Read new_tumbuka_bible Mateyu 2 Bible Online

Mateyu 2 - new_tumbuka_bible bible

Mateyu 2

¹Wakati wababika Yesu mu Betelehemu wa Yudeya, pa nyengo ya Karonga Herode, ŵanthu ŵamahara ŵa ku mafumiro gha dazi[2] ŵakiza ku Yerusalemu.

²Ŵakafumba ŵakati, “Kasi walinkhu mweneuyo wababika karonga wa ŵaYuda? Pakuti tikawona nyenyezi yakhe ku mafumiro gha dazi, ndipo tiza kwiza kamusopa.”

³Para Karonga Herode wakati wapulika ichi, wakasuzgika mu mtima pamoza na ŵanthu wose ŵa mu Yerusalemu.

⁴Ndipo wakati waŵachemera pamoza ŵasofi ŵarara wose na ŵamanyi-marango wakaŵafumba wakati, “Kasi ndi nkhu uko Mesiya wakenera kubabikira.”

⁵Ndipo ŵakati kwa iyo, “Ndi mu muzi wa Betelehemu mu Yudeya. Pakuti ndimo nchimi yikalembera kuti,

⁶‘Ndipo iwe, Betelehemu Efurata, wa mweneiwe ndiwe muchoko chomene mu ŵakuwusa ŵa charu cha Yuda, mwa iwe ndamkufumiska yumoza uyo wamkuŵa murongozgi mu Israele, mweneuyo jando lakhe nda mwaka kufuma mazuŵa gha kale chomene.’ ”

⁷Ntheura Herode wakaŵachemera ku udesi ŵanthu ŵamahara ŵa ku mafumiro gha dazi, ndipo wakaŵafumbisiska kuti ŵamuphalire nyengo iyo nyenyezi yikawonekera.

⁸Ndipo wakaŵatuma ku Betelehemu wakati, “Rutaninge mukamupenjeseske makora mwana uyu, ndipo para mwakamusanga, mwize kandiphalire mwakuti nane nkhamusope.”

⁹Ŵakati ŵapulika mazgu gha karonga, iwo ŵakaruta. Nyenyezi iyo ŵakayiwona pakudanga ku mafumiro gha dazi, yikadangira panthazi pawo mpaka yikaya kimilira pachanya pa malo agho pakaŵa mwana.

¹⁰Ŵakati ŵayiwona nyenyezi yira, ŵakasekerera chomene na chimwemwe chikuru.

¹¹Ŵakanjira mu nyumba, ŵakamuwona mwana pamoza na nyina Mariya, ndipo ŵakajikama na kumulambira. Ntheura ŵakati ŵasutula vyuma vyawo ŵakamupa vyawanangwa vya golide, vyakununkhira, na mure.

¹²Ndipo pakuchenjezgeka mu maloto kuti ŵareke kuwerera kwa Herode, ŵakatora nthowa yinyakhe pakuwerera ku charu cha ku kwawo.

¹³Ŵakati ŵaruta ŵanthu ŵamahara, mungelo wa Fumu wakamuwonekera Yosefe mu maloto wakati, “Wuka, tora mwana na nyina, chimbilira ku Eguputo. Ukakhare kwenekura mpaka ndikuphalire, chifukwa Herode wali pafupi kupenja mwana kuti wamukome.”

¹⁴Ndipo Yosefe wakawuka usiku wenewura, wakatora mwana na nyina wakaruta ku Eguputo.

¹⁵Wakakhara kwenekura mpaka Herode wakafwa, mwakuti ghafiskike mazgu agho Fumu yikayowoyera mu nchimi kuti, “Kufuma ku Eguputo nkhachema mwana wane.”

¹⁶Para Herode wakati wamanya kuti ŵanthu ŵamahara ŵa ku mafumiro gha dazi ŵamupusika, wakakaripa chomene. Ndipo wakatuma ŵanthu kuya kakoma ŵana wose ŵanarume ŵa virimika viŵiri na awo ŵandafikepo, ŵa mu muzi wa Betelehemu na mu vigaŵa vyose zingirizge, kwakuyana na nyengo iyo wakafumbiranga ku ŵanthu ŵamahara.

¹⁷Penepapo ghakafiskika mazgu gha nchimi Yeremiya agho ghakuti,

¹⁸“Mazgu ghakapulikikwa mu Rama, chiliro na chitengero chikuru. Rakelo wakulirira ŵana ŵakhe. Iyo wakukana na kusanguruskika wuwo, pakuti ŵalikoso chara.”

¹⁹Herode wakati wafwa, mungelo wa Fumu wakamuwonekera Yosefe mu maloto mu Eguputo.

²⁰Wakati, “Wuka, utore mwana na nyina, uwerere ku Israele. Pakuti awo ŵakapenjanga kukoma mwana ŵali kufwa.”

²¹Yosefe wakawuka, wakatora mwana na nyina, ŵakawerera ku charu cha Israele.

²²Kweni wakati wapulika kuti Arikelawu ndiyo wakawusanga mu Yudeya mu malo gha wiske Herode, wakopa kuyako. Ndipo pakuchenjezgeka mu maloto, wakawerera ku Galileya.

²³Wakaya kakhara mu msumba uwo ukachemeka Nazarete, mwakuti ghafiskike mazgu gha nchimi agho ghakuti, “Wizamkuchemeka muNazarete.”