Read new_tumbuka_bible Mateyu 18 Bible Online

Mateyu 18 - new_tumbuka_bible bible

Mateyu 18

¹Pa nyengo yeneyira ŵasambiri ŵakiza kwa Yesu, ŵakamufumba ŵakati, “Kasi mukuru kuruska wose mu Ufumu wa kuchanya ndi njani?”

²Yesu wakachema mwana muchoko na kumwimika pakati pawo. Ndipo wakati,

³“Nadi nkhumuphalirani kuti kwambula kuti mung'anamuke na kuŵa nga mbana, kuti mwamkunjiramo chara mu Ufumu wa kuchanya.

⁴Ntheura yose uyo wakujiyuyura na kuŵa nga mwana muchoko uyu, ndiyo ndi mukuru kwakuruska mu Ufumu wa kuchanya.

⁵Ndipo yose uyo wakupokerera mwana muchoko nga ndi uyu mu zina lane, wakupokerera ine.”

⁶“Kweni yose uyo wakukhuŵazga yumoza wa ŵana ŵachoko aŵa, awo ŵakupulikana mwa ine, nkhuweme kwa iyo kuti lwara lukuru lukakiririke mu singo yakhe na kumubizga mu ndimba ya nyanja.

⁷Soka ku charu chifukwa cha vikhuŵazgo. Nadi vikhuŵazgo viŵengeko ndipera, kweni soka kwa uyo chikhuŵazgo chikwiziramo.

⁸“Usange woko lako, panji lundi lako likukwanangiska, ulidumureko na kulitaya. Nkhuweme kuti ukanjire ku umoyo wa muyirayira uli chiti panji wakupendera kuruska kuti uŵe na mawoko ghaŵiri panji malundi ghaŵiri na kuponyeka ku moto wa muyirayira.

⁹Usange jiso lako likukwanangiska ulikozombore na kulitaya. Nkhuweme kuti ukanjire ku umoyo wa muyirayira uli na jiso limoza kuruska kuti uŵe na maso ghaŵiri na kuponyeka ku Gehena wa moto.

¹⁰“Chenjerani! Mureke kuyuyura yumoza wa ŵana ŵachoko aŵa. Pakuti nkhumuphalirani kuti, nyengo zose ŵangelo ŵawo ŵali pa maso gha Ŵadada kuchanya. [

¹¹Pakuti Mwana wa Munthu wakiza kwiza kaponoska icho chikazgeŵa.]

¹²“Mukughanaghana vichi? Usange munthu wali na mberere 100, ndipo yimoza yazgeŵa, asi wakusida 99 pa mapiri na kuya kapenja iyo yazgeŵa?

¹³Ndipo usange wayisanga, nadi nkhumuphalirani kuti, wakuyikondwerera chomene mberere yira kuruska zira 99 izo kuti zikazgeŵa chara.

¹⁴Ntheura pera, Ŵawiskemwe ŵa kuchanya nawo kuti ŵakukhumba chara kuti yumoza wa ŵana ŵachoko aŵa ŵatayike.

¹⁵“Usange munyako wakwanangira, ruta na kumuphalira kusovya kwakhe pa yekha. Usange wakupulikira, ndiko kuti wamuwezga munyako.

¹⁶Kweni usange wareka kukupulikira, uchemerepo munthu yumoza panji ŵaŵiri kuŵa nawe pamoza mwakuti mazgu ghose ghakhozgeke na ŵakaboni ŵaŵiri panji ŵatatu.

¹⁷Usange wakana kuŵapulikira, phalira mpingo. Usange wareka kupulikira nanga ndi mpingo, umupime kuŵa nga ndi munthu wakuwaro na wakusonkheska msonkho.

¹⁸“Nadi nkhumuphalirani kuti, chose icho mukakenge pano pasi, chiti chikakikenge na kuchanya wuwo, ndiposo chose icho musutulenge pano pasi, chamkusutulika na kuchanya wuwo.

¹⁹“Ndiposo nkhumuphalirani kuti usange mwa ŵaŵiri mukuzomerezgana pano pasi pa kalikose ako mukuromba, Ŵadada ŵa kuchanya ŵati ŵamupaninge.

²⁰Chifukwa pose apo ŵanthu ŵaŵiri panji ŵatatu ŵawungana mu zina lane, penepapo nane ndili pamoza nawo.”

²¹Ntheura Petrosi wakiza kwa Yesu ndipo wakati kwa iyo, “Fumu, kasi munyane ndimugowokerenge kalinga para wandinangira? Kufika kankhonde na kaŵiri?”

²²Yesu wakamuphalira wakati, “Kuti nkhuti umugowokerenge kufika kankhonde na kaŵiri chara, kweni kufika 77.

²³Ntheura Ufumu wa kuchanya ukulingana na karonga uyo wakakhumbanga kuwona ŵateŵeti ŵakhe umo ŵakaŵira na ngongole kwa iyo.

²⁴Apo wakambanga kupenda, wakiza muteŵeti yumoza uyo wakaŵa na ngongole ya ndarama za siliva[8] 10,000.

²⁵Para wakatondeka kulipira, sekuru wakhe wakalangula kuti waguliskike iyomwene na muwoli wakhe pamoza na ŵana ŵakhe na vyose ivyo wakaŵa navyo, kuti ndivyo walipire mrandu.

²⁶Ntheura muteŵeti yura wakamujikamira sekuru wakhe na kumuŵeya wakati, ‘Sekuru mundizizipizgire, nditi ndimupaninge vyose.’

²⁷Sekuru wa muteŵeti yura wakaŵa na chiwuravi ndipo wakamugowokera ngongole yakhe muteŵeti yura, ndipo wakamureka wakaruta.

²⁸“Kweni muteŵeti mweneyurayura wakati wafuma kuwaro, wakasanga muteŵeti munyakhe, uyo wakamukongozga ndarama za madenari[9] 100. Pakumukora pa chigoromiro wakati, ‘Ndilipa icho ukakongora!’

²⁹Ntheura muteŵeti munyakhe yura wakamujikamira wakamuŵeya wakati, ‘Ndizizipizgira. Nditi ndikulipenge.’

³⁰Kweni iyo wakakana ndipo mu malo mwakhe wakaruta nayo kukamunjizga mu gadi wasuke walipe icho wakakongora.

³¹Para ŵateŵeti ŵanyakhe ŵakawona icho chikachitika, ŵakaŵa na chitima chomene. Ŵakaruta ŵakaya kamuphalira vyose sekuru wawo.

³²Penepapo sekuru wakhe wakamuchema, wakayowoya nayo wakati, ‘Wa muteŵeti muheni iwe! Ine nkhakugowokera ngongole yose yira, chifukwa ukandiŵeya.

³³Asi nawe mphanyi ukaŵa na lusungu na muteŵeti munyako nga ndi umo nkhakuchitira iwe?’

³⁴Mu ukari, sekuru wakhe wakamuŵika mu gadi kuti wayuzgike wasuke walipe ngongole yose yira.

³⁵“Ntheura ndimo Ŵadada ŵa kuchanya ŵamkuchitira na waliyose wa imwe, usange mukureka kugowokera ŵanyinu kufumira ku mtima winu.”