Read new_tumbuka_bible Mateyu 21 Bible Online

Mateyu 21 - new_tumbuka_bible bible

Mateyu 21

¹Apo Yesu na ŵasambiri ŵakhe ŵakati ŵaneng'enera ku Yerusalemu na kufika pa muzi wa Betifage, ku Phiri la maOlive, wakatuma ŵasambiri ŵakhe ŵaŵiri.

²Wakaŵaphalira wakati, “Rutani mu chikaya icho mwadunjikana nacho ndipo para mwakunjira waka mwamkusanga mbunda, ŵayikaka pamoza na mwana wakhe. Mukazisutule mwize nazo kwa ine.

³Usange munthu munyakhe wamkumufumbani kanthu, mukamuphalire kuti, ‘Fumu yikuzikhumba,’ ndipo luŵiro wamkuziwezgera kuno.”

⁴Ichi chikachitika mwakuti ghafiskike mazgu gha nchimi ghakuti,

⁵“Phalirani ŵanthu ŵa mu Ziyoni kuti, ‘Wonani, karonga winu wakwiza kwa imwe. Ngwakuzika ndipo wakwera pa mbunda, inya wakwera pa kamwana ka mbunda!’ ”

⁶Ntheura ŵasambiri ŵakaruta, ndipo ŵakaya kachita nga ndi umo Yesu wakaŵalangulira.

⁷Ŵakiza nayo mbunda yira pamoza na mwana wakhe, ŵakaŵikapo malaya ghawo pa msana wa mbunda zira ndipo Yesu wakakharapo.

⁸Mzinda ukuru wa ŵanthu ukatandika malaya ghawo mu msewu, ndipo ŵanji ŵakatema minthavi ya makuni na kuyitandika mu msewu.

⁹Mizinda ya ŵanthu awo ŵakadangira na awo ŵakarondezganga, yikachemerezga yikati, “Hosana[10] kwa Mwana wa Davide! Ngwakutumbikika uyo wakwiza mu zina la Fumu! Hosana kuchanya nkhanira!”

¹⁰Apo Yesu wakati wanjira mu Yerusalemu, msumba wose ukayaghayika ndipo ŵanthu ŵakafumba ŵakati, “Kasi ndi njani mweneuyu?”

¹¹Mizinda yikazgora yikati, “Uyu ndi Yesu nchimi ya ku Nazarete mu Galileya.”

¹²Yesu wakanjira mu Nyumba ya Chiuta ndipo wakachimbizgira kuwaro wose awo ŵakagulanga na kuguliska malonda mu Nyumba ya Chiuta. Wakagadabula matebulu gha ŵanthu awo ŵakasinthanga ndarama na vitengo vya ŵanthu awo ŵakaguliskanga nkhunda.

¹³Wakaŵaphalira wakati, “Kuli kulembeka kuti, ‘Nyumba yane yichemekenge nyumba yakusoperamo.’ Kweni imwe mukuyizgora mphanji ya ŵankhungu.”

¹⁴Ŵachiburumutira na viti ŵakiza kwa Yesu mu Nyumba ya Chiuta, ndipo wakaŵachizga.

¹⁵Kweni ŵasofi ŵarara na ŵamanyi-marango ŵakati ŵawona vya minthondwe ivyo Yesu wakachita na ŵana ŵakuchemerezga mu Nyumba ya Chiuta kuti, “Hosana kwa Mwana wa Davide,” ŵakakwiya.

¹⁶Ndipo ŵakati kwa iyo, “Kasi ukupulika ivyo aŵa ŵakuyowoya?” Yesu wakazgora wakati, “Inya, kasi mulije kuŵazgamo mu malembo agho ghakuti, ‘Mu milomo ya ŵana na ŵabonda ndimo mwanozgera marumbo ghakufikapo.’ ”

¹⁷Yesu wakaŵasida na kufumamo mu msumba, wakaruta ku Betaniya ndiko wakaya kagona.

¹⁸Na mulenje machero ghakhe, apo Yesu wakawereranga ku msumba wa Yerusalemu, wakaŵa na njara.

¹⁹Para wakawona khuni la chikuyu mu mphepete mwa nthowa, wakiza kufupi nalo ndipo kuti wakasangamo kanthu chara, kweni mahamba pera. Ntheura wakati kwa icho, “Mureke kupambikaso vipambi mwa iwe sono na muyirayira!” Penepapo chikuyu chira chikomira.

²⁰Para ŵasambiri ŵakawona ichi, ŵakazizwa. Ŵakamufumba Yesu ŵakati, “Kasi chikuyu ichi chomira uli luŵiro?”

²¹Yesu wakazgora wakati, “Nadi nkhumuphalirani kuti usange muli na chipulikano, ndipo kuti mukukayika chara, muti muchitenge icho chachitika ku chikuyu ichi pera chara, kweni nanga nkhuyowoya ku phiri ili kuti, ‘Nyamuka na kujiponya mu nyanja,’ ndipo chiti chichitikenge.

²²Chose icho mungapempha mu kuromba, mwamkupokera usange muli na chipulikano.”

²³Yesu wakati wanjira mu Nyumba ya Chiuta, ŵasofi ŵarara na ŵarara ŵa ŵaYuda ŵakiza kwa iyo apo wakasambizganga ndipo ŵakamufumba ŵakati, “Kasi ndi mazaza uli agho ukuchitira vinthu ivi? Ndipo ndi njani uyo wakakupa mazaza gha ntheura?”

²⁴Yesu wakazgora wakati, “Nane nditi ndimufumbaninge fumbo limoza, ndipo usange mwandizgora, nane nditi ndimuphalirani mazaza agho nkhuchitira vinthu ivi.

²⁵Yohane kuti wabapatizenge, kasi mazaza ghakubapatizira ghakafuma kwa njani? Kwa Chiuta panji ku ŵanthu?” Kweni iwo ŵakamba kususkana ŵekha ŵakati, “Usange tingamuzgora kuti, ‘Ghakafuma kuchanya,’ iyo watifumbenge kuti, ‘Chifukwa uli mukareka kupulikana?’

²⁶Kweni usange tikuti, ‘Ghakafuma ku ŵanthu,’ tikopa wumba wa ŵanthu, pakuti wose ŵakamupima Yohane kuti wakaŵa nchimi.”

²⁷Ntheura ŵakamuzgora Yesu ŵakati, “Tikumanya chara.” Yesu wakaŵazgora wakati, “Nane kuti nditi ndimuphaliraninge chara uko ghakafuma mazaza agho nkhuchitira vinthu ivi.”

²⁸“Imwe mukughanaghana uli? Kukaŵako munthu uyo wakaŵa na ŵana ŵanarume ŵaŵiri. Wakaruta ku mwana wakhe wakudanga wakati, ‘Wa mwana wane, rutanga ukagwire nchito muhanya uno mu munda wa mpheska.’

²⁹Mwana yura wakazgora wakati, ‘Nkhuyako chara.’ Kweni pamanyuma wakajiwezga na kuruta.

³⁰Wiske wakaruta ku mwana wakhe wa chiŵiri wakayowoya nga ndi umo wakayowoyera ku wakudanga. Mwana wa chiŵiri yura wakazgora wakati, ‘Nkhuruta, ŵadada.’ Kweni kuti wakarutako chara.

³¹Kasi ndi njani pa ŵaŵiri ŵara uyo wakachita khumbo la ŵawiske?” Ŵakazgora ŵakati, “Wakudanga yura.” Yesu wakaŵaphalira wakati, “Nadi nkhumuphalirani kuti ŵakusonkheska msonkho na ŵanakazi ŵaleŵe wakumudangirirani kunjira mu Ufumu wa Chiuta

³²Pakuti Yohane wakiza kwa imwe mwakuti wamurongorani nthowa ya urunji, ndipo kuti mukapulikana chara. Kweni ŵakusonkheska msonkho na ŵanakazi ŵaleŵe ndiwo ŵakapulikana nayo. Ndiposo nanga mukachiwona kuti mukang'anamuka pamanyuma pakhe na kugomezga chara.”

³³Yesu wakati, “Pulikani ntharika yinyakhe. Kukaŵa munthu uyo wakaŵa na munda wakhe wa mpheska, ndipo wakawuŵighilira luŵigho zingirizge. Wakajima nkhando yakukamiramo mpheska, wakazenga chigongwe cha ŵalinda na kuwubwerekeska munda ura ku ŵalimi ŵanyakhe na kuruta ku charu chinyakhe.

³⁴Yikati yafika nyengo ya kuponthorera vipambi, wakatuma ŵateŵeti ŵakhe ku ŵalimi ŵara kuti ŵakamupeko vipambi vya mu munda wa mpheska ura.

³⁵Kweni ŵalimi, ŵakaŵakora ŵateŵeti ŵara, yumoza ŵakamutimba, munyakhe ŵakamukoma, ndiposo munyakhe ŵakamudina na mawe.

³⁶Mwene-munda yura wakatumaso ŵateŵeti ŵanyakhe, ŵanandiko kuruska ŵakudanga, ndipo ŵalimi ŵakachita nawo ntheura pera.

³⁷Pa umaliro wakaŵatumira mwana wakhe wakati, ‘Mwana wane pera ndiyo ŵamkumuchindika.’

³⁸Kweni para ŵalimi ŵara ŵakawona mwana, ŵakayowoyeskana ŵakati, ‘Uyu ndiyo muhaliri, zaninge, tiyeni timukome, ndipo titore chiharo chakhe kuŵa chithu.’

³⁹Penepapo ŵakamukora, ŵakamutaya kuwaro kwa munda na kumukomera kwenekura.”

⁴⁰Yesu wakafumba wakati, “Kasi para mwene-munda wa mpheska yura wakwiza, wizamkuchitachi na ŵalimi ŵara?”

⁴¹Iwo ŵakazgora ŵakati, “Wizamkuŵakoma ŵalimi ŵaheni ŵara, ndipo munda wizamkuwubwerekeska ku ŵalimi ŵanji, ŵeneawo ŵiza kumupako vipambi vyakhe pa nyengo yakhe.”

⁴²Yesu wakaŵafumba wakati, “Kasi mundaŵazgepo malembo agho ghakuti, ‘Libwe ilo ŵazengi ŵakalikana, ndilo lazgoka nkhorezgero ya chingodya. Fumu Chiuta ndiyo yikachita ichi, ndipo nchakutizukumiska chomene!’

⁴³“Ntheura ichi nkhumuphalirani kuti Ufumu wa Chiuta uti upokekenge kufuma kwa imwe na kuperekeka ku fuko leneilo likupambika vipambi vyakwenerera.” [

⁴⁴Yose uyo wakuwa pa libwe ili wati wajipweteke chomene, ndipo pa yose uyo libwe ili liti liwirengepo, wati watekenyuke nga ndi fuvu.]

⁴⁵Ŵasofi ŵarara na ŵaFarisi ŵakati ŵapulika ntharika za Yesu, ŵakamanya kuti wakanenanga iwo.

⁴⁶Ntheura ŵakakhumba kumukora, kweni ŵakopa mizinda ya ŵanthu pakuti ŵanthu ŵakamupima Yesu kuti ndi nchimi.