Read new_tumbuka_bible Mateyu 20 Bible Online

Mateyu 20 - new_tumbuka_bible bible

Mateyu 20

¹“Ufumu wa kuchanya ukulingana waka na mwene-munda uyo wakacherera kuya kalemba ŵanthu ŵakuteŵeta mu munda wakhe wa mpheska.

²Wakapangana nawo ŵa nchito ŵara kuŵalipira ndarama ya denari yimoza pa zuŵa. Wakaŵatuma kuya kateŵeta mu munda wakhe wa mpheska.

³Wakaruta pa 9 koloko, wakawona ŵanyakhe ŵakwimilira waka pa msika.

⁴Wakati kwa iwo, ‘Namwe rutaninge ku munda wane wa mpheska ndipo ndizamkumupani njombe yakwenerera.’

⁵Ŵanthu ŵara ŵakaruta. Wakarutaso pa 12 koloko na pa 3 koloko na mise, ŵakachita ntheura pera.

⁶Ndipo pafupi na 5 koloko, wakarutaso na kusanga ŵanyakhe ŵakwimilira waka, wakaŵafumba wakati, ‘Kasi chifukwa uli mukwimilira waka pano zuŵa lose?’

⁷Ŵakazgora ŵakati, ‘Chifukwa palije munthu uyo watilemba nchito.’ Wakati kwa iwo, ‘Namwe rutaninge mu munda wa mpheska.’

⁸“Apo dazi likaŵa pafupi kunjira, mwene-munda wa mpheska wakamuphalira mulaŵiliri wa ŵanchito ŵakhe wakati, ‘Ŵachema ŵanchito na kuŵalipira njombe yawo, kuyambira na awo ŵakalembeka pa umaliro na kumarizgira na awo ŵakalembeka pakudanga.’

⁹Ŵanchito awo ŵakalembeka pa 5 koloko ŵakiza, ŵakapokera ndarama ya denari yimoza.

¹⁰Ntheura para ŵakiza awo ŵakalembeka pakudanga, ŵakagomezga kuti ŵati ŵapokerenge njombe yikuruko. Kweni nawoso ŵakapokera waliyose ndarama ya denari yimoza.

¹¹Ŵakati ŵapokera, ŵakamba kumudinginyikira mwene-munda,

¹²ŵakati, ‘Ŵanthu aŵa ŵangulembeka pa umaliro ndipo ŵanguchita mlimo wawo pa ora limoza pera, waŵalinganizga uli na ise? Ise takomwa na mlimo wa zuŵa lose na chithukivu chikuru.’

¹³Kweni mwene-munda wakamuzgora yumoza wa ŵa nchito ŵara wakati, ‘Nganya iwe, nkhukunangira kanthu chara. Asi tanguzomerezgana njombe ya ndarama ya denari yimoza?

¹⁴Tora waka njombe yako urutenge. Ndakhumba ndamwene kumupa wakumalira uyu nga ndi umo ndakupira iwe.

¹⁵Asi ndili mwanangwa kuchita icho ndakhumba na chuma chane? Panji uli na sanje chifukwa ndili mwanangwa?’ ”

¹⁶Ntheura Yesu wakati, “Wakumalira wamkuŵa wakudanga, ndipo wakudanga wamkuŵa wakumalira.”

¹⁷Apo Yesu wakarutanga ku Yerusalemu, wakatorera pa mphepete ŵasambiri 12 ndipo pa nthowa wakati kwa iwo,

¹⁸“Sono tikuruta ku Yerusalemu, ndipo Mwana wa Munthu wamkuperekeka ku ŵasofi ŵarara na ŵamanyi-marango. Iwo ŵamkudumula kuti wakomeke.

¹⁹Ndipo ŵamkumupereka mu mawoko gha ŵamitundu kuti ŵamugoske, ŵamuthyapule na kumupayika pa mphinjika, kweni wamkuwuskika pa zuŵa la chitatu.”

²⁰Penepapo muwoli wa Zebediya wakiza kwa Yesu pamoza na ŵana ŵakhe, ndipo wakajikama panthazi pa Yesu na kuromba kanthu.

²¹Yesu wakamufumba wakati, “Kasi ukukhumbachi?” Mwanakazi yura wakazgora wakati, “Mulangure kuti ŵana ŵane ŵaŵiri aŵa, yumoza wakakhare ku maryero munyakhe ku mazere mu Ufumu winu.”

²²Yesu wakazgora wakati, “Mukumanya chara icho mukuromba. Kasi mungamweramo mu nkhombo ya visuzgo iyo ine ndizamkumweramo?” Ŵakamuzgora ŵakati, “Inya tingamweramo.”

²³Yesu wakaŵaphalira wakati, “Nadi, mwamkumweramo mu nkhombo yane, kweni kukhara ku woko lane la maryero na la mazere kuti nkhwane chara kupereka. Kweni nkhwa awo Ŵadada ŵali kuŵanozgera.”

²⁴Para ŵasambiri ŵanyawo khumi ŵakapulika ichi, ŵakakwiyira ŵana ŵaŵiri pa wiskewo ŵara.

²⁵Kweni Yesu wakachema ŵasambiri ŵakhe wose pamoza ndipo wakati, “Mukumanya kuti awo ŵakupimika kuti mbakuwusa mu ŵamitundu ŵakuŵawusira ŵanthu ŵawo mu mazaza, ndiposo ŵarongozgi ŵawo nawo ŵali na mazaza pakuwusa ŵanthu ŵawo.

²⁶Kureke kuŵa ntheura mukati mwinu. Kweni yose uyo wakukhumba kuŵa mukuru mukati mwinu, wakwenera kuŵa muteŵeti winu.

²⁷Yose uyo wakukhumba kuŵa wakudanga, wakwenera kuŵa muteŵeti mukati mwinu.

²⁸Nga ndi umo Mwana wa Munthu wakizira kuti ŵanthu ŵamuteŵetere chara, kweni kuti iyo wateŵetere ŵanthu na kupereka umoyo wakhe kuti wawombole ŵanthu ŵanandi.”

²⁹Apo Yesu na ŵasambiri ŵakhe ŵakafumanga mu Yeriko, mzinda ukuru wa ŵanthu ukamurondezga.

³⁰Ŵachiburumutira ŵaŵiri ŵakakhara mu mphepete mwa nthowa. Iwo ŵakati ŵapulika kuti ndi Yesu uyo wakajumphanga ŵakachemerezga ŵakati, “Fumu, Mwana wa Davide, mutilengere lusungu!”

³¹Mzinda wa ŵanthu ukaŵachenya pakuŵaphalira kuti ŵakhare chete. Kweni iwo ŵakachemerezga kwakuruska ŵakati, “Fumu, Mwana wa Davide, mutilengere lusungu!”

³²Yesu wakimilira, ndipo wakaŵachema wakati, “Kasi mukukhumba kuti ndimuchitirani vichi?”

³³Ŵakazgora ŵakati, “Fumu, tikukhumba kuti maso ghithu ghajurike.”

³⁴Yesu wakaŵa na chiwuravi na iwo, ndipo wakakhwaska maso ghawo. Penepapo ŵakalaŵiska ndipo ŵakamurondezga.