Read new_tumbuka_bible Mateyu 19 Bible Online

Mateyu 19 - new_tumbuka_bible bible

Mateyu 19

¹Yesu wakati wamara kuyowoya mazgu agha, wakafumako ku Galileya wakaruta ku chigaŵa cha Yudeya ku sirya linyakhe la mronga wa Yorodani.

²Mizinda yikuru ya ŵanthu yikamurondezga, ndipo kwenekura wakaŵachizga.

³ŴaFarisi ŵanji ŵakiza kwa Yesu na kumuyezga, ŵakati, “Kasi kukulangurika kuti munthu wapate muwoli wakhe pa chifukwa chilichose?”

⁴Yesu wakaŵazgora wakati, “Kasi mundaŵazge kuti uyo wakaŵalenga kufuma ku mutendeko, wakaŵalenga mwanarume na mwanakazi?

⁵Ndipo wakati, ‘Ndicho chifukwa mwanarume wati waside ŵawiske na ŵanyina na kubatikana na muwoli wakhe, ndipo ŵaŵiri aŵa ŵakuŵa thupi limoza.’

⁶Ntheura kuti mbaŵiriso chara, kweni yumoza. Icho Chiuta wagumanya pamoza, munthu wareke kupatula.”

⁷ŴaFarisi ŵakati kwa iyo, “Chifukwa uli Mozesi wakalangula kuti munthu wakwenera kumulembera muwoli wakhe karata wa chipati, ndipo wamupatenge?”

⁸Yesu wakazgora wakati, “Mozesi wakamuzomerezgani kupata ŵawoli ŵinu chifukwa cha unonono wa mitima yinu. Kweni pa mutendeko kuti ndimo kukaŵira chara.

⁹Nkhumuphalirani kuti, yose uyo wakupata muwoli wakhe, kwambula chifukwa cha uleŵe, ndipo wakutora munyakhe, wakuleŵa.”

¹⁰Ŵasambiri ŵakhe ŵakamuphalira kuti, “Usange ndimo kuliri pakati pa mufumu na muwoli wakhe, ipo nchiweme chara kutora.”

¹¹Yesu wakati kwa iwo, “Kuti ndi wose awo ŵangaghapokerera mazgu agha chara, kweni ŵeneawo chili kupika kwa iwo.

¹²Pakuti ŵaliko ŵanthu ŵanji awo ŵangatora chara chifukwa ŵakababika ntheura, ndiposo ŵanthu ŵanji awo ŵangatora chara chifukwa ŵanthu ŵanji ŵakaŵatungula. Ŵaliposo ŵanthu ŵanji awo ŵangatora chara chifukwa cha Ufumu wa kuchanya. Uyo wakumanya kupokera chisambizgo ichi, wachipokerere.”

¹³Ŵanthu ŵanji ŵakiza na twana kwa Yesu kuti waŵike mawoko ghakhe pa ito na kuturombera. Kweni ŵasambiri ŵakaŵachenya awo ŵakiza na twana.

¹⁴Yesu wakati, “Tuzomerezgani twana twize kwa ine, mungatukanizganga chara. Pakuti Ufumu wa kuchanya ngwa twa ntheura.”

¹⁵Wakati waŵika mawoko ghakhe pa ito, wakafumapo na kuruta.

¹⁶Ndipo muwukirano yumoza wakiza kwa Yesu wakati, “Musambizgi! Kasi ndichitenge uweme uli kuti ndiŵe na umoyo wa muyirayira?”

¹⁷Yesu wakayowoya nayo wakati, “Chifukwa uli ukundifumba na za icho nchiweme? Waliko yumoza pera uyo ndi muweme. Para ukukhumba kuŵa na umoyo wa muyirayira, sungilira marango.”

¹⁸Iyo wakazgora wakati, “Marango nga?” Yesu wakazgora wakati, “Ungakomanga, Ungaleŵanga, Ungibanga, Ungaŵanga kaboni wa utesi,

¹⁹Chindika ŵawuso na ŵanyoko, ndipo Utemwenge muzengezgani wako nga ndi umo ukujitemwera wamwene.”

²⁰Muwukirano yura wakati, “Marango ghose agha ndili kughasunga kufuma ku wanichi wane, kasi sono kwakharachi?”

²¹Yesu wakamuphalira wakati, “Usange ukukhumba kuŵa wakufikapo, rutanga ukaguliske vyose ivyo uli navyo ndipo ndarama zakhe ukaŵape ŵakavu, ndipo wamkuŵa na usambazi kuchanya. Ntheura ŵize na kundirondezga.”

²²Para muwukirano yura wakapulika ichi, wakawukapo na chitima chifukwa wakaŵa musambazi chomene.

²³Ndipo Yesu wakati ku ŵasambiri ŵakhe, “Nadi nkhumuphalirani, nkhunonono chomene kuti musambazi wanjire mu Ufumu wa kuchanya.

²⁴Ndipo nkhuwerezgaso kuti, nchipusu kuti ngamila yisorote mu jiso la sindano kuruska kuti musambazi wanjire mu Ufumu wa Chiuta.”

²⁵Para ŵasambiri ŵakapulika ichi, ŵakazizwa chomene ndipo ŵakafumba ŵakati, “Kasi ndi njani uyo wangaponoskeka?”

²⁶Yesu wakaŵalaŵiska ndipo wakati, “Ku ŵanthu ichi nchambula machitiko, kweni kwa Chiuta vyose vya machitiko.”

²⁷Penepapo Petrosi wakati, “Ise tasida vyose ndipo tamurondezgani! Kasi ise tamkupoka vichi?”

²⁸Yesu wakati kwa iwo, “Nadi nkhumuphalirani kuti para Mwana wa Munthu wamkukhara pa chizumbe cha uchindami wakhe mu mgonezi uphya, imwe mwandirondezga namweso, mwamkukhara pa vizumbe 12 na kweruzga mafuko 12 gha Israele.

²⁹Ndipo yose uyo wali kusida nyumba, panji ŵabali ŵakhe, ŵadumbu, ŵawiske, ŵanyina, ŵana panji minda, chifukwa cha ine, wamkupokera vya mphapikira 100 ndipo wamkupoka umoyo wa muyirayira.

³⁰Kweni ŵanandi awo mbakudanga ŵamkuŵa ŵakumalira, ndipo awo mbakumalira ŵamkuŵa ŵakudanga.”