Read new_tumbuka_bible Mateyu 16 Bible Online

Mateyu 16 - new_tumbuka_bible bible

Mateyu 16

¹ŴaFarisi na ŵaSaduki, ŵanji ŵakiza kwa Yesu, ndipo pakumuyezga ŵakamufumba kuti waŵarongore chimanyikwiro chakufumira kwa Chiuta.

²Yesu wakaŵazgora wakati, “Na mise mukuti, ‘Kuŵenge makora chifukwa mtambo ngwa kuchesama.’

³Ndipo na mulenje mukuyowoya kuti, ‘Muhanya uno kuti kuŵenge vura ya chimphupuru chifukwa mtambo wachesama ndipo maŵingu ghati waka bii.’ Mukumanya kupima kawonekero ka zinyengo kweni kuti mukumanya kang'anamuliro ka vimanyikwiro ka zinyengo zino chara.

⁴Mwa muwiro uheni na wa uleŵe imwe, mukupenja chimanyikwiro ndipo chimanyikwiro kuti chipikenge kwa imwe chara, kweni cha nchimi Yona pera.” Ntheura Yesu wakaŵareka ndipo wakaruta.

⁵Para Ŵasambiri ŵakafika pa nyanja kuya ku sirya linyakhe la nyanja, ŵakaruwa kuyegha vingwa.

⁶Yesu wakati kwa iwo, “Chenjerani, muŵe maso na chirungo cha ŵaFarisi na ŵaSaduki.”

⁷Ŵasambiri ŵakamba kudumbiskana ŵakati, “Wakuyowoya ntheura chifukwa chakuti tilije kuyegha vingwa.”

⁸Yesu wakati wamanya ivyo ŵakadumbiskananga wakati, “Mwa ŵa chipulikano chichoko imwe, chifukwa uli mukudumbiskana mwekha kuti mulije kuyegha vingwa?

⁹Kasi muchali mundamanyiske na sono wuwo? Kuti mukukumbuka chara na vingwa vinkhonde ivyo nkhagaŵira ŵanthu vikwi vinkhonde na unandi wa vidunga vya vimenyu ivyo mukasora?

¹⁰Panji vingwa vinkhonde na viŵiri vira ivyo nkhagaŵira ŵanthu vikwi vinayi na unandi wa vidunga na vimenyu ivyo mukasora?

¹¹Chifukwa uli mukureka kupulikiska, ine kuti ndayowoyanga na vingwa chara? Kweni ndayowoyanga kuti, chenjerani na chirungo cha ŵaFarisi na ŵaSaduki.”

¹²Ntheura ŵakamanyiska kuti wakayowoyanga kuti ŵachenjere na chirungo cha chingwa chara, kweni na kusambizga kwa ŵaFarisi na ŵaSaduki.

¹³Para Yesu wakafika mu vigaŵa vya Kesareya-Filipi, wakaŵafumba ŵasambiri ŵakhe wakati, “Kasi ŵanthu ŵakuti Mwana wa Munthu ndi njani?”

¹⁴Ŵakamuzgora ŵakati, “Ŵanthu ŵanji ŵakuti ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti ndimwe Yeremiya panji yumoza wa nchimi.”

¹⁵Yesu wakati kwa iwo, “Kweni imwe mukuti ndine njani?”

¹⁶Simoni Petrosi wakati, “Imwe ndimwe Mesiya Mwana wa Chiuta wamoyo!”

¹⁷Yesu wakamuzgora Petrosi wakati, “Wakutumbikika ndiwe Simoni mwana wa Yona, chifukwa kuti ndi munthu wakuvumbulira ichi chara, kweni Ŵadada ŵa kuchanya.

¹⁸Ntheura nkhukuphalira kuti, ndiwe Petrosi, ndipo pa jarawe ili nditi ndizengenge mpingo wane. Nkhongono za nyifwa kuti zizamkuwutonda chara.

¹⁹Nditi ndikupenge vijuriro vya Ufumu wa kuchanya. Chose icho mukakenge pano pasi chamkukakika na kuchanya wuwo. Chose icho musutulenge pano pasi, chamkusutulika na kuchanya wuwo.”

²⁰Penepapo wakaŵachinyinthizga ŵasambiri ŵakhe kuti ŵareke kuphalirapo munthu waliyose kuti iyo ndi Mesiya.

²¹Kufuma pa nyengo yeneyira, Yesu wakamba kuŵayowoyera pakweru ŵasambiri ŵakhe wakati, “Nkhwenera kuruta ku Yerusalemu kwenekuko ndamkusuzgika pa vinandi na ŵarara, ŵasofi ŵarara ndiposo na ŵamanyi-marango na kukomeka, ndipo na kuwuskika ku ŵakufwa.”

²²Penepapo Petrosi wakatorera Yesu pa mphepete ndipo wakamba kumuchenya wakati, “Chara, Fumu, Chiuta kuti wazomerezgenge ichi kuchitika kwa imwe chara.”

²³Kweni Yesu wakazgoka na kuchenya Petrosi wakati, “Tiye uko Satana! Ndiwe chakundikhuŵazga, chifukwa ukughanaghana vinthu vya Chiuta chara, kweni vya ŵanthu pera.”

²⁴Penepapo Yesu wakaŵaphalira ŵasambiri ŵakhe kuti, “Usange munthu wakukhumba kundirondezga, wakwenera kujipata, kunyamura mphinjika yakhe, na kundirondezga.

²⁵Pakuti yose uyo wakukhumba kuponoska umoyo wakhe, wati wawutayenge. Yose uyo watayenge umoyo wakhe chifukwa cha ine, wati wawusangenge.

²⁶Kasi kungamwandulirachi munthu kuti waphindule charu chose cha pasi na kutaya umoyo wakhe? Kasi munthu wangapereka chinthu uli kuti wawombole umoyo wakhe?

²⁷Pakuti Mwana wa Munthu wati wizenge mu uchindami wa ŵaWiske pamoza na ŵangelo ndipo wizamkupereka njombe kwa munthu yose kwakuyana na milimo yakhe.

²⁸Nadi nkhumuphalirani kuti, ŵalipo ŵanji awo ŵakwimilira pano, awo kuti ŵati ŵafwenge chara ŵasuke ŵawone Mwana wa Munthu wakwiza mu Ufumu wakhe.”