³Ŵasambiri ŵakhe ŵakamufumba ŵakati, “Kasi tingachisanga nkhu chakurya chinandi muno mu chiparamba, kuti tikwaniske mzinda ukuru nga ndi uwu.”

³⁴Yesu wakaŵafumba wakati, “Muli na vingwa vilinga?” Ŵakazgora ŵakati, “Tili navyo vinkhonde na viŵiri na tusomba tuchoko waka.”

³⁵Yesu wakaŵalangula ŵanthu ŵa mu mzinda kuti ŵakhare pasi.

³⁶Penepapo wakatora vingwa vinkhonde na viŵiri vira, ndiposo na tusomba tura. Wakati wawonga Chiuta, wakavimenya na kupereka ku ŵasambiri ŵakhe ndipo ŵasambiri ŵakavipereka ku mzinda wa ŵanthu.

³⁷Ŵanthu wose ŵakarya na kukhuta. Pamanyuma ŵasambiri ŵakasora vimenyu ivyo vikakharapo, vikazura vidunga vinkhonde na viŵiri.

³⁸Awo ŵakarya ŵakaŵa ŵanarume vikwi vinayi kwambula kusazgako ŵanakazi na ŵana.

³⁹Yesu wakati wawezga mzinda, wakanjira mu ngaraŵa ndipo wakaruta ku charu cha Magadani.